«យូអេសអេធូដេ» ផ្សាយថាក្រុមហ៊ុនអាកាសចរណ៍អ៊ូសបេគីស្ថាន ប្រកាសកាលពីពេល ថ្មីៗកន្លងមកថា ក្រុមហ៊ុនមានគម្រោងថ្លឹងទម្ងន់អ្នកដំណើរជាមួយសម្ភារឡើងយន្តហោះ ជាផ្នែកមួយធានាដល់សុវត្ថិភាព ។
«យូអេសអេធូដេ» ផ្សាយថាក្រុមហ៊ុនអាកាសចរណ៍អ៊ូសបេគីស្ថាន ប្រកាសកាលពីពេល ថ្មីៗកន្លងមកថា ក្រុមហ៊ុនមានគម្រោងថ្លឹងទម្ងន់អ្នកដំណើរជាមួយសម្ភារឡើងយន្តហោះ ជាផ្នែកមួយធានាដល់សុវត្ថិភាព ។
ក្រុមហ៊ុនអាកាសចរណ៍នោះបញ្ជាក់ថា ក្រោយពីត្រួតពិនិត្យក្នុងច្រកចូល (Check-In) រួច អ្នកដំណើរត្រូវឡើងលើជញ្ជីងពិសេសនៅក្បែរទ្វារច្រកចេញ ។ ទិន្នន័យផ្ទាល់ខ្លួនរបស់អ្នកដំណើរនឹងមិនបង្ហាញឱ្យដឹងទេ រីឯតួលេខទម្ងន់រវាងអ្នកដំណើរ និងសម្ភារបញ្ជាក់ត្រឹមថា ជារបស់បុរស-ស្ត្រី ឬកុមារប៉ុណ្ណោះ ។ សេចក្តីថ្លែងការណ៍របស់អ៊ូសបេគីស្ថានអ៊ែរឡាញបញ្ជាក់ថា «យើងសូមធានាថា នឹងរក្សាទុកជាសម្ងាត់ទាំងស្រុង» ។
ក្នុងរបៀបរបររបស់សមាគមដឹកជញ្ជូនតាមផ្លូវអាកាសអន្តរជាតិ ក្រុមហ៊ុនអាកាសចរណ៍នានា មានតួនាទីត្រូវត្រួតពិនិត្យទម្ងន់ខ្លួនអ្នកដំណើរ រួមទាំងសម្ភារជាប់ខ្លួនឡើងលើយន្តហោះ ដើម្បីធានាសុវត្ថិភាពលើការហោះហើរ ។ ទិន្នន័យទម្ងន់គឺជាធាតុផ្សំដ៏សំខាន់ទាក់ទិននឹងសុវត្ថិភាពរបស់ជើងហោះហើរ ពិសេសនៅលើយន្តហោះធុនតូច ។
ដេលីម៉េល របស់អង់គ្លេសបញ្ជាក់ថា គោលការណ៍របស់ក្រុមហ៊ុនអាកាសចរណ៍អាចរារាំងមនុស្សធាត់ជិះយន្តហោះខ្នាតតូច និងមិនឱ្យផ្ទុកអ្នកដំណើរច្រើន ។ ទោះជាយ៉ាងណាក៏ដោយនៅក្នុងសេចក្តីថ្លែងការណ៍មិនផ្តោតលើបញ្ហានេះទេ និងក្នុងពេលបច្ចុប្បន្នក្រុមហ៊ុននៅមិនទាន់បង្ហាញការយល់ឃើញណាមួយនៅឡើយទេ ។
«អ៊ូសបេគីស្ថាន អ៊ែរឡាញ» មិនមែនជាក្រុមហ៊ុនអាកាសចរណ៍ដំបូងទេដែលថ្លឹងទម្ងន់អ្នកដំណើរ ដោយកាលពីឆ្នាំ២០១២ ក្រុមហ៊ុនអាកាសចរណ៍ «សាម័រអ៊ែរ» ដែលហោះហើរទៅកោះនានាក្នុងមហាសមុទ្រប៉ាស៊ីហ្វិក បានគិតថ្លៃធ្វើដំណើរ តាមទម្ងន់របស់អ្នកដំណើរនិងផ្តល់ហេតុផលថាវាជាវិធីសាស្ត្រដ៏យុត្តិធម៌ ចំពោះបទដ្ឋានគិតថ្លៃធ្វើដំណើរពីទម្ងន់ដងខ្លួនបង្កឱ្យមានការរិះគន់ និងបង្កើតការមិនពេញចិត្តដល់អ្នកដែលមានទម្ងន់ច្រើន ព្រោះចាត់ទុកថាជារឿងរើសអើង ៕
ចែករំលែកព័តមាននេះ