«រ៉យទ័រ» ផ្សាយថា ក្រុមអ្នកស្រាវជ្រាវនៃគណៈកម្មការអឺរ៉ុបបានបង្ហាញលទ្ធផលអង្កេតពីប្រភពទឹក និងនីត្រូហ្សែន (Nitrogen) ដែលបាត់បង់តាមរយៈការបោះចោលអាហាររបស់អ្នកប្រើប្រាស់ចំនួន៦ប្រទេស
«រ៉យទ័រ» ផ្សាយថា ក្រុមអ្នកស្រាវជ្រាវនៃគណៈកម្មការអឺរ៉ុបបានបង្ហាញលទ្ធផលអង្កេតពីប្រភពទឹក និងនីត្រូហ្សែន (Nitrogen) ដែលបាត់បង់តាមរយៈការបោះចោលអាហាររបស់អ្នកប្រើប្រាស់ចំនួន៦ប្រទេស គឺចក្រភពអង់គ្លេស ហូឡង់ ដាណឺម៉ាក ហ្វាំងឡង់ អាល្លឺម៉ង់ និងរូម៉ានី ។ លទ្ធផលបង្ហាញថា ជាមធ្យមសហគមន៍អឺរ៉ុប(EU) បានបោះបង់ចោលអាហារច្រើនដល់ទៅ២២លានតោនក្នុងមួយឆ្នាំ និងមាន៨០% ជាអាហារដែលអាចចៀសវាងពីការបោះចោលបាន ។
ចក្រភពអង់គ្លេសជាប្រទេសដែលមានអត្រាចោលអាហារច្រើនបំផុត ជាមធ្យមអាចប្រៀបធៀបបាននឹងការបោះចោលសណ្តែកមួយកំប៉ុង ក្នុងពលរដ្ឋម្នាក់ជារៀងរាល់ថ្ងៃ ។ ចំណែកប្រទេសរ៉ូម៉ានី ជាប្រទេសចោលអាហារតិចបំផុត ប៉ុន្តែអាចធៀបបានលើការបោះចោលផ្លែប៉ោម១ផ្លែក្នុងពលរដ្ឋម្នាក់ជារៀងរាល់ថ្ងៃ ។
អ្នកស្រាវជ្រាវបញ្ជាក់ថា គួរផ្តល់ការណែនាំដល់ពលរដ្ឋក្នុងការទិញទំនិញឱ្យប្រុងប្រយ័ត្ន និងស្គាល់ពីតម្រូវការប្រើប្រាស់ ព្រោះអាហារនៅសល់មួយចំនួនអាចចៀសពីការបោះចោលបាន ។
លោកស្រីដេវី វ៉េនហេម ប្រធានក្រុមអ្នកស្រាវជ្រាវនិយាយថា ប្រភេទអាហារមួយចំនួនអាចយកទៅកែច្នៃបានជាប្រភេទអាហារដែលផុតថ្ងៃកំណត់ ។ សម្រាប់អាហារដែលរមែងបោះចោលជាប់ជាប្រចាំរួមមានបន្លែ និងផ្លែឈើ ព្រោះមិនអាចរក្សាទុកបានយូរ ខណៈពេលអ្នកស្រាវជ្រាវបានប្រើតួលេខស្ថិតិរបស់ប្រទេសទាំង៦ក្នុងចំណោមប្រទេសទាំង២៨នៅអឺរ៉ុប ៕
ចែករំលែកព័តមាននេះ