«ដឹមីរ័រ» របស់អង់គ្លេស កាលពីពេល ថ្មីៗកន្លងមកផ្សាយថា លោកយាយអេកណេស ហ្វេនតុន អាយុ១១០ឆ្នាំ រស់នៅក្រុងអេនហ្គើលវូដ រដ្ឋញូវចឺស៊ី សហរដ្ឋអាមេរិក បានបង្ហាញពីអាថ៌កំបាំងធ្វើឱ្យមានអាយុវែង ។ គាត់តែងតែផឹកស្រាបៀរ Miller High Life ចំនួន៣ដប និងស្រា Johnnie Walker Blue Label ១កែវជារៀងរាល់ថ្ងៃក្នុងរយៈពេលជិត៧០ឆ្នាំ ។
លោកយាយអេតណេស ហ្វេនតុន ចាប់ផ្តើមអនុវត្តបែបនោះបន្ទាប់ពីវះកាត់ដុំសាច់ចេញពីរាងកាយមក ដោយវេជ្ជបណ្ឌិតណែនាំថា គួរផឹកស្រាបៀរ Miller High Life ចំនួន៣ដបក្នុងមួយ ថ្ងៃ ។ ចាប់តាំងពីពេលនោះមក គាត់ប្រតិបត្តិតាមជារៀងរហូត ព្រមទាំងផឹក១កែវក្នុងមួយថ្ងៃ ។
អ្នកថែទាំសុខភាពជាប្រចាំរបស់លោកយាយ អេកណេស ហ្វេនតុន ឱ្យដឹងថា ពួកគេនឹងឱ្យគាត់ឈប់ផឹកស្រាបៀរប្រចាំថ្ងៃ ព្រោះគាត់ទទួលទានអាហារតិចពេក ។ លោកយាយអេកណេស កើតនៅឆ្នាំ១៩០៥ និងទើបតែប្រារព្ធខួបកំណើត១១០ឆ្នាំ កាលពីថ្ងៃទី១ សីហា ២០១៥ ដោយមានកូននិងចៅច្រើនជាង៤០នាក់ ។
លោកយាយអេកណេស ហ្វេនតុន មានប្រសាសន៍ថា «នៅពេលអាយុបាន១០០ឆ្នាំ ខ្ញុំបានដើរទៅខាងមុខកញ្ចក់ ហើយនិយាយថា សូមអរព្រះគុណព្រះជាម្ចាស់ដែលផ្តល់ជីវិតដ៏ល្អ និងមានអាយុវែងមកដល់បច្ចុប្បន្ន ដោយគ្មានអ្វីត្រូវរអូ៊រទាំឡើយ» ៕
ចែករំលែកព័តមាននេះ