ភាគទី ៤
ដំណាក់កាលនៃការរៀនបចំផែនការ គឺជដំណាក់កាលដ៏ស្មុគ្រស្មាញមួយសម្រាប់ការកកើតវេបសាយសុខភាព health.com.kh ។ ខ្ញុំគិតថា មុខរបរផ្សេងទៀតក៏ដូច្នេះដែរ ពីព្រោះបើយើងរៀបចំផែនការខុស យើងនឹងដើរខុសផ្លូវហើយគម្រោងរបស់យើងអាចនឹងបរាជ័យ ។
ដូច្នេះការបង្កើតផែនការវេបសាយសុខភាពបានផ្តោតទៅលើចំណុចដូចតទៅនេះ ?
១- ហេតុអ្វីត្រូវបង្កើតវេបសាយសុខភាពនេះ ?
២- តើវាមានគូប្រជែង ឬទេ ? គូប្រជែងកំពុងធ្វើអ្វីខ្លះ ?
៣- តើខ្លឹមសារអ្វីខ្លះដែលអ្នកអានចង់ដឹង ?
៤ តើគួរមានអត្ថបទប្រភេទណា ដើម្បីអាចផ្តល់ប្រយោជន៍ដល់អ្នកអាន និងទាក់ទាញអ្នកអាន ?
៥- តើយើងមានយុទ្ឋសាស្ត្រទីផ្សារបែបណា ដើម្បីអោយគេស្គាល់វេបសាយ health.com.kh នេះបានឆាប់រហ័ស ?
៦- តើយើងត្រូវការធនធានមនុស្សប៉ុន្មាននាក់ដើម្បីដំណើរការគម្រោងនេះ ?
៧- តើគម្រោងនេះនឹងត្រូវការពេលវេលាប៉ុន្មាន ហើយអស់ធនធានលុយកាក់ប៉ុន្មានទើប អាចរកផលចំណេញវិញបាន ? ។
នៅពេលនិយាយដល់រឿងលុយដើម្បីអនុវត្តគម្រោងនេះនោះ ខ្ញុំបានសម្រេចប្រើប្រាស់លុយ ១០០ដុល្លារ ក្នុងមួយខែប៉ុណ្ណោះដើម្បីជួលអ្នកបច្ចេកវិទ្យាព័ត៌មានបង្កើតវេបសាយសុខភាព និងអោយជួយមើលខុសត្រូវផ្នែកបច្ចេកទេស ។ ចំណែកការងារផលិតអត្ថបទ គឺខ្ញុំខ្លួនឯងផ្ទាល់ធ្វើម្នាក់ឯងក្នុងជំហានដំបូង មុនពេលដែលអាចរកលុយបានបន្ថែមទៀតដើម្បីជួលមនុស្សធ្វើការ ។
នៅពេលដែលវរបសាយសុខភាពបានដំណើរការមួយរយៈខ្លី មិត្តភក្តិរបស់ខ្ញុំខាងពេទ្យក៏ បានជួយដាក់ផ្ទាំងពាណិជ្ជកម្មហើយខ្ញុំក៏ចាប់ផ្តើមរកលុយចូលបន្ថែម ។ ខ្ញុំក៏ប្រើប្រាស់លុយនោះ ដើម្បីរកមនុស្សមកជួយខ្ញុំដោយរើសសិស្សពេទ្យអោយមកធ្វើការក្រៅម៉ោង ។ ពួកគេបានកម្រៃការងារតែ ៦០ដុល្លារប៉ុណ្ណោះសម្រាប់ការជួយផលិតអត្ថបទចំនួនពីរ ឬបីតាមលទ្ឋភាព និងពេលវេលា ។ រយៈពេលប្រមាណមួយឆ្នាំ ខ្ញុំក៏អាចរកសិស្សពេទ្យចំនួនប្រាំនាក់ធ្វើការអោយ ដោយពួកគេទទួលលុយត្រឹម ៦០ដុល្លារក្នុងមួយខែប៉ុណ្ណោះ ។
ក្នងរយៈពេលពីរឆ្នាំ គម្រោងវេបសាយសុខភាពក៏ចាប់ផ្តើមល្បី និងមានអ្នកមើលច្រើន ។ ពេលនោះអ្នកដាក់ផ្សាយពាណិជ្ជកម្មក៏មានច្រើនដោយធ្វើអោយវេបសាយនេះអាចរកចំណូលបាន និងចំណេញលុយកាក់ ។
តើអ្នកទទួលបានអ្វីពីបទពិសោធនេះនៅក្នុងការបង្កើតគម្រោងរកស៊ី ?
អ្នកត្រូវតែសរសេរចេញមកពីគំនិតរកស៊ីរបស់ខ្លួនអោយទៅជាគម្រោងមួយដ៏លម្អិតដើម្បីដឹងថា ផលិតផលរបស់ខ្លួន ឬក៏សេវាកម្មរបស់ខ្លួននឹងអាចមានការគាំទ្រពីមហាជនឬទេ ? តើយើងត្រូវការធនធានប៉ុន្មាន ដើម្បីដំណើរការគម្រោងនេះ ? តើគម្រោងនេះនឹងអាចរកលុយបានយ៉ាងដូចម្តេចហើយ ត្រូវការពេលប៉ុន្មានទើបអាចចំណេញបាន ? ជាទូទៅអ្នកត្រូវសរសេរគម្រោងនេះអោយលម្អិតបំផុតតាមដែលអាចធ្វើទៅបាន ។
ខ្ញុំសូមជម្រាបថា គម្រោងខ្លះល្អប៉ុន្តែយើងអាចខ្វះលុយកណ្តាលទី និងមិនសម្រេចដល់គោលដៅដោយសារតែខ្វះលុយដំណើរការបន្តទៀតក៏មាន ។ នេះជាអ្វីដែលមិនគួរកើតមាន ។ ដូច្នេះ ចូរមានផែនការការងារ និងលុយកាក់ដ៏ច្បាស់លាស់មួយនៅពេលចាប់ផ្តើមគម្រោងរកស៊ី ។
សូមរង់ចាំតាមដានបន្តទៀតអំពីការរៀបចំផែនការអនុវតត្តគម្រោង “«លុយ ១០០ដុល្លារកែប្រែជីវិតខ្ញុំរបៀបណា ?»
ចំណែកប្រិយមិត្តដែលចង់ចែករំលែកបទពិសោធន៍ទាក់ទងនឹងការរកលុយដល់មហាជនក៏អាចទាក់ទងគម្រោង «លុយ» របស់សារព័ត៌មានកោះសន្តិភាពផងដែរ ។ យើងរីករាយនឹងធ្វើការផ្សព្វផ្សាយជូន ដើម្បីជាការចែករំលែកចំណេះដឹងជាក់ស្តែងពិតៗទាក់ទងនឹងការរកលុយ ការសន្សំលុយ និងការគ្រប់គ្រងលុយ ។ ក្នុងករណីដែលលោកអ្នកមានការលំបាកនៅក្នុងការសរសេរចេញគំនិតទាំងអស់នោះ ក្រុមនិពន្ឋគម្រោង លុយ របស់កោះសន្តិភាព នឹងជួយជ្រោមជ្រែងអោយអស់ពីសមត្ថភាព ៕
ចែករំលែកព័តមាននេះ