ខេត្តកំពង់ធំ ៖ ដើម្បីធានាបាននូវគុណភាណក៏ដូចជាប្រសិទ្ធភាពនៃការប្រើប្រាស់ និងការគ្រប់គ្រងរំសេវជាតិផ្ទុះនៅតាមការដ្ឋានវាយថ្មដែលកំពុងដំណើការអាជីវកម្មនៅក្នុងខេត្តកំពង់ធំ នៅចុងសប្ដាហ៍នេះ ការិយាល័យគ្រប់គ្រងអាវុធជាតិផ្ទុះនៃស្នងការដ្ឋាននគរបាលខេត្តកំពង់ធំ បានចុះពិនិត្យឃ្លាំងស្ដុករំសេវផ្ទុះ និងណែនាំពីបច្ចេកទេសថែរក្សាដល់ម្ចាស់ក្រុមហ៊ុនការដ្ឋានវាយថ្មចំនួន២កន្លែងស្ថិតនៅក្នុងស្រុកបារាយណ៍ ខេត្តកំពង់ធំ ។
ទាក់ទងការចុះពិនិត្យឃ្លាំងស្ដុករំសេវនេះដែរ លោកវរសេនីយ៍ទោ ហៀង ហ៊ល ស្នងការង និងជានាយការិយាល័យគ្រប់គ្រងអាវុធជាតិផ្ទុះបានបញ្ជាក់ឲ្យដឹងថា យោងតាមផែនការរបស់ក្រសួង និងការណែនាំរបស់អគ្គស្នងការនគរបាលជាតិស្ដីពីការគ្រប់គ្រងអាវុធជាតិផ្ទុះ និងរំសេវគ្រប់ប្រភេទ និងដើម្បីបញ្ចៀសនូវបញ្ហាអសន្តិសុខផ្សេងៗ ទើបការិយាល័យជំនាញចុះពិនិត្យទីតាំងស្ដុកជាតិរំសេវផ្សេងៗនៅតាមការដ្ឋានវាយថ្ម ចំនួន២កន្លែង គឺទី១-ការដ្ឋានម្ចាស់ឈ្មោះ កូវ គឹមលាង កំពុងអាជីវកម្មវាយថ្មនៅក្នុងឃុំក្រវ៉ា និងទី២-ម្ចាស់ការដ្ឋានឈ្មោះ ស្រ៊ុន ហេងងន់ ដែលកំពុងធ្វើអារជីវកម្មវាយថ្មនៅឃុំគគីធំ ក្នុងស្រុកបារាយណ៍ ។
ជាមួយគ្នានោះដែរ លោកស្នងការរងក៏បានធ្វើការណែនាំពីរបៀបវេចខ្ចប់ទុកដាក់រំសេវទៅតាមលក្ខណៈស្ដងដារ ដើម្បីជៀសវាងការបាត់បង់ដោយប្រការផ្សេងៗ ។ សូមបញ្ជាក់ថា ការប្រើប្រាស់រំសេវផ្ទុះនេះ មិនមែនប្រើតែនៅតាមការដ្ឋានវាយថ្មប៉ុណ្ណោះទេ គឺបច្ចុប្បន្នការប្រើរំសេវបំផ្ទុះនេះក៏កំពុងពេញនិយមប្រើនៅតាមអណ្ដូងរ៉ែមាសជាច្រើនកន្លែងនៅតំបន់ភ្នំជី ក្នុងភូមិសាស្ត្រ ស្រុកសណ្ដាន់ ខេត្តកំពង់ធំផងដែរ ៕
ចែករំលែកព័តមាននេះ