រាជធានីភ្នំពេញ ៖ តារាកំប្លែងវ័យចំណាស់នាយចេកឈ្មោះពិតឈុំ ប៊ុនឈឿន បច្ចុប្បន្ននេះមិនស្រណុកចិត្តទេព្រោះតែរឿងជំពាក់បំណុលគេរាប់ពាន់ដុល្លារ ។ ការជំពាក់បំណុលគេនោះដោយសារខាតចុងខាតដើមលើមុខរបរចិញ្ចឹមជ្រូក ។
ធ្លាប់តែឃើញផ្តល់សំណើចជូនទស្សនិកជននៅលើកញ្ចក់ទូរទស្សន៍ស្ទើរតែរៀងរាល់ថ្ងៃ តែនៅក្រៅឆាកវិញនាយចេកមិនរីករាយទេ ដ្បិតតែរឿងក្រុមគ្រួសារជំពាក់បំណុលគេជាច្រើនឆ្នាំមកហើយមិនអាចរកសងគេបាន ។ រាល់ថ្ងៃនេះគ្រួសារគាត់ខំប្រឹងរកប្រាក់បង់ការប្រាក់ឱ្យគេស្ទើរតែមិនគ្រប់ ។ បែបនោះហើយទើបទស្សនិកជនខ្លះឆ្ងល់ថានាយចេកលេងកំប្លែងតែទឹកមុខ ស្ងួតៗហាក់ដូចអត់ព្រលឹងក្នុងខ្លួនសោះ ។
ជំនួបផ្ទាល់ជាមួយអ្នកយកព័ត៌មានកោះសន្តិភាពក្នុងពិធីក្រុងពលីថតខ្សែភាពយន្តរឿង «បេះដូងកូពី» របស់ផលិតកម្ម «ភី សុគន្ធី» កាលពីពេល ថ្មីៗកន្លងមក នាយចេកឱ្យដឹងថា បើទោះជាមានស្ថានីយទូរទស្សន៍មួយចំនួនអនុញ្ញាតឱ្យគាត់បានឡើងសម្តែងកំប្លែងជាមួយក្រុមនាយកុយ និងផលិតកម្មមួយចំនួនផ្តល់ឱកាសឱ្យថតខារ៉ាអូខេដែលគេមើលទៅគាត់មមាញឹកខ្លាំងសមតែរីករាយនឹងការបានចំណូលច្រើន តែវាមិនដូចជាអ្វីដែលគេយល់ឡើយ ។ វាជាសំបកក្រៅចំពោះការកំប្លុកកំប្លែងរបស់គាត់ តែតាមពិតគាត់តស៊ូចិញ្ចឹមក្រុមគ្រួសារជាង១០នាក់យ៉ាងលំបាក ។ កាន់តែធ្ងន់ខ្លួនស្ទើរតែដាច់ខ្យល់ ម្តងៗ គឺគាត់ត្រូវបង់ការប្រាក់ឱ្យគេដោយសារជំពាក់លុយគេជាង៧ពាន់ដុល្លារដែលក្នុង១ពាន់ដុល្លារការប្រាក់១០០ដុល្លារ សរុបទាំងអស់៧០០ដុល្លារ ក្នុងមួយខែ ។
តារាកំប្លែងដែលចាត់ទុកខ្លួនឯងស្ទើរតែអស់ពន្លឺក្នុងជីវិតរូបនេះនិយាយថា «ព្រោះតែខាតចុងដើមលើមុខរបរចិញ្ចឹមជ្រូកទើបខ្ញុំជួបរឿងបែបនេះ ធ្លាក់ខ្លួនលក់ភេសជ្ជៈនៅតាមផ្លូវជាតិលេខ២ ស្ថិតក្នុងខណ្ឌដង្កោ សង្កាត់រលួស ។ មានបងប្អូនខ្លះគាត់ស្គាល់គាត់ទិញអស់៨ពាន់រៀល ឱ្យលុយដុំ តែមិនយកលុយអាប់ទេ ។ ខ្លះទៀតគេឃើញគេស្គាល់ ហើយភ្ញាក់ផ្អើលនឹងជីវិតខ្ញុំបែបនេះក៏ហុច៥ដុល្លារ ១០ដុល្លារ និងប្រាប់ឱ្យខ្ញុំតស៊ូតទៅទៀតកុំអស់សង្ឃឹម ។
លើសពីនេះទោះជាខ្ញុំខំរកលុយសងគេស្ទើរតែរលេះស្បែកក៏មិនសល់ដែរ ព្រោះក្រៅពីសងការប្រាក់គេ គឺយកប្រាក់មួយចំនួនមើលខុសត្រូវអ្នកក្នុងផ្ទះជាង១០នាក់ បើនិយាយពីប្រពន្ធវិញក៏ឈឺទៀត ។ អុីចឹងហើយបើគិតពីវ័យវិញខ្ញុំអាយុ៦០ឆ្នាំហើយ ប៉ុន្តែចេះតែតស៊ូ ឈឺយ៉ាងណាក៏ដើរសម្តែងរកប្រាក់មិនឱ្យមានឈ្មោះថាជាជនបោកប្រាស់គេស្អុយឈ្មោះក្នុងសង្គមឡើយ ។ អ្វីដែលសំខាន់ខ្ញុំតែងតែសញ្ជឹងគិតថា បើមានអ្នកណាជួយខ្ញុំឱ្យផុតបំណុលគេនោះ សឹងថាមួយជាតិនេះឱ្យខ្ញុំនៅបម្រើមួយជីវិតក៏សុខចិត្តដែរ បើគិតពីរឿងដែលខ្ញុំប្រឈមនឹងភាពលំបាកក្នុងចិត្តរាល់ថ្ងៃនេះ ។
កាន់តែស្លុតចិត្តខ្ញុំចេះតែដេកភ័យ បើថ្ងៃក្រោយខ្ញុំឈឺ ហើយបាត់បង់រូបរាងកាយពីលើលោកនេះទៅ ច្បាស់ជាព្រលឹងមិនស្ងប់ទេ ព្រោះបំណុលគេច្រើន ហើយដីធ្លីផ្ទះសម្បែងសុទ្ធតែបញ្ចាំគេ បើអត់ពីខ្ញុំទៅកូនចៅច្បាស់ជាអត់ផ្ទះនៅ ពិតជាអាណិតពួកគេណាស់។ ម្យ៉ាងម្ចាស់បំណុលរករឿងទារលុយទៀតទើបចេះតែគិត ហើយខំរកក្រែងលោដោះបំណុលគេបានសម្រេចនាពេលខាងមុខ» ។
ក្រៅពីជំពាក់បំណុលគេនោះនាយចេកទិញម៉ូតូបង់រំលស់ទៀតសម្រាប់ឱ្យក្រុមគ្រួសារប្រើ និងសម្រាប់គាត់ជិះទៅសម្តែងនៅទី ឆ្ងាយៗ ។
ក្រៅពីលក់ភេសជ្ជៈបន្តិចបន្តួចដោយគេឱ្យដីធ្វើកន្លែងលក់ នាយចេកប្រាថ្នាចង់ទិញដីមួយកន្លែងនៅតាមផ្លូវជាតិលេខ២ តម្លៃជាង១ម៉ឺនដុល្លារ ទុកលក់ដូរនៅពេលអនាគត ព្រោះផ្ទះគាត់ចូលទៅក្នុងឆ្ងាយពីផ្លូវជាតិជាង៣គីឡូម៉ែត្រ។
ទាក់ទិនអាជីពសិល្បៈនាយចេកចូលរួមសម្តែងភាពយន្តបានប្រមាណជាង១០រឿង បន្ថែមលើការសម្តែងកំប្លែងនៅតាមស្ថានីយទូរទស្សន៍ ។ ថតកុនមួយឈុត ឬលើសពីនេះនាយចេកគិតតម្លៃស្មើ១ថ្ងៃដែរ ដោយគេឱ្យ១០០ដុល្លារ ។ បើលេងកំប្លែងវិញនៅក្នុងរាជធានីបាន២៥ដុល្លារ ឬ៣០ដុល្លារ តែបើសម្តែងនៅតាមខេត្តបានជិត១០០ដុល្លារ។ «បើទោះជាពេលនេះខ្ញុំនៅតែអត់ធូរធារ ក៏ខ្ញុំមិនច្រណែនគេដែរ ព្រោះធ្វើម៉េចវាសនាមនុស្សមើលមិនឃើញ ។
អ្វីដែលសំខាន់ខ្ញុំនៅតែគិតថាកុំតែបាននាយកុយហៅសម្តែង និងផលិតកម្មនានា ជាពិសេសខាងផលិតកម្មហង្សមាសគាត់អាណិតតែងតែហៅទៅសម្តែង កុំអីមិនដឹងជាបែបណាទេ បើងាកមកមើលអ្នកផ្ទះលំបាកបែបនេះនោះ» នាយចេកនិយាយបែបនេះ ៕
ចែករំលែកព័តមាននេះ