ខេត្តកំពង់ឆ្នាំងៈ យុវជនសង្ស័យម្នាក់ ត្រូវបាននគរបាលស្រុកបរិបូរណ៍ចាប់ឃាត់ខ្លួន និងកសាងសំណុំរឿងបញ្ជូនទៅស្នងការដ្ឋាននគរបាលខេត្ត កាលពីរសៀលថ្ងៃទី៦ សីហា ២០១៥
ខេត្តកំពង់ឆ្នាំងៈ យុវជនសង្ស័យម្នាក់ ត្រូវបាននគរបាលស្រុកបរិបូរណ៍ចាប់ឃាត់ខ្លួន និងកសាងសំណុំរឿងបញ្ជូនទៅស្នងការដ្ឋាននគរបាលខេត្ត កាលពីរសៀលថ្ងៃទី៦ សីហា ២០១៥ បន្ទាប់ពីទទួលបានពាក្យបណ្តឹងពីម្តាយនារីរងគ្រោះថា បានចាប់កូនស្រីគាត់រំលោភកាលពីម៉ោង៧និង៤០នាទីយប់ថ្ងៃទី២ សីហា ២០១៥ នៅក្នុងឃុំផ្សារ ស្រុកបរិបូរណ៍ ។
សមត្ថកិច្ចនគរបាលស្រុកបរិបូរណ៍ បានឱ្យដឹងថា យុវជនសង្ស័យ ឈ្មោះ ថោ ធួន អាយុ២៥ឆ្នាំ មានទីលំនៅភូមិឃុំកើតហេតុខាងលើ ។ ចំណែកនារីរងគ្រោះ អាយុ២១ឆ្នាំ មានទីលំនៅជាមួយគ្នា ។
ប្រភពដដែលបានស្រង់សម្តីក្នុងពាក្យបណ្តឹងរបស់ស្ត្រីជាម្តាយនារីរងគ្រោះរៀបរាប់ថា មុនពេលកើតហេតុ គាត់ជាម្តាយបានប្រើកូនស្រីឱ្យទៅមើលកណ្តាប់សំណាបនៅស្រែមានចម្ងាយជាង៥០ម៉ែត្រពីផ្ទះ ដោយកូនស្រីទៅបាត់យូរពេកក៏ទៅតាមរក ស្រាប់តែជិតដល់ជន្លង់ចំបើងចម្ងាយជាង៣០ម៉ែត្រពីផ្ទះ ឃើញកូនស្រីគាត់រត់ទាំងអាក្រាតមករកគាត់ ដោយយំប្រាប់ថា ឈ្មោះ ធួន ចាប់នាងរំលោភ ពេលនោះគាត់ជាម្តាយបានឃើញឈ្មោះ ធួន រត់គេចខ្លួនបាត់ទៅហើយ ។
បើតាមសម្តីស្ត្រីជាម្តាយនារីរងគ្រោះនិយាយប្រាប់អ្នកសារព័ត៌មានថា មូលហេតុនាំឱ្យមានការយឺតយ៉ាវក្នុងការប្តឹង ដោយសារតែជនសង្ស័យជាអ្នកស្រុក អ្នកភូមិជាមួយគ្នា មិនចង់ឱ្យវែងឆ្ងាយ គាត់បានហៅមកសម្របសម្រួលគ្នាដោយឱ្យខាងប្រុសទទួលខុសត្រូវនិងរៀបចំទុកដាក់ឱ្យ តែខាងប្រុសមិនព្រម ហើយក៏ឈានដល់ការចរចាគ្នាសំណង
ជាប្រាក់ ដែលដំបូងឡើងគាត់ទារ៥ពាន់ដុល្លារ ហើយក៏បានចរចាគា្ននៅត្រឹមសំណង២ពាន់ដុល្លារ និងបានសន្យាប្រគល់ប្រាក់នៅថ្ងៃទី៦ ខែសីហា ឆ្នាំ២០១៥ លុះដល់ថ្ងៃកំណត់ប្រគល់ប្រាក់ ស្រាប់តែខាងប្រុសប្រាប់ថា គ្មានប្រាក់ទេ ប្តឹងដល់ណាក៏ប្តឹងទៅ ដោយសារតែហេតុនេះហើយ ទើបគាត់សម្រេចប្តឹងឱ្យផ្តន្ទាទោសតាមផ្លូវច្បាប់ ៕
ព័ត៌មានលម្អិតមានផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ