រាជធានីភ្នំពេញ ៖ អ្នកយកព័ត៌មានកាសែតកម្ពុជាថ្មីលោកប៊ុន សឿន អាយុ៣៨ឆ្នាំ មានទីលំនៅក្នុងភូមិតាងួន សង្កាត់កាកាប ខណ្ឌដង្កោ បានអះអាងថា ត្រូវចោរ២នាក់ប្រើកាំភ្លើងខ្លីភ្ជង់ប្លន់យកទូរស័ព្ទដៃ១គ្រឿង និងវិទ្យុទាក់ទង១គ្រឿង រួមជាមួយកាបូបដៃមួយមានលុយចំនួន៧ម៉ឺនរៀល និង៨ដុល្លារកាលពីវេលាម៉ោង១០យប់ ថ្ងៃទី៦ ខែមីនា ឆ្នាំ២០១១ នៅលើផ្លូវបេតុង ក្នុងព្រំប្រទល់រវាងភូមិដីថ្មី និងភូមិគោកឃ្លាង សង្កាត់ភ្នំពេញថ្មី ខណ្ឌសែនសុខ ។ ប៉ុន្តែផ្ទុយពីការអះអាងរបស់អ្នកកាសែតរូបនេះ សមត្ថកិច្ចសង្ស័យថា ជារឿងគំនុំច្រើនជាងការប្លន់ទៅវិញ។
តាមព័ត៌មានពីលោកប៊ុន សឿន បានឱ្យដឹងថា មុនពេលកើតហេតុគាត់បានជិះម៉ូតូម៉ាកយ៉ាម៉ាហា ផលិតនៅប្រទេសវៀតណាមមកពីលេងស្រុក លុះមកដល់ចំណុចខាងលើក៏មានមនុស្សប្រុសមាឌធំៗ២នាក់ជិះម៉ូតូធុនC125 គ្មានស្លាកលេខមកកៀរ ហើយដកកាំភ្លើងខ្លីមិនស្គាល់ម៉ាកភ្ជង់ចំចង្កេះ និងបង្ខំឱ្យឈប់ម៉ូតូ រួចប្លន់យកទូរស័ព្ទដៃ១គ្រឿង ម៉ាកណូគៀ និងវិទ្យុទាក់ទង រួមទាំងកាបូបដៃថែមទៀតផង។ អ្នកកាសែតរូបនេះបានបន្តថា ចំពោះម៉ូតូចោរមិនយកទេ ដោយពួកចោរគ្រាន់តែដកសោគ្រវាត់ចោលឱ្យឆ្ងាយ បន្ទាប់មកក៏ជិះម៉ូតូគេចខ្លួនបាត់អស់ទៅ ទោះបីជាយ៉ាងណាចោរពុំបានបង្កឱ្យមានរងរបួសអ្វីឡើយ។ ទាក់ទិននឹងករណីជនល្មើស២នាក់ប្រើអាវុធខ្លីប្លន់អ្នកកាសែតនេះ ប៉ូលិសព្រហ្មទណ្ឌកំពុងតែស្រាវជ្រាវ និងប្រមូលរកសាក្សីផងដែរ ដែលចោរប្លន់មិនស្គាល់ពួកអ្នកកាសែត ឬព្រះសង្ឃទេ ឱ្យតែមានឱកាសគឺពួកគេប្លន់ហើយ ៕
ចែករំលែកព័តមាននេះ