ខេត្តកោះកុង ៖ បុរសឈ្មោះភឿន សារ៉ុម ហៅវែង អាយុ៣៨ឆ្នាំ ជាកម្មករសំណង់ ត្រូវបានប្រពន្ធរបស់ខ្លួនដាក់ពាក្យបណ្តឹងនៅការិយាល័យប្រឆាំងការជួញដូរមនុស្ស និងការពារអនីតិជន ដើម្បីឱ្យសមត្ថកិច្ចចាប់ខ្លួន ដោយចោទថា បុរសជាប្តីរូបនេះបានចាប់រំលោភកូនស្រីរបស់នាងដែលត្រូវជាកូនចុងបានសម្រេចកាលពីវេលាម៉ោង១២យប់ថ្ងៃទី២៤ មីនា នៅលើផ្ទះជួលរបស់ខ្លួនដែលស្ថិតក្នុងសង្កាត់ដងទង់ ក្រុងខេមរភូមិន្ទ ខេត្តកោះកុង ។ ជនសង្ស័យឈ្មោះភឿន សារ៉ុម ត្រូវបានសមត្ថកិច្ចចាប់ខ្លួនតាមពាក្យបណ្តឹងកាលពីថ្ងៃទី២៧ មីនា ឆ្នាំ២០១១ ។
ស្ត្រីដែលត្រូវជាម្តាយបង្កើតរបស់ក្មេងស្រីរងគ្រោះបានបញ្ជាក់ថា កូនស្រីគាត់អាយុ១៤ឆ្នាំ មិនបានចូលសាលារៀននឹងគេទេ សព្វថ្ងៃប្រកបរបរជាកម្មករលាងចានជាមួយគាត់នៅក្នុងអាហារដ្ឋានមួយដើម្បីយកប្រាក់ចិញ្ចឹមកូនតូចៗ២នាក់ទៀត ពីព្រោះប្តីក្រោយជាកម្មករសំណង់រកប្រាក់មួយថ្ងៃចាយមួយថ្ងៃតែខ្លួនឯង មិនគ្រប់ផង និងពេលខ្លះរករឿងវាយដំគាត់តាមអំពើចិត្ត ។ ជាក់ស្តែងកាលពីខែកុម្ភៈកន្លងទៅនេះ ប្តីឈ្មោះភឿន សារ៉ុម ហៅវែង បានយកផ្លែឡាមមកឆូតលើក្បាលពោះផ្នែកខាងឆ្វេងគាត់បណ្តាលឱ្យរយះចេញឈាមដេរចំនួន១៥ថ្នេរ ដែលរហូតមកដល់ពេលនេះនៅមិនទាន់ជាសះស្បើយនៅឡើយ ។ អ្នកស្រីបានរៀបរាប់ទៀតថា ចំពោះការចាប់រំលោភកូនស្រីនេះ គាត់ពុំបានដឹងឡើយ ទោះបីដេកនៅក្រោមដំបូលផ្ទះតែមួយក្តី លុះព្រឹកឡើងកូនស្រីប្រាប់ ទើបគាត់សម្រេចចិត្តមកប្តឹងសមត្ថកិច្ចតែម្តង ។
កុមារីរងគ្រោះបានរៀបរាប់ប្រាប់សមត្ថកិច្ចថា ឪពុកចុងរបស់ខ្លួនឈ្មោះភឿន សារ៉ុម ហៅវែង បានចាប់រំលោភសេពសន្ថវៈលើរូបនាងចំនួន២លើកមកហើយ គឺលើកទី១ នាងមិនចាំថ្ងៃខែទេ តែដឹងថា ពេលរដូវបុណ្យភ្ជុំបិណ្ឌក្នុងឆ្នាំ ២០១០ នៅក្នុងផ្ទះ ហើយនាងមិនហ៊ានស្រែកទេ ដោយសារពេលនោះឪពុកចុងបានយកស្នភ្ជង់កនាងជាប់និងយកដៃខ្ទប់មាត់ទៀតផង ។ លើកទី២ គឺនៅថ្ងៃទី២៤ មីនា វេលាម៉ោង១២យប់នៅលើផ្ទះដដែល ហើយមូលហេតុដែលនាងមិនហ៊ានស្រែកប្រាប់ម្តាយដោយសារតែឪពុកចុងចាប់ដៃនិងខ្ទប់មាត់នាងជាប់ ហើយបាននិយាយលួងលោមនាងថា កុំមាត់ប្រយ័ត្នភ្ញាក់ម៉ែឯងចាំគាត់ឱ្យទៅកំដរការគេ និងទៅកំពង់ចាមជាមួយ ។
នៅមុខសមត្ថកិច្ច ឈ្មោះភឿន សារ៉ុម បានសារភាពថា ខ្លួនពិតជាបានរួមរ័កជាមួយកូនស្រីចុងប្រាកដមែន ខណៈពេលនាងដេកនៅលើផ្ទះក្បែរគ្នាដោយមានខណ្ឌក្តារជាជញ្ជាំង។ នៅពេលរួមរ័កនោះគឺនាងអត់បានស្រែករើបម្រះទេ គឺព្រមព្រៀងគ្នា ហើយពេលនោះម្តាយនាងក៏នៅក្បែរនោះដែរ អត់ដឹងថា គាត់ដឹងឬក៏អត់ ។
លោកវរសេនីយ៍ទោ គង់ យ៉ាន់ អនុប្រធានការិយាល័យកណ្តាលនគរបាលយុត្តិធម៌ បានបញ្ជាក់ថា ការស៊ើបអង្កេតនិងបង្ក្រាបករណីឪពុករំលោភកូនចុងនេះត្រូវបានធ្វើឡើងដោយកម្លាំងការិយាល័យប្រឆាំងការជួញដូរមនុស្ស និងការពារអនីតិជន ក្រោមការណែនាំនិងចង្អុលបង្ហាញពីលោកឧត្តមសេនីយ៍ត្រី សំ ឃីកវៀន ស្នងការនគរបាលខេត្ត ហើយពេលនេះ ជនល្មើសត្រូវបានកសាងសំណុំរឿងបញ្ជូនទៅតុលាការវិនិច្ឆ័យទោសទៅតាមផ្លូវច្បាប់ ។
ពាក់ព័ន្ធនឹងករណីខាងលើនេះដែរ លោកស្រីអេង គឹមនាង អភិបាលរងខេត្តកោះកុង បានប្រាប់កោះសន្តិភាពថា លោកស្រីនឹងកោះអញ្ជើញស្ថាប័នពាក់ព័ន្ធដូចជាអង្គការក្រៅរដ្ឋាភិបាល មន្ទីរកិច្ចការនារី និងសាខាកាកបាទក្រហម ដើម្បីមកពិភាក្សារកដំណោះស្រាយក្នុងការជួយសង្គ្រោះដល់កុមារីរងគ្រោះដោយសារការចាប់រំលោភនេះ ក៏ដូចជាម្តាយកុមារីដែលជាស្ត្រីមេម៉ាយទុរគតផងដែរ៕
ចែករំលែកព័តមាននេះ