ខេត្តសៀមរាប ៖ មន្ត្រីកាំកុងត្រូលខេត្តសៀមរាប សហការជាមួយមន្ទីរពាណិជ្ជកម្មខេត្តបានចុះពិនិត្យគុណភាពចំណីអាហារ ដែលលក់នៅក្នុងសាលាបឋមសិក្សាវត្តបូព៌ ក្នុងក្រុងសៀមរាប កាលពីព្រឹកថ្ងៃទី០១ កក្កដា ២០១៥ ដើម្បីការពារសុវត្ថិភាពដល់សុខភាពសិស្សនៅក្នុងសាលាឲ្យបានល្អ ព្រោះកន្លងមកនេះមានករណីភ្ញាក់ផ្អើលថា បច្ចុប្បន្ននៅក្នុងប្រទេសកម្ពុជាមានការហូរចូលប្រភេទចំណីអាហារដែលផលិតចេញពីសារធាតុប្លាស្ទិក ដែលត្រូវបានមជ្ឈដ្នានអ្នកលេងបណ្តាញទំនាក់ទំនងសង្គម (Facebook) មួយចំនួនវាយប្រហារថា ជាករណីវិច្ឆេទកម្មសុខភាពដ៏អមនុស្សធម៌បំផុត ។
នៅក្នុងបេសកកម្មរបស់កាំកុងត្រូលនោះ ត្រូវបានក្រុមការងារចុះត្រួតពិនិត្យប្រទះឃើញចំណីអាហារប្រភេទបង្គាគ្រឿងបំពងប្រេង ថាមិនមែនជាអាហារធម្មជាតិ ។ ថ្វីត្បិតតែការលើកឡើងខាងលើពុំទាន់មានការពិសោធន៍ណាមួយបញ្ជាក់ជាផ្លូវការនៅឡើយថា ជាការពិត ឬគ្រាន់តែជាការចោទប្រកាន់យ៉ាងណាក៏ដោយ ប៉ុន្តែករណីនេះបានក្លាយជាប្រធានបទយ៉ាងសំខាន់ ដែលអគ្គនាយកដ្ឋានកម្ពុជាត្រួតពិនិត្យទំនិញនីហរ័ណ-អាហរ័ណ និងបង្ក្រាបការក្លែងបន្លំ ដែលគេហៅថា កាំកុងត្រូល នៃក្រសួងពាណិជ្ជកម្ម ត្រូវបានយកចិត្តទុកដាក់យ៉ាងខ្លាំង ។ ហើយថ្មីៗនេះសាខាកាំកុងត្រូលនៃបណ្តាខេត្ត-រាជធានីបានផ្តោតជាសំខាន់បញ្ជាក់អំពីការព្រួយបារម្ភចំពោះសុខភាពកុមារ ដែលជាគោលដៅងាយរងគ្រោះ ដូច្នេះត្រូវតែចុះត្រួតពិនិត្យការលក់ដូរចំណីអាហារ នៅតាមសាលារៀននានាទូទាំងប្រទេស ។
លោក លិញ សុវឌ្ឍនា មន្ត្រីសាខាកាំកុងត្រូលខេត្តសៀមរាប បានឲ្យដឹងនៅក្នុងពេលដែលលោកបានដឹកនាំក្រុមការងារចុះត្រូតពិនិត្យរកមើលចំណីអាហារដែលពុំមានសុវត្ថិភាព និងមិនសមស្របសម្រាប់កុមារបរិភោគនៅសាលាបឋមសិក្សាវត្តបូព៌ ក្រុងសៀមរាប ថា ការងារនេះត្រូវបានរួមសហការជាមួយមន្ទីរពាណិជ្ជកម្មខេត្ត និងមានការគាំទ្រដោយលោកនាយកសាលាផងដែរ ។ លោកបានបន្តថា វាពិតណាស់ការរកមើលចំណីអាហារ ដែលគេសង្ស័យថាត្រូវបានផលិតចេញពីសារធាតុប្លាស្ទីក វាជាប្រធានបទក្តៅ ក៏ប៉ុន្តែប្រការផ្សេងៗទៀតក៏ជាបញ្ហាសំខាន់ផងដែរ ឲ្យតែវាមានផលប៉ះពាល់ដល់សុខភាពកុមារ ដូចជាចំណីអាហារ ដែលពុំមានស្លាកសញ្ញាសំគាល់ប្រភពផលិត, អាហារហួសកាលបរិច្ឆេទប្រើប្រាស់ និងអាហាររក្សាទុកមិនបានល្អជាដើម ។
លោក លិញ សុវឌ្ឍនា បានបន្តទៀតថា វាគ្រាន់តែជាការសង្ស័យប៉ុណ្ណោះ គឺពុំមែនជាការសន្និដ្ឋាននោះទេ ។ លោកបានបញ្ជាក់ថា ផលិតផលចំណីអាហារដែលយើងសង្ស័យនេះត្រូវបានដកហូតចំនួន៣កញ្ចប់តូច ដើម្បីបញ្ជូនទៅមន្ទីរពិសោធន៍នៅឯភ្នំពេញ ប៉ុន្តែ ចំណីអាហារប្រភេទបង្គាគ្រឿងបំពងនោះត្រូវបានសាខាកាំកុងត្រូលខេត្តសៀមរាបឲ្យផ្អាកការលក់ដូរជាបណ្តោះអាសន្នសិន ហើយលោកក៏បានផ្តល់នូវការណែនាំសម្រាប់សាលា និងអ្នកលក់ដូរចំណីឲ្យកុមារនៅក្នុងសាលារៀននោះថា ពពួកចំណីអាហារដែលវេចខ្ចប់ពុំមានស្លាកសញ្ញាត្រឹមត្រូវនោះត្រូវតែបញ្ឈប់ជាដាច់ខាត កុំឲ្យមានការយកមកលក់ដូរឲ្យកុមារ តទៅទៀត ៕
ចែករំលែកព័តមាននេះ