ខេត្តប៉ៃលិន ៖ បញ្ហាចម្រូងចម្រាស់បានកើតឡើងសារជាថ្មីម្តងទៀតរវាងក្រុមអាជីវករចំនួនជាង៧០តូបក្នុងចំណោម១៧០តូបបាននាំគ្នាប្រឆាំងតវ៉ាប្រឆាំងជាមួយនឹងម្ចាស់ផ្សារប៉ាងរលឹមម្នាក់ ខណៈម្ចាស់ផ្សាររូបនេះបានបំពានទៅលើកិច្ចសន្យាថ្លៃជួលតូបកាលពីឆ្នាំ២០១៤កន្លងទៅ
ខេត្តប៉ៃលិន ៖ បញ្ហាចម្រូងចម្រាស់បានកើតឡើងសារជាថ្មីម្តងទៀតរវាងក្រុមអាជីវករចំនួនជាង៧០តូបក្នុងចំណោម១៧០តូបបាននាំគ្នាប្រឆាំងតវ៉ាប្រឆាំងជាមួយនឹងម្ចាស់ផ្សារប៉ាងរលឹមម្នាក់ ខណៈម្ចាស់ផ្សាររូបនេះបានបំពានទៅលើកិច្ចសន្យាថ្លៃជួលតូបកាលពីឆ្នាំ២០១៤កន្លងទៅ ដោយមិនទាន់ផុតកំណត់ផង ស្រាប់តែដំឡើងថ្លៃតូបខ្ពស់កប់ពពក មិនអាចទទួលយកបាន ។ ហេតុការណ៍ផ្ទុះការប្រឆាំងតវ៉ានេះបានកើតឡើងកាលពីព្រឹកថ្ងៃទី៣០ ខែកក្កដា ឆ្នាំ២០១៥ ស្ថិតនៅមុខបរិវេណផ្សារប៉ាងរលឹម សង្កាត់អូរតាវ៉ៅ ក្រុងប៉ៃលិន ខេត្តប៉ៃលិន ។
ប្រភពព័ត៌មានពីអាជីវករបានឱ្យដឹងថា ម្ចាស់ផ្សារប៉ាងរលឹមឈ្មោះលោកស្រី ឃុត សុធាវី ហៅចែស្រី អាយុ៥០ឆ្នាំ រស់នៅភូមិអូរតាពុកលើ សង្កាត់ប៉ៃលិន ក្រុងប៉ៃលិន ពិតជាបានបំពានទៅលើកិច្ចសន្យាជួលតូបលក់ដូរ ដែលអាជ្ញាធរសង្កាត់អូរតាវ៉ៅបានដោះស្រាយរួចរាល់អស់ហើយកាលពីឆ្នាំ២០១៤កន្លងទៅមែន ខណៈសម្របសម្រួលសុំមិនឱ្យម្ចាស់ផ្សាររុះរើតូប ឬដំឡើងថ្លៃតូបរហូតដល់ថ្ងៃទី១៧ ខែធ្នូ ឆ្នាំ២០១៥ ទើបអាចពិភាក្សាកែប្រែច្បាប់សារជាថ្មីឡើងវិញ ពោលគឺគ្រាន់តែដំឡើងថ្លៃតូបបន្តិចបន្តួចប៉ុណ្ណោះ បើពីមុនធ្លាប់បង់ឱ្យគាត់(ចែស្រី) ១តូបក្នុង១ខែ៣ម៉ឺន៥ពាន់រៀល ក្រោយមកបង់៤ម៉ឺនរៀល បើធ្លាប់បង់៤ម៉ឺនរៀល ត្រូវបង់៤ម៉ឺន៥ពាន់រៀលប៉ុណ្ណោះ ប៉ុន្តែមិនទាន់ផុតកាលកំណត់ផង ស្រាប់តែគាត់ប្រែក្រឡាស់ ដោយទារឱ្យអាជីវករម្នាក់ៗបង់ប្រាក់ក្នុង១តូបរយៈពេល១ឆ្នាំ១លានរៀល ដោយគិតចាប់ពីថ្ងៃទី៣០ ខែកក្កដា ឆ្នាំ២០១៥នេះតទៅ ។ ដូច្នេះពួកគាត់បានតវ៉ា និងបានធ្វើលិខិតឡើងទៅសាលាខេត្តរួចរាល់អស់ហើយ ។
លោក ឡោ ធន ចៅសង្កាត់រងអូរតាវ៉ៅបានឱ្យដឹងថា កាលពីមុន លោកបានធ្វើការដោះស្រាយវិវាទរវាងអាជីវករ និងម្ចាស់ផ្សាររួចរាល់ហើយ ដោយមាន២ចំណុចដែលម្ចាស់ផ្សារបានលើកឡើងដាក់ឱ្យអាជីវករជ្រើសរើស ទី១-ម្ចាស់ផ្សារសុំឱ្យអាជីវករបង់ថ្លៃតូបឱ្យគាត់ក្នុងរយៈពេល៥ឆ្នាំ តម្លៃ១ពាន់ដុល្លារ ទី២- សុំឱ្យបង់ថ្លៃជួលតូបខ្ពស់ជាងឆ្នាំមុនៗបន្តិច ដោយកុងត្រារយៈពេល១ឆ្នាំម្តងៗ ។
លោកបានបន្តទៀតថា បន្ទាប់ពីធ្វើការសម្របសម្រួលគ្នាជាច្រើនម៉ោងរួចមក អាជីវករបានឯកភាពគ្នាជាមួយម្ចាស់ផ្សារ គឺពួកគេព្រមទទួលយកត្រង់ចំណុចទី២ ហើយម្ចាស់ផ្សារក៏បានសន្យាថា នឹងមិនរុះរើតូបចាស់របស់អាជីវករឆាប់ៗនោះទេ ដោយឱ្យលក់ដូររហូតដល់ចប់កិច្ចសន្យានៅឆ្នាំ២០១៥ខាងមុខនេះ លុះបន្ទាប់ពីគាត់សាងសង់តូបថ្មីនៅខាងមុខ និងខាងក្រោយរួចរាល់ គាត់ត្រូវឱ្យអាជីវករទៅលក់នៅក្នុងតូបនោះបណ្តោះអាសន្នសិន ដើម្បីរុះរើតូបចាស់ធើ្វសារជាថ្មីតាមលក្ខណៈស្តង់ដារ ហើយគាត់នឹងត្រូវឱ្យចូលមកលក់ដូរបន្តដូចមុន តែត្រូវនិយាយថ្លៃគ្នាបន្តទៀត ។
លោកបានបញ្ជាក់ទៀតថា មិនទាន់ផុតកាលកំណត់ផង ស្រាប់តែម្ចាស់ផ្សារឱ្យអាជីវករបង់ប្រាក់ថ្លៃជួលតូបគិតចាប់ពីថ្ងៃទី៣០ ខែកក្កដា ឆ្នាំ២០១៥នេះ ដោយម្នាក់ៗត្រូវបង់១ឆ្នាំតម្លៃ១លានរៀល ទើបអាជីវករមិនសុខចិត្ត ។
សូមបញ្ជាក់ថា កាលពីថ្ងៃទី២៥ ខែវិច្ឆិកា ឆ្នាំ២០១៤កន្លងទៅ អាជីវករចំនួន៧៦នាក់ក្នុងចំណោម១៧០នាក់ ដែលប្រកបអាជីវកម្មនៅផ្សារប៉ាងរលឹម បាននាំគ្នាផ្តិតមេដៃសុំឱ្យអាជ្ញាធរភូមិ និងសង្កាត់ជួយអន្តរាគមន៍ ដើម្បីកុំឱ្យលោកស្រី ឃុត សុធាវី ហៅចែស្រី ជាម្ចាស់ផ្សារធ្វើការរុះរើតូបដែលជួលឱ្យពួកគាត់ធ្វើសារជាថ្មីឡើងវិញ ព្រោះពួកគាត់ម្នាក់ៗបានចងការប្រាក់អង្គការ និងធនាគារអស់ជាច្រើនយកមកធ្វើតូបដោយខ្លួនឯង មិនទាន់សងថ្លៃជំពាក់គេរួចនៅឡើយទេ ៕
ចែករំលែកព័តមាននេះ