ខេត្តបន្ទាយមានជ័យ ៖ លោក ហ៊ុន ម៉ានិត បានដាស់តឿនដល់កម្លាំងដែលឈរជើងតាមបន្ទាត់ព្រំដែន ត្រូវការពារព្រំដែន និងការពារបងប្អូនចំណាកស្រុកខុសច្បាប់ ។ លោកលើកឡើងបែបនេះក្នុងពិធីបិទវគ្គហ្វឹកហ្វឺនលំហាត់យុទ្ធដំណើរទ័ពនៅថ្ងៃទី២៨ កក្កដា ២០១៥នេះ នៅទីបញ្ជាការវរសេនាតូចលេខ៥១៣ ទីតាំងភ្នំក្លែងពណ៌ ស្ថិតក្នុងឃុំតាបែន ស្រុកស្វាយចេក ខេត្តបន្ទាយមានជ័យ ។
លោក គោស៊ុំ សារឿត អភិបាលខេត្តបន្ទាយមានជ័យបានមានប្រសាសន៍ថា ការបិទវគ្គហ្វឹកហ្វឺនលំហាត់យុទ្ធដំណើរទ័ពអន្តរាគមន៍វាយបកទីតាំងភ្នំក្លែងពណ៌ TA(663-266) របស់វរសេនាតូចលេខ៥១៣ ចំណុះកងពលតូចថ្មើរជើងលេខ៥១ ដែលមានសិក្ខាកាមចំនួន៤៨០នាក់ សិក្សារយៈពេល៣ថ្ងៃ ដែលចែកជាពីរមុខព្រួញយុទ្ធដំណើរ និងវាយបក គឺយុទ្ធដំណើរទ័ពវរសេនាតូចលេខ៥១៣ ដែលមានសិក្ខាចំនួន២៤០នាក់ និងវរសេនាតូចលេខ៥១៤ មានសិក្ខាសាលាចំនួន២៤០នាក់ ។
លោក ហ៊ុន ម៉ានិត នាយករងខុទ្ទការល័យសម្តេចតេជោ ហ៊ុន សែន បានមានប្រសាសន៍ថា ក្រោយពេលទទួលវគ្គហ្វឹកហ្វឺនលំហាត់យុទ្ធដំណើរទ័ពអន្តរាគមន៍វាយបកទីតាំងភ្នំក្លែងពណ៌នេះ គឺក្រោយពេលបញ្ចប់វគ្គត្រូវយកចិត្តទុកការពារបូរណភាពទឹកដី និងការពារសន្តិសុខប្រទេស និងសុវត្ថិភាពប្រជាពលរដ្ឋតាមជាយដែន ។
លោកបានលើកឡើងអនុសាសន៍សម្តេចតេជោ ហ៊ុន សែន ថា មានអភិបាលខេត្តខ្លះដឹងខ្លួនជិតចូលនិវត្តន៍ ចង់លេងមួយគ្រប បើដឹងខ្លួនគួរតែកែ គឺពេលនៅឱ្យគេស្រលាញ់ ពេលចេញឱ្យគេនឹកអាណិត មិនត្រូវធ្វើខ្លួនពេលចេញឱ្យគេស្អប់នោះទេ ។
លោក ហ៊ុន ម៉ានិត បានដាក់វិធានការដល់កម្លាំងយោធាត្រូវសហការជាមួយសមត្ថកិច្ច និងមន្ត្រីជំនាញ ទប់ស្កាត់ទំនិញគេចពន្ធកន្លងមក ដែលឃាត់ម៉ូតូគេចពន្ធចំនួន៤៧គ្រឿងត្រូវវែកមុខចាប់ឈ្មួញរកស៊ី និងមានវិធានការចំពោះអ្នករត់ការល្មើសច្បាប់ ដែលល្មើសអំពើគេចពន្ធ ។ ត្រូវចូលរួមទប់ស្កាត់ពលករចំណាកស្រុកខុសច្បាប់ និងថៃចូលមកកម្ពុជាតាមព្រំដែនដោយខុសច្បាប់ ដើម្បីការពារសន្តិសុខតាមបន្ទាត់ព្រំដែន ៕
ចែករំលែកព័តមាននេះ