រាជធានីភ្នំពេញ ៖ មានករណីរថយន្តសណ្តោងកុងតឺន័រមួយគ្រឿងបានបើកក្នុងល្បឿនលឿនបុកនិងកិនបុរសម្នាក់កំពុងដើរឆ្លងផ្លូវអូសជិត៥០ម៉ែត្រ បណ្តាលឲ្យបែកក្បាលធ្លាយខួរ ដាច់សាច់ជាបំណែកៗ បាត់បង់ជីវិតយ៉ាងអាណោចអាធ័មនៅកណ្តាលផ្លូវ ដោយមើលសពលែងស្គាល់ទៅហើយ ដែលហេតុការណ៍នេះបានកើតឡើងកាលពីវេលាម៉ោង១០និង២០នាទីយប់ថ្ងៃទី២១ ខែមករា ឆ្នាំ២០២១ នៅចំណុចទល់មុខច្រកចូលចូលបុរីជីបម៉ុង ផ្លូវ៣៧១ សង្កាត់បឹងបឹងទំពុន២ ខណ្ឌមានជ័យ រាជធានីភ្នំពេញ ។
ក្រោយពេលកើតហេតុ គេឃើញកម្លាំងសមត្ថកិច្ចមូលដ្ឋានក៍ដូចជាជំនាញចរាចរណ៍បានចុះទៅកន្លែងកើតហេតុ ហើយក៍បានទំនាក់ទំនងហៅសាច់ញាតិដែលនៅក្បែរនោះស្រាប់ អោយមកទទួលយកសពទៅតម្កល់ធ្វើបុណ្យនៅវត្តឬស្សីសាញ់ ក្នុងខណ្ឌដង្កោ ។
អ្វីដែលគួរឲ្យចាប់អារម្មណ៍ពាក់ព័ន្ធនឹងករណីគ្រោះថ្នាក់ចរាចរណ៍ខាងលើនោះ គឺនៅពេលដែលសាច់ញាតិទៅទទួលសពយកទៅធ្វើបុណ្យក៏មិនបានចាប់អារម្មណ៍ពិនិត្យមើលឲ្យច្បាស់លាស់ដែរ ដោយសារសពត្រូវរថយន្តកិនបែកខ្ទេចមុខមើលលែងស្គាល់ទៅហើយ លុះពេលសមត្ថកិច្ចទាក់ទងទៅសាច់ញាតិក៏បានមកទទួលយកសពទៅរៀបចំធ្វើបុណ្យនៅវត្តឬស្សីសាញ់ទាំងយប់ ខណៈពេលដែលសាច់ញាតិកំពុងតែរៀបចំធ្វើបុណ្យតាមប្រពៃណី ។
ស្រាប់តែនៅវេលាម៉ោង៤ទៀបភ្លឺថ្ងៃទី២២ ខែមករា ក៏ប្រទះឃើញបុរសម្នាក់ដែលសមត្ថកិច្ចអះអាងថាបានបាត់បង់ជីវិតក្នុងហេតុការណ៍គ្រោះថ្នាក់ចរាចរណ៍ខាងលើនោះបានដើរត្រឡប់មកផ្ទះវិញ ធ្វើឲ្យសាច់ញាតិភ័យគ្រប់គ្នា ព្រោះស្មានតែខ្មោចលង តែតាមការពិតបុរសរូបនោះមិនបានបាត់បង់ជីវិតនោះទេ គឺដោយសារសមត្ថកិច្ចទាក់ទងទៅសាច់ញាតិខុស ដោយឡែកជនរងគ្រោះដែលបាត់បង់ជីវិតខាងលើនោះទំនងគឺជាជនមានសតិមិនគ្រប់ ។ ទោះបីជាយ៉ាងណា សាច់ញាតិដែលរៀបចំធ្វើបុណ្យច្រឡំសពនោះនៅតែបន្តធ្វើបុណ្យនៅវត្តឬស្សីសាញ់ ដើម្បីបង្គ្រប់កិច្ចមួយព្រឹកទៀតឲ្យចប់រួចរាល់តែម្តង ។
តាមប្រភពព័ត៌មានពីកន្លែងកើតហេតុបានអោយដឹងថា មុនពេលកើតហេតុ គេបានឃើញ បុរសម្នាក់មិនស្គាល់អត្តសញ្ញាណទំនងជាមានសតិមិនគ្រប់ បានស្លៀកកន្សែងពោះគោ ដើរឆ្លងផ្លូវ៣៧១ ក្នុងទិសដៅពីជើងទៅត្បូង លុះឆ្លងបានបន្តិច ក៍ស្រាប់តែមាន រថយន្តសណ្តោងកុងតឺន័រមួយគ្រឿងម៉ាកហ៊ីយ៉ាន់ដាយ ពណ៌ខៀវ ពាក់ស្លាកលេខ ភ្នំពេញ 3B 3934 បានធ្វើដំណើរតាមបណ្ដោយផ្លូវ៣៧១ ទិសដៅពីកើតទៅលិច ក្នុងល្បឿនលឿនជ្រុលទៅបុកកិនជនរងគ្រោះ អូសចូលក្រោមរថយន្តជិត៥០ម៉ែត្រ បណ្ដាលឲ្យជនរងគ្រោះ បែកក្បាលធ្លាយខួរ ដាច់សាច់ជាបំណែកៗបាត់បង់ជីវិតយ៉ាងអាណោចអាធ័មនៅកណ្តាលផ្លូវតែម្ដង ។
តាមប្រភពខាងលើបានបន្តថា បន្ទាប់ពីកើតហេតុ អ្នកបើកបរបានឈប់រថយន្ដកុងតឺន័រនៅកណ្តាលផ្លូវ ហើយរត់គេចខ្លួនបាត់ស្រមោល ដោយបន្សល់ទុករថយន្តកុងតឺន័រចោលនៅកន្លែងកើតហេតុធ្វើឲ្យស្ទះចរាចររាប់ម៉ោង ។
ក្រោយពេលកើតហេតុ រថយន្តកុងតឺន័រត្រូវបានសមត្ថកិច្ចជំនាញចរាចរណ៍ក្រុងធ្វើការវាស់វែងយកទៅរក្សាទុកនៅការិយាល័យនគរបាលចរាចរណ៍ជើងគោក នៃស្នងការរាជធានីភ្នំពេញ ដើម្បីរង់ចាំធ្វើការដោះស្រាយគ្នានៅពេលក្រោយជាបន្តទៀត ៕
ចែករំលែកព័តមាននេះ