ខេត្តបន្ទាយមានជ័យ ៖ លោកយាយអាយុ៩៥ឆ្នាំម្នាក់ ពិការជើងទាំងសងខាង រស់នៅភូមិស្រះភ្លោះ ឃុំតាគង់ ស្រុកម៉ាឡៃ ខេត្តបន្ទាយមានជ័យ គ្មានកូនចៅជាទីពឹងនឹងគេ រស់នៅបានដោយសារអ្នកដទៃជួយយកអាសាចិញ្ចឹមបីបាច់ថែរក្សាដូចជាម្តាយបង្តើត ឬជីដូន អំពាវនាវរកសប្បុរសជនជួយ ។
ខេត្តបន្ទាយមានជ័យ ៖ លោកយាយអាយុ៩៥ឆ្នាំម្នាក់ ពិការជើងទាំងសងខាង រស់នៅភូមិស្រះភ្លោះ ឃុំតាគង់ ស្រុកម៉ាឡៃ ខេត្តបន្ទាយមានជ័យ គ្មានកូនចៅជាទីពឹងនឹងគេ រស់នៅបានដោយសារអ្នកដទៃជួយយកអាសាចិញ្ចឹមបីបាច់ថែរក្សាដូចជាម្តាយបង្តើត ឬជីដូន អំពាវនាវរកសប្បុរសជនជួយ ។
តាមការឲ្យដឹងពីលោកអនុសេនីយ៍ឯក គា មុន្នីនិត្យ នាយប៉ុស្តិ៍រដ្ឋបាលនគរបាលតាគង់ បានឲ្យដឹងថា នៅថ្ងៃទី២៥ ខែកក្កដា ឆ្នាំ២០១៥ ខណៈពេលដែលលោកបានចុះសម្រង់ស្ថិតិផ្ទះប្រក់ដំបូលស្បូវ ក្នុងឃុំតាគង់ ដែលជាគោលការណ៍របស់លោកឧបនាយករដ្ឋមន្ត្រី កែ គឹមយ៉ាន ប្រធានអាជ្ញាធរជាតិប្រយុទ្ធប្រឆាំងគ្រឿងញៀន ជាប្រធានក្រុមការងារថ្នាក់ជាតិចុះជួយខេត្តបន្ទាយមានជ័យនេះ ។ លោកបានធ្វើដំណើរទៅភូមិស្រះភ្លោះ ដែលមានចម្ងាយ១២គីឡូម៉ែត្រពីឃុំតាគង់ ស្រុកម៉ាឡៃ ខេត្តបន្ទាយមានជ័យ លោកបានជួបគ្រួសារមួយដែលមានប្តីឈ្មោះ ង៉ែត ធឿន អាយុ៥២ឆ្នាំ និងប្រពន្ធឈ្មោះ ម៉ាន វី អាយុ៤៥ឆ្នាំ គ្រួសារនេះជាគ្រួសារកសិករ រស់នៅភូមិស្រះភ្លោះ ឃុំតាគង់ ស្រុកម៉ាឡៃ បានរៀបរាប់ប្រាប់ថា លោកយាយដែលកំពុងអង្គុយនៅក្នុងខ្ទមដំបូលប្រក់ស្បូវនោះ គាត់ឈ្មោះ វ៉ាន់ ទូច អាយុ៩៥ឆ្នាំ ពិការជើងទាំងសងខាងដើរទៅណាមកណាមិនរួចទេ ។ កាលពីឆ្នាំ២០០៥(អាយុ៨០ឆ្នាំ) លោកយាយគាត់មិនដឹងជាមកពីណាទេ តាមការសួរនាំរបស់គាត់ទាំង២នាក់ប្តីប្រពន្ធនោះ លោកយាយបាននិយាយថា ម្តងស្រុកកំណើតគាត់នៅខេត្តសៀមរាប ម្តងថានៅល្វាសឿ ហើយបានមកសុំពួកគាត់ស្នាក់នៅជាមួយ កាលនោះគាត់នៅដើរបានតិចតួច ។ ដោយក្តីអាណិតអាសូរពួកគាត់ក៏យល់ព្រមឲ្យគាត់ស្នាក់នៅ និងថែទាំគាត់ដោយចាត់ទុកគាត់ជាជីដូន ឬ ម្តាយ ព្រមទាំងធ្វើខ្ទមឲ្យគាត់នៅក្បែរផ្ទះរបស់គាត់ ។ ម្យ៉ាងសព្វថ្ងៃនេះលោកយាយគាត់ពិការជើងទាំង២(ស្វិត) ទើបតែ៤-៥ឆ្នាំនេះទេគាត់មិនអាចដើរបាន តែភ្នែកគាត់មើលឃើញស្ទុងៗប៉ុណ្ណោះ។
លោកនាយប៉ុស្តិ៍រូបនោះបានបញ្ជាក់ថា តាមការសាកសួរពីបងស្រី ម៉ាន វី បាននិយាយថា គាត់បានសាកសួរពីរឿងកូនចៅរបស់គាត់ដែរតាំងពីគាត់មករស់នៅដំបូង តែលោកយាយបានប្រាប់គាត់ថា កូនគាត់ និងប្តីរបស់គាត់បានស្លាប់នៅក្នុងសម័យ ប៉ុល ពត អស់រលីងហើយ សព្វថ្ងៃនេះគាត់រស់នៅគ្មានទីពឹងស្នាក់អាស្រ័យទេ ។ ចំណែកលោកនាយប៉ុស្តិ៍បានសួរនាំគាត់ផ្ទាល់ លោកយាយក៏គាត់ឆ្លើយដូចដែលគាត់បាននិយាយប្រាប់ទៅបងស្រី ម៉ាន វី នោះដែរ ។
បច្ចុប្បន្នបងប្រុស ង៉ែត ធឿន និងបងស្រី ម៉ាន វី បានសំណូមពរដល់សប្បុរសជនជិតឆ្ងាយ ទាំងក្នុង និងក្រៅប្រទេស មេត្តាជួយផ្តល់ជាអំណោយសម្ភារថវិកា ជូនដល់លោកយាយ វ៉ាន់ ទូច ផង ដើម្បីជីវិតចុងក្រោយរបស់លោកយាយ បានស្គាល់នូវរសជាតិការហូបឆ្ងាញ់ ស្លៀកពាក់ល្អផងដែរ ៕
ចែករំលែកព័តមាននេះ