ឆ្នេរសមុទ្រ ជាកន្លែងលំហែកាយ មិនមែនសម្រាប់បង្អួតឡានទេ!
- ភ្នំពេញ
ខេត្តព្រះសីហនុ៖ អភិបាលខេត្តព្រះសីហនុ លោក គួច ចំរើន បានបង្ហោះតាមហ្វេសប៊ុកនូវរូបថត ២សន្លឹក ដែលមានឡានទំនើប ២គ្រឿង ត្រូវបានម្ចាស់បើកទៅចតនៅឆ្នេរសមុទ្រ…
ខេត្តព្រះសីហនុ៖ អភិបាលខេត្តព្រះសីហនុ លោក គួច ចំរើន បានបង្ហោះតាមហ្វេសប៊ុកនូវរូបថត ២សន្លឹក ដែលមានឡានទំនើប ២គ្រឿង ត្រូវបានម្ចាស់បើកទៅចតនៅឆ្នេរសមុទ្រ…
ខេត្តព្រះសីហនុ៖ អភិបាលខេត្តព្រះសីហនុ លោក គួច ចំរើន បានបង្ហោះតាមហ្វេសប៊ុកនូវរូបថត ២សន្លឹក ដែលមានឡានទំនើប ២គ្រឿង ត្រូវបានម្ចាស់បើកទៅចតនៅឆ្នេរសមុទ្រ ក្នុងខេត្តព្រះសីហនុ។ លោកអភិបាលខេត្ត បានលើកជាសំណួរយ៉ាងខ្លីថា តើនេះជាទង្វើឡូយឆាយ ឬអួតអាង ថោកទាប ប្រិយមិត្ត?
Status ប្រចាំថ្ងៃរបស់អភិបាលខេត្តព្រះសីហនុ កាលពីថ្ងៃទី១៩ ខែមករា ឆ្នាំ២០២១ ដូច្នេះ ត្រូវបានមហាជនយ៉ាងច្រើន បញ្ចេញទស្សនៈចម្រុះគ្នា។ មានការលើកឡើងថា ១/ ប្រហែលពួកគាត់មកពីខេត្តផ្សេង មិនបានដឹង ទើបបើកឡាន មកចតដល់មាត់ឆ្នេរ ២/ ប្រហែលមកពីមិនមានដាក់ស្លាកពាក្យ «ហាមចតយាន្តយន្ត/បើកបរលើមាត់ឆ្នេរ» និង៣/គួរតែចុះអប់រំផាកពិន័យជាប្រាក់… ដើម្បីជាគំរូរដល់អ្នកផ្សេងទៀត… ជាជាងថតបង្ហោះ facebook ទាំងសាមីខ្លួន មិនបានដឹងកំហុស។
ចំណែកអ្នកខ្លះទៀត លើកឡើងថា តាមស្តង់ដារ ទីកន្លែងកំសាន្តសាធារណៈ គឺត្រូវមានចំណតរថយន្តសាធារណៈ ឬចំណតឯកជន ឬចំណតរដ្ឋឯកជន សម្រាប់ភ្ញៀវទេសចរ ចតយានយន្ត ហើយកន្លែង ដែលមិនត្រូវបានអនុញ្ញាតអោយយានយន្តគ្រប់ប្រភេទចត គឺត្រូវតែមានកំណត់ដោយស្លាកសញ្ញាហាមឃាត់របស់ស្តាប័ន ឬអង្គភាព ដែលពាក់ព័ន្ធ ថែមទាំងផ្តល់ភាពជាក់លាក់អំពីរងការផាកពិន័យ នៃការចតយានយន្ត ដោយល្មើសទៅនឹងស្លាកសញ្ញា ក្នុងចំនួនទឹកប្រាក់យ៉ាងជាក់ច្បាស់។
ជាមួយគ្នានេះ ក៏មានអ្នក ដែលរស់នៅខេត្តព្រះសីហនុ លើកឡើងថា តាមបណ្តោយផ្លូវធ្វើថ្មីតាមឆ្នេរទាំងអស់ សុទ្ធតែមានចំណតសម្រាប់ចតរថយន្ត តែគ្រាន់តែអត់ទាន់មានផ្លាកសញ្ញាសំគាល់ចំណត សំរាប់ចតរថយន្ត។ តែទីតាំងចំណតមួយចំនួនធំ ត្រូវបានចត ដោយរម៉កលក់ដូរ ដែលធ្វើអោយមិនមានចំណតគ្រប់គ្រាន់ សំរាប់ចតរថយន្ត ហើយទីតាំងចតរថយន្ត មានចំនួនតិច ពេលមានពិធីបុណ្យម្តងៗ មានការកកស្ទះច្រើន ដោយសារខ្វះចំណត សំរាប់ចតរថយន្ត ដែលបណ្តាលអោយមានការចតលើផ្លូវ។ អាជ្ញាធរគួរតែរៀបចំណត អោយបានច្រើនជាងនេះ និងធំជាងនេះ ដោយមានការសហការពីរដ្ឋ និងឯកជន ទើបបញ្ហាចំណត នឹងអាចដោះស្រាយបាន។
ក៏មានអ្នកខមមិនលើរូបថត និងstatus របស់អភិបាលខេត្តថា ធ្វើចឹងមិនសមសោះ ឡានគួរតែចតនៅកន្លែងចតឡានត្រឹមត្រូវ ជិះរហូតដល់ឆ្នេរបណ្តោយ ធ្វើចឹងគំរូមិនល្អដល់អ្នកដទៃ។
ចំពោះរូបថត ២សន្លឹកនេះ ក៏មានអ្នកបញ្ចេញមតិយោបល់ ដោយសម្តែងអារម្មណ៍ និងការមិនពេញចិត្ត ចំពោះទង្វើមិនល្អ ចំពោះម្ចាស់រថយន្តមួយគ្រឿងនេះ ហើយសូមសំណូមពរ ទៅដល់ប្រជាពលរដ្ឋទាំងអស់ថា ទីកន្លែងមាត់ឆ្នេរ គឺជាកន្លែង សម្រាប់ភ្ញៀវជាតិ និងអន្តរជាតិអង្គុយ ឬដេកលំហែកាយ មិនមែនជាកន្លែងសម្ញែងរថយន្តឡើយ។
លេខឡានឃើញច្បាស់ណាស់ ហៅគាត់ទៅសួរនាំ អប់រំទៅ ដើម្បីកុំអោយអ្នកដទៃទៀត យកគំរូតាម។ បើមើលទៅវាទាស់ភ្នែក កន្លែងខ្លះយើង ក៏គួរយល់ដែរថា តើសមគួរ ឬមិនសម ជាពិសេស ដូចជាម្ចាស់រថយន្ដម្នាក់នេះ មកពីគាត់ មិនបានយកការគិតមកដាក់ក្នុងចិត្ត តែសម័យបច្ចុប្បន្ននេះ មានមនុស្សខុសប្លែកជាងនេះច្រើនណាស់ ជាពិសេសអ្នកលក់ដូរតាមចិញ្ចើមផ្លូវ គឺជាអចិន្រ្ដៃតែម្ដង មិនដែលឃើញអាជ្ញាធណា យកភ្នែកមើលទេ និយាយរួមកន្លែងណា ក៏ដូចកន្លែងណា ជាពិសេសផ្លូវក្បែរផ្សារ ឬក៏អ្នកដែលមានផ្ទះត្រឹមត្រូវក៏ដោយ បើមានដាក់លក់អីវ៉ាន់ ដឹងតែលយចេញផុតមកលើចិញ្ចើមផ្លូវ រកតែដើរមិនរួច។ ដូច្នេះអាជ្ញាធរសមត្ថកិច្ច ក៏គួរតែរៀបចំសណ្តាប់ធ្នាប់តាមដងផ្លូវឲ្យប្រសើរផង។ នេះបើតាមការយល់ឃើញរបស់អ្នកមួយចំនួនទៀត។
ជាការពិតហើយ អ្នកបើកបរឡាន យកទៅចតលើឆ្នេរខ្សាច់ ដែលទើបតែរៀបចំថ្មី គឺពិតជាមិនសម ហើយមហាជនដោយច្រើន មិនគាំទ្រ និងបានរិះគន់ ហើយស្នើដល់អាជ្ញាធរសមត្ថកិច្ច ណែនាំអប់រំ ឈប់ឲ្យគាត់ធ្វើដូច្នេះទៀត។
ទន្ទឹមនឹងទង្វើមិនដឹងកំហុសនេះ អាជ្ញាធរសមត្ថកិច្ច ក៏គួរតែលើកស្លាកសញ្ញា ហាមបើកបរយានយន្តគ្រប់ប្រភេទ លើឆ្នេរខ្សាច់ ហើយនៅច្រកចេញចូលឆ្នេរខ្សាច់ ក៏គួរតែមានរបាខណ្ឌ ដោយសូម្បីតែម៉ូតូ ឬរ៉ឺម៉ងម៉ូតូ ក៏មិនអាចជិះចូលទៅឆ្នេរសមុទ្របានឡើយ។
ការរៀបចំចំណតឲ្យបានគ្រប់គ្រាន់ នៅតាមតំបន់ទេសចរណ៍ ពិសេសនៅតាមឆ្នេរសមុទ្រនេះ ក៏ត្រូវតែអាជ្ញាធរសមត្ថកិច្ច រៀបចំ សម្រាប់ឲ្យអ្នកទៅលេង យកយានយន្តរបស់ខ្លួន ទៅចត។ អាជ្ញាធរសមត្ថកិច្ច ក៏អាចរៀបចំកម្លាំង នៅយាមឡានម៉ូតូ យានយន្តរបស់អ្នកទៅលេងទាំងនោះ ដែលអាចធានាបានទាំងសុវត្ថិភាពផង និងបានទាំងចំណូលមួយផ្នែកណានោះ អាចដោះស្រាយបាយទឹកដល់កងកម្លាំង អ្នកយាម សម្រួលចរាចរណ៍ សណ្តាប់ធ្នាប់ ថែរក្សាអនាម័យនៅតំបន់ទាំងនោះថែមទៀត។
ម្យ៉ាងទៀត នៅតំបន់ឆ្នេរ ឬក៏នៅតំបន់ទេសចរណ៍ផ្សេងទៀត ក៏ត្រូវតែមានរៀបចំកងកម្លាំងអាជ្ញាធរសមត្ថកិច្ច ឬប្រជាសហគមន៍ ដើម្បីការពារសុខសុវត្ថិភាព ការពារយានយន្តផង និងដើម្បីសម្រួលចរាចរណ៍ សណ្តាប់ធ្នាប់ នៃការធ្វើដំណើរ ក៏ដូចជាការចតយានយន្ត ផងដែរ។
នៅពេលមានអ្នកចតខុសចំណត ឬក៏កកស្ទះចរាចរណ៍ ឬក៏មានការចតមិនមានរបៀបរៀបរយ ក៏ក្រុមអាជ្ញាធរសមត្ថកិច្ច កងកម្លាំង ឬក៏ប្រជាសហគមន៍នោះ អាចសម្រួល និងជម្រាបឲ្យម្ចាស់យានយន្ត យកយានយន្តរបស់ខ្លួន ទៅចត និងបើកបរមានសណ្តាប់ធ្នាប់ដែរ។
ម្ចាស់យានយន្តខ្លួនឯង ក៏គួរតែយល់ដឹង និងចេះខ្មាស់ខ្លួនឯង ដោយមិនត្រូវបើកបរនៅកន្លែងហាមឃាត់ ដូចជា លើសួនច្បារ ឬលើឆ្នេរដូច្នេះឡើយ។ ផ្លូវគេមានរៀបចំត្រឹមត្រូវ ហើយចំណតក៏មានទៀត។ បើចង់បើកផ្លូវ off road សម្រាប់សាកឡានខ្ពស់ៗរបស់ខ្លួន ក៏គួរតែរកផ្លូវដី ព្រៃភ្នំ ដែលមិនខ្វះឯណា នៅស្រុកយើងនោះ មិនចាំបាច់អីដល់ទៅឆ្នេរសមុទ្រឡើយ។
ពេលនេះ ត្រូវគេថតបង្ហោះហ្វេសប៊ុក ហើយត្រូវគេហៅទៅអប់រំណែនាំ ធ្វើកិច្ចសន្យាទៀត តើសមមុខទេ ដែលមានលុយទិញឡានទំនើប ថ្លៃរាប់ម៉ឺនដុល្លារហើយ បែរជាត្រូវគេលើកឡើងថា ចរិតមិនថ្លៃដូចឡានដូច្នេះនោះ?
ដូច្នេះមានតែការចូលរួមទាំងអស់គ្នាទេ។ ទាំងអាជ្ញាធរសមត្ថកិច្ចផង ទាំងប្រជាពលរដ្ឋ ជាម្ចាស់យានយន្តផង ដើម្បីសង្គមយើង មានរបៀបរៀបរយ និងជាគំរូល្អដល់កូនចៅ ក្មេងជំនាន់ក្រោយ ហើយក៏ដើម្បីឲ្យប្រទេសយើង មានសណ្តាប់ធ្នាប់ល្អនឹងគេ៕ ដោយ៖ មុត ស្រីពៅ
ចែករំលែកព័តមាននេះ