រាជធានីភ្នំពេញ ៖ សេចក្តីរាយការណ៍បានឱ្យដឹងថា ជនសង្ស័យប្រដាប់អាវុធម្នាក់បានធ្វើសកម្មភាពប្លន់ម៉ូតូមួយគ្រឿងម៉ាកឌ្រីមC125 ពណ៌ក្រហម ស៊េរី២០១៣ ពាក់ស្លាកលេខភ្នំពេញ១CS៤៤៤៩ ខណៈពេលម្ចាស់ជិះទៅចងគោ ហើយចតម៉ូតូចោលចម្ងាយ៤-៥ម៉ែត្រពីខ្លួននៅចំណុចភូមិស្នោ សង្កាត់ស្នោ ខណ្ឌពោធិ៍សែនជ័យ។
ក្រោយពីប្លន់ម៉ូតូឌ្រីមបានហើយជនសង្ស័យបានព្យាយាមជិះគេចខ្លួន ត្រូវម្ចាស់ម៉ូតូស្រែកឆោឡោផ្អើលដល់អ្នកភូមិ និងសមត្ថកិច្ចនាំគ្នាដេញប៉ផាប់ចាប់ពភីងរហូតដល់ភូមិត្រពាំងក្រសាំង ជនសង្ស័យភ័យពេកបានផ្តួលម៉ូតូចោលហើយផ្លោះរបងចូលក្នុងដីឡូត៍មួយកន្លែងដែលមានផ្ទះប្រជាពលរដ្ឋនៅក្នុងនោះ រួចធ្វើសកម្មភាពភ្ជង់ស្ត្រីម្នាក់កំពុងទិញបាយប្លន់យកម៉ូតូមួយគ្រឿងធុនC100 កូរ៉េ ពាក់ស្លាកលេខ១ថ៨៦៨៦ ភព១ ជិះគេចខ្លួនបាត់ស្រមោល។
ហេតុការណ៍នេះបង្កឱ្យមានការភ្ញាក់ផ្អើលកាលពីវេលាម៉ោង៧ និង៣០នាទីព្រឹក ថ្ងៃទី២៦ កក្កដា ២០១៥ ។
ជនរងគ្រោះជាម្ចាស់ម៉ូតូឌ្រីមឈ្មោះសឿន ភារុណ ភេទប្រុស អាយុ២៤ឆ្នាំ មានទីលំនៅភូមិខាងលើ ចំណែកជនរងគ្រោះជាម្ចាស់ម៉ូតូC100 កូរ៉េ ឈ្មោះសុខ ជា ភេទស្រី អាយុ៤៧ឆ្នាំ ស្នាក់នៅភូមិត្រពាំងក្រសាំង សង្កាត់ត្រពាំងក្រសាំង ខណ្ឌពោធិ៍សែនជ័យ។
ពេលនេះសមត្ថកិច្ចកំពុងស្រាវជ្រាវតាមប្រមាញ់ជនសង្ស័យយកមកផ្តន្ទាទោសតាមច្បាប់៕
ចែករំលែកព័តមាននេះ