យោងតាមគេហទំព័របរទេសGSMArena ឱ្យដឹងថាក្រុមហ៊ុន Microsoft នឹងបញ្ចេញស្មាតហ្វូន៣ម៉ូដែលទៀតនាពេលខាងមុខ ។ ក្រោយពីបាត់បង់ប្រាក់ចំណេញរហូតដល់ទៅរាប់លានដុល្លារពីការលក់ស្មាតហ្វូន Lumia កាលពីត្រីមាសទី១ឆ្នាំ ២០១៥ ក្រុមហ៊ុន Microsoft បានប្រកាសកាត់បន្ធយបុគ្គលិកផ្នែកគ្រឿងអេឡិចត្រូនិក ស្មាតហ្វូនចំនួនជាង៨ពាន់នាក់ឯណោះ ។
ក្រុមហ៊ុនមួយនេះកំពុងរៀបចំស្តារស្ថានភាពឱ្យល្អប្រសើរឡើងវិញតាមរយៈការបង្កើនចំនួនផលិតរបស់ខ្លួន ពោលគឺឱ្យសមស្របទៅនឹងទំហំទីផ្សារទូរស័ព្ទនាពេលបច្ចុប្បន្នដែលកំពុងហក់ឡើងខ្ពស់ ។
ស្មាតហ្វូនទាំង ៣ ម៉ូដែលនោះរួមមាន Lumia 550, 750 និង Lumia 850 ។ ពួកវាមានទំហំដូចគ្នាគឺ ៥ អីុញ ការពារដោយកញ្ចក់ Corning Gorilla Glass 3 និងទំហំ RAM ចំនួន១ ជីហ្គាបៃផងដែរ ។ ចំពោះស្មាតហ្វូនម៉ូដែល Lumia 550 មានកាមេរ៉ាមុខ ២ មេហ្គាភិចស៊ែល កាមេរ៉ាក្រោយ៥ មេហ្គាភិចស៊ែល ។ Lumia 750 កាមេរ៉ាមុខ ៥ មេហ្គាភិចស៊ែល កាមេរ៉ាក្រោយ ៨ មេហ្គាភិចស៊ែល ។ ចំណែកឯ Lumia 850 កាមេរ៉ាមុខ ៥ មេហ្គាភិចស៊ែល កាមេរ៉ាក្រោយ ១០ មេហ្គាភិចសែល ។
ក្រុមហ៊ុនមិនបានប្រកាសពីតម្លៃនៅឡើយទេ តែនឹងធ្វើសន្និសីទសារព័ត៌មានអន្តរជាតិពិភពលោកមួយស្តីពីការណែនាំផលិតជំនាន់ថ្មីរបស់ក្រុមហ៊ុនផងដែរ ៕
ចែករំលែកព័តមាននេះ