កាសែតឌឹណេស្សិនរបស់ថៃជាភាសាអង់គ្លេសនៅថ្ងៃទី២៦ មីនា ចេញផ្សាយព័ត៌មានដោយដកស្រង់សម្តីមន្ត្រីគណបក្សប្រជាធិបតេយ្យកំពុងកាន់អំណាចរបស់ថៃដែលថ្លែងថា កាលពីថ្ងៃទី២៥ មីនា សភាបានបើកកិច្ចប្រជុំតាមការគ្រោងទុករបស់ខ្លួនដើម្បីពិភាក្សាលើការអនុម័តកំណត់ហេតុរបាយការណ៍ចំនួន៣របស់គណៈកម្មាធិការព្រំដែនចម្រុះ (JBC) ប៉ុន្តែមិនទាន់បានបោះឆ្នោតអនុម័តលើកំណត់ហេតុទាំងនេះនៅឡើយទេ គឺរហូតដល់ថ្ងៃទី២៩ មីនា ខាងមុខ ។
តម្រូវដោយមាត្រាទី១៩០ នៃរដ្ឋធម្មនុញ្ញការបើកសម័យប្រជុំរួមគ្នារបស់សភា និងព្រឹទ្ធសភាថៃធ្វើឡើង ដើម្បីពិចារណា និងពិភាក្សាពីកំណត់ហេតុទាំង៣របស់ JBC ដើម្បីត្រួសត្រាយផ្លូវឱ្យ JBC បន្តបើកកិច្ចប្រជុំស្តីអំពីការកំណត់ព្រំដែនរវាងប្រទេសថៃ និងប្រទេសកម្ពុជា ។
នាយករដ្ឋមន្ត្រីថៃ លោកអាប់ភីស៊ីត វ៉េចាជីវ៉ា បានទទូចដល់សភាឱ្យប្រញាប់ផ្តល់ការអនុម័តលើកំណត់ហេតុទាំង៣របស់ JBC ដើម្បីបង្ហាញដល់សហគមន៍អន្តរជាតិថា យន្តការទំនាក់ទំនងទ្វេភាគីរវាងប្រទេសថៃ និងប្រទេសកម្ពុជាអាចដោះស្រាយជម្លោះរវាងប្រទេសទាំង២បាន ។
កាសែតឌឹណេស្សិនបានដកស្រង់សម្តីលោកអាប់ភីស៊ីត ដែលថ្លែងប្រាប់សភាថា «ប្រសិនបើយើងមិនអនុញ្ញាតឱ្យគណៈកម្មាធិការព្រំដែនចម្រុះ JBC បំពេញកាតព្វកិច្ចរបស់ខ្លួន ដោយសារកំណត់ហេតុរបស់ខ្លួនមិនទាន់ទទួលបានការអនុម័ត នោះសហគមន៍អន្តរជាតិមានដូចជាអង្គការសហប្រជាជាតិ និងអាស៊ានជាដើមនឹងព្យាយាមជាប់ពាក់ព័ន្ធជាមួយបញ្ហាជម្លោះរវាងថៃ និងកម្ពុជា» ។
កំណត់ហេតុរបាយការណ៍ទាំង៣របស់ JBC ត្រូវបានដាក់ជូនសភាថៃដើម្បីផ្តល់ការអនុម័តចាប់តាំងពីកិច្ចប្រជុំលើកចុងក្រោយរបស់ JBC កាលពីខែមេសា ឆ្នាំ២០០៩ កន្លងមក ហើយសភាថៃបានពន្យារពេលផ្តល់ការអនុម័តលើកំណត់ហេតុទាំងនេះរហូតដោយសារមានការប្រឆាំងតវ៉ាពីពួកជ្រុលនិយមសៀម ពិសេសក្រុមអាវលឿង ។
សភាថៃបានបើកកិច្ចប្រជុំស្តីពីការផ្តល់ការអនុម័តលើកំណត់ហេតុរបាយការណ៍ចំនួន៣របស់ JBC កាលពីថ្ងៃទី២៥ មីនា កន្លងមក តាមការគ្រោងទុករបស់ខ្លួន បើទោះបីជាក្រុមជ្រុលនិយមអាវលឿងគំរាមឡោមព័ទ្ធអគារវិមានរដ្ឋសភាក៏ដោយ ប៉ុន្តែមិនទាន់ផ្តល់ការអនុម័តលើកំណត់ហេតុរបស់ JBC ដដែល។ ទោះបីជាបែបណា ពុំមានប្រភពណាមួយបង្ហើបឱ្យដឹងពីមូលហេតុដែលនាំឱ្យសភាថៃពន្យារពេលផ្តល់ការអនុម័តលើកំណត់ហេតុរបាយការណ៍របស់ JBC ទៀតនោះទេ ៕
ចែករំលែកព័តមាននេះ