ផ្សារដើមគ ផ្សារចាស់ ផ្សារកណ្តាល ផ្សារទួលទំពូង ។ល។ ស្ថិតនៅចំកណ្តាលបេះដូងរាជធានីភ្នំពេញ…។ តាមដឹងទីតាំងផ្សារទាំងប៉ុន្មាននេះធំទូលំទូលាយ…ធំមហាសាល…។ ច្រើនឆ្នាំកន្លង…មានសេដ្ឋីច្រើននាក់ហើយបានមកចែចូវ…បបោសអង្អែលអាជ្ញាធរ ចង់យកទីតាំងផ្សារទាំងនេះដើម្បីរបស់ដែលហៅថា «អភិវឌ្ឍន៍»
សង់ជាផ្សារទំនើបទាន់សម័យ…ទំនើបមហាលោតផ្លោះ…កុំឱ្យវាគ្មានសណ្តាប់ធ្នាប់ដូចសព្វថ្ងៃ ។ល។
គំរូអាក្រក់ដែលចាត់ទុកជាមេរៀន…ជាបទពិសោធន៍របស់អាជីវករមានតូបលក់ដូរក្នុងផ្សារ ដូចជាបានចងចាំគ្រប់គ្នាហើយ…មិនចង់បានមេរៀនអាក្រក់ចាស់វិលវិញទៀតឡើយ ។
មេរៀនអាក្រក់នោះគឺ…មុនគេកើតមាននៅផ្សារអូឡាំពិក…សម័យទសវត្សឆ្នាំ៩០ កើតមានបាតុកម្មរាប់ខែ…ទម្រាំដោះស្រាយចេញ ។ ផ្សារដេប៉ូដែលគេថា ទំនើបនោះ ពេលសង់រួចក៏ផ្ទុះបាតុកម្មឡើងរញ្ជួយដែរ ។ល។ ទាំងផ្សារអូឡាំពិក ផ្សារអូរឫស្សី…ផ្សារដេប៉ូ…ពេលនេះមើលទៅដូចរោងដោល…វាមានទំនើបអីទៅ ?
ដោយសាររាងចាលនឹងហើយ…បានជាអាជីវករផ្សារដើមគ គ្រាន់តែឃើញគេមកវាស់វែងនាំគ្នាដេកអត់លក់…បាយមិនបានជាប់ជាងមួយអាទិត្យ…ទ្រាំអត់បានក៏លើកគ្នាមកសួរដល់សាលាក្រុងឱ្យដឹងស-ខ្មៅ…បញ្ចេញមតិវិញឱ្យស្រាលខ្លួន…ដាច់ខាតមិនឱ្យសាងសង់ថ្មីលើទីតាំងចាស់ !
ប៉ុណ្ណេះហើយ…ឈ្មួញមកពីឋានណាក៏អត់ហ៊ានឈរលេបទឹកមាត់ដាក់ផ្សារដើមគទៀតដែរ…ទោះបីរដ្ឋធ្វើដោយខ្លួនឯង ក៏អត់ហ៊ានដែរ…។ វាមកពីគំរូមិនល្អដែលបានចារទុកកន្លងមក…ដែលយើងមិនហ៊ានថា គំរូ«អាក្រក់ទេ» ៕
អាឡេវ
ចែករំលែកព័តមាននេះ