រាជធានីភ្នំពេញ ៖ កាលពីថ្ងៃទី២៤ កក្កដា ម្សិលមិញ ស្ថានីយទូរទស្សន៍អាស៊ីអាគ្នេយ៍បានរៀបចំកម្មវិធីសម្ពោធស្ថានីយផ្សាយបន្តផ្លូវការ បន្ទាប់ពីកែសម្រួលប្រព័ន្ធផ្សព្វផ្សាយឲ្យមានសក្តានុពលគ្របដណ្ដប់ទូទាំងប្រទេស ។ ការដំឡើងប្រព័ន្ធផ្សាយបន្តថ្មីនេះត្រូវគេមើលឃើញថា ស្របនឹងបរិបទដែលកីឡាករ២រូបគឺ ឃីម បូរ៉ា និងមាស ច័ន្ទមាន ហៀបនឹងឡើងប្រកួតដណ្ដើមខ្សែក្រវាត់គ្នាដ៏កក្រើកនៅសប្ដាហ៍ក្រោយ ។
លោកញាណ សុធី មន្ត្រីជាន់ខ្ពស់ប្រចាំស្ថានីយទូរទស្សន៍អាស៊ីអាគ្នេយ៍ ថ្លែងប្រាប់ថា មកទល់ពេលនេះ ស្ថាប័នរបស់លោកបានដំឡើងស្ថានីយផ្សាយបន្តនៅតាមខេត្ត-ក្រុងចំនួន១៣បន្ថែមហើយ ដោយមិនរាប់បញ្ចូលស្ថានីយទូរទស្សន៍ធំដែលស្ថិតនៅក្នុងរាជធានីភ្នំពេញទេ ។ តំបន់ដែលមានស្ថានីយទូរទស្សន៍ផ្សាយបន្តទាំងនោះរួមមាន ខេត្តព្រះសីហនុ ពោធិ៍សាត់ សៀមរាប បាត់ដំបង បន្ទាយមានជ័យ រតនគិរី ស្ទឹងត្រែង ក្រចេះ កំពត ស្វាយរៀង កំពង់ចាម កំពង់ធំ និងឧត្តរមានជ័យ ។ ក្នុងខេត្តចំនួន៥ទៀតរួមមាន មណ្ឌលគិរី ប៉ៃលិន ព្រះវិហារ កោះកុង និងកែប ក៏កំពុងដំណើរការសាងសង់រៀបនឹងដាក់ឲ្យដំណើរការដែរ ។ បន្ថែមពីការសាងសង់ស្ថានីយទូរទស្សន៍ផ្សាយបន្តដែលធ្វើឲ្យការផ្សាយចេញរូបភាពមានវិសាលភាពធំធេង លោកក៏អះអាងពីការដំឡើងប្រព័ន្ធផ្សាយដែលបំពាក់ឧបករណ៍ទំនើបៗ ដើម្បីឲ្យការចែកចាយរូបភាពពីស្ថានីយធំ គ្មានការរំខាន និងមានរូបភាពច្បាស់ត្រជាក់ភ្នែកនៅតាមស្រុកភូមិ និងខេត្តក្រុងនៅកម្ពុជា ។ មុនការប្រកាសជាផ្លូវការដាក់ឲ្យដំណើរការនូវស្ថានីយផ្សាយបន្តនេះ ក្រុមការងាររបស់លោក ក៏បានចាត់គ្នាទៅគ្រប់ខេត្ត-ក្រុងប្រកាសឲ្យដឹងពីរបៀបរាវរកប៉ុស្ដិ៍មួយនេះឲ្យមានលក្ខណៈច្បាស់ល្អនៅក្នុងខេត្ត-ក្រុងដែលមានស្ថានីយថ្មីទៅដល់ ។ លោកញាណ សុធី បន្តថា ការដាក់ឲ្យដំណើរការស្ថានីយផ្សាយបន្តដោយដំឡើងកម្លាំងផ្សាយកាន់តែទូលំទូលាយនៅទូទាំងប្រទេសនេះ ជាការឆ្លើយតបទៅនឹងកម្មវិធីដែលកាន់តែមានលក្ខណៈប្រកួតប្រជែង ជាពិសេសគឺព្រឹត្តិការណ៍ប្រដាល់នាពេលចុងក្រោយ ។ លោកបង្ហាញឲ្យឃើញពីសុទិដ្ឋិនិយមនៃការផ្សាយចេញរបស់ស្ថានីយទូរទស្សន៍អាស៊ីអាគ្នេយ៍អាចបញ្ជូនរូបភាពបានគ្រប់ខេត្ត-ក្រុង ស្របពេលដែលព្រឹត្តិការណ៍ដណ្ដើមខ្សែក្រវាត់រវាងកីឡាករ២រូបនឹងត្រូវធ្វើឡើង ។ អ្នករៀបចំការប្រដាល់ដែលធ្លាប់មានកេរ្តិ៍ឈ្មោះនៅប៉ុស្ដិ៍លេខ៥ រូបនេះនិយាយថា ៖ «ខ្ញុំថា ការដំណើរការស្ថានីយបន្តផ្ទាល់នៅតាមខេត្តហ្នឹង គឺដូចអបអរការប្រកួតដណ្ដើមខ្សែក្រវាត់របស់ ឃីម បូរ៉ា និងមាស ច័ន្ទមាន អញ្ចឹង ព្រោះព្រឹត្តិការណ៍ហ្នឹងខ្ញុំរៀបចំធ្វើឡើងនៅថ្ងៃទី១ ខែក្រោយ (សីហា) ហើយខ្ញុំរៀបចំឲ្យកក្រើក
អញ្ចឹងគឺល្អព្រោះចំពេលដែលទូរទស្សន៍អាស៊ីអាគ្នេយ៍ត្រូវគេមើលឃើញស្ទើរពេញប្រទេសល្មម!»។ បើទោះជាស្ថានីយទូរទស្សន៍អាស៊ីអាគ្នេយ៍ មានកម្មវិធីកម្សាន្ត កម្មវិធីអប់រំ និងព្រឹត្តិការណ៍ប្រដាល់ធំៗ ដែលចាត់ទុកជាស្ថាប័នទូរទស្សន៍មានលក្ខណៈប្រកួតប្រជែង ប៉ុន្តែលោកថា ការបញ្ជូនរូបភាពនៅកាន់បណ្ដាខេត្ត-ក្រុងមួយចំនួនមិនសូវល្អទេ នាពេលកន្លងមក។ អញ្ចឹងហើយទើបការដំឡើងស្ថានីយទូរទស្សន៍ផ្សាយបន្ត និងការប្រកាសឲ្យប្រើប្រាស់ប្រព័ន្ធផ្សាយរូបភាពថ្មីនេះជាចលករដែលអាចជួយឲ្យកម្មវិធីទាំងឡាយ ជាពិសេសព្រឹត្តិការណ៍ប្រដាល់ដែលលោកសម្រិតសម្រាំង នឹងមានប្រជាប្រិយភាព ។
កម្មវិធីសម្ពោធស្ថានីយផ្សាយបន្តកាលពីថ្ងៃម្សិលមិញបានធ្វើឡើងនៅក្នុងសណ្ឋាគារ Raffles Hotel Le Royal ដោយមានចាក់បង្ហាញពីសេវារបស់ប្រព័ន្ធថ្មី ដែលមានវិសាលភាពនៅពេញទូទាំងប្រទេស បើទោះជានៅខេត្តខ្លះនៅមិនទាន់មានស្ថានីយផ្សាយបន្តក្ដី ។ ដោយសារតែស្ថានីយផ្សាយបន្តមួយអាចចាប់រូបភាពហើយផ្សាយគ្របដណ្ដប់លើខេត្តជិតខាងបានដោយមិនពិបាក ។ ពិធីនេះមានការបង្ហាញឲ្យឃើញនូវកម្មវិធីខ្លាំងជាច្រើន ដែលក្នុងនោះព្រឹត្តិការណ៍ប្រដាល់ត្រូវគេឃើញមានការដាក់បង្ហាញស្ទើរច្រើនជាងគេ ដោយសារតែក្នុងមួយសប្ដាហ៍មានដល់ទៅ៤កម្មវិធី ដែលការប្រដាល់អន្តរជាតិក៏មានច្រើនជាងគេ និងមានការប្រកួតដណ្ដើមខ្សែក្រវាត់ចុងក្រោយ ក៏ចាត់ទុកជាព្រឹត្តិការណ៍រំជើបរំជួលរបស់អ្នកស្នេហាការប្រដាល់ដែរ ។ បន្ទាប់ពីការប្រកាសឲ្យប្រើស្ថានីយផ្សាយបន្តផ្លូវការ នៅពេលល្ងាចក៏មានវេទិកាចម្រៀងគគ្រឹកគគ្រេងចូលរួមដោយលោកខេមរៈ សិរីមន្ត លោកខេម កញ្ញាសុខ ពិសី កញ្ញាអុីវ៉ា និងក្រុមតារាចម្រៀងមកពីប្រទេសថៃប្រគំកំដរនៅស្ទីឌីយោចាប់ពីម៉ោង៦ល្ងាច ដល់ម៉ោង១០និង៣០នាទីយប់ និងមានអ្នកចូលរួមកុះករផងដែរ ។
លោកញាណ សុធី ប្រាប់ថា នេះជាសញ្ញាវិជ្ជមានដែលការប្រដាល់អន្តរជាតិរបស់ស្ថានីយទូរទស្សន៍អាស៊ីអាគ្នេយ៍កាន់តែមានវត្តមានកីឡាករល្អមកពីប្រទេសថៃ និងនៅកម្ពុជា ហើយក៏ចំពេលដែលកីឡាករឃីម បូរ៉ា និងកីឡាករមាស ច័ន្ទមាន ត្រូវវាយដណ្ដើមខ្សែក្រវាត់គ្នានៅថ្ងៃទី១ សីហា ។ លោកចាត់ទុកការបើកដំណើរការស្ថានីយផ្សាយបន្តថ្មី នឹងជួយឲ្យអ្នកទស្សនានៅទូទាំងប្រទេសអាចទស្សនាបានរូបភាពច្បាស់ត្រជាក់ភ្នែក ៕
ចែករំលែកព័តមាននេះ