ខេត្តបន្ទាយមានជ័យ ៖ សមត្ថកិច្ចថៃ និងសាច់ញាតិពលករខ្មែរម្នាក់ មានការភ្ញាក់ផ្អើល
យ៉ាងខ្លាំង ក្រោយពីពលករខ្មែរម្នាក់លង់ទឹកនិងសន្មតថា ស្លា.ប់រាប់ម៉ោងទៅហើយ ស្រាប់តែជីពចរដើរវិញ ។ ហេតុការណ៍នេះ កើតឡើងនៅឃុំទេពនិមិត្ត ស្រុកខៅសាក់មឹង ខេត្តត្រាត ប្រទេសថៃ កាលពីថ្ងៃទី១៦ ខែមករា ២០២១ ។
បើតាមការចុះផ្សាយរបស់គេហទំព័រនិងកាសែតក្នុងស្រុកថៃ បានឲ្យដឹងថា ពលករខ្មែរម្នាក់ដែលស៊ីឈ្នួលចាំចម្ការទុរេនឲ្យជនជាតិថៃនៅក្នុងឃុំខាងលើបានបាត់ខ្លួន ប៉ុន្តែដោយសារឃើញស្បែកជើងជនរងគ្រោះនៅមាត់ស្រះដ៏ធំ ម្ចាស់ចម្ការក៏ទាក់ទងទៅខាងក្រុមមុជទឹកនិងសមត្ថកិច្ចឲ្យជួយ ព្រោះសង្ស័យជនរងគ្រោះធ្លាក់ទឹកលង់ស្លា.ប់ ។បន្ទាប់ពីសមត្ថកិច្ចនិងក្រុមមុជទឹកចុះរាវរកក៏ប្រទះឃើញដូចកាសង្ស័យមែន ។ ពលករខ្មែរដែលលង់ទឹកនេះឈ្មោះ វីត អាយុជិត៤០ឆ្នាំ។
អ្វីដែលជាការភ្ញាក់ផ្អើលនោះ គឺក្រុមសាច់ញាតិបានទិញមឈូសត្រៀមដាក់សពរួចហើយ ប៉ុន្តែពេលសមត្ថកិច្ចដឹកជនរងគ្រោះទៅធ្វើកោសល្យវិច័យ ស្រាប់តែជីពចរដំណើរការវិញ ។ យ៉ាងណាក៏ដោយ ជនរងគ្រោះនៅតែមិនអាចសង្គ្រោះបាន បើទោះជាក្រុមសមត្ថកិច្ចថៃខំធ្វើចលនាឲ្យក៏ដោយ ពោលគឺជនរងគ្រោះនៅតែបាត់បង់ជីវិតដដែល ។
ដំបូងម្ចាស់ចម្ការសង្ស័យថា ជនរងគ្រោះអាចចុះទៅជួលជុលម៉ូទ័របូមទឹក ហើយត្រូវចរន្តភ្លើងឆក់ ប៉ុន្តែតាមការត្រួតពិនិត្យរបស់សមត្ថកិច្ចគឺពុំមានពាក់ព័ន្ធនឹងចរន្តអគ្គិសនីឆក់ឡើយ ។ ក្រោយពីធ្វើកោសល្យវិច័យរួច សមត្ថកិច្ចសន្និដ្ឋានថា ជនរងគ្រោះអាចខ្យល់គរដួលធ្លាក់ចូលស្រះ ក៏លង់ស្លា.ប់ដោយខ្លួនឯងពេលដើរនៅមាត់ស្រះ ៕
ចែករំលែកព័តមាននេះ