ខេត្តបន្ទាយមានជ័យ ៖ ដោយទទួលបានការយកចិត្តទុកនិងគិតគូរពីសំណាក់សម្តេចតេជោហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា នាព្រឹកថ្ងៃ ទី១៦ ខែមករា ឆ្នាំ២០២១ ដោយលោក ជិន ប៊ុនធឿន លេខានាយករដ្ឋមន្ត្រី និងជានាយករងរដ្ឋបាលរាជធានីភ្នំពេញ និងក្រុមការងារ បាននាំយកអំណោយដ៏ថ្លៃថ្លារបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី និងសម្តេចកិត្តិព្រឹទ្ធបណ្ឌិត ប៊ុន រានី ហ៊ុន សែន ជាគឿងឧបភោគ បរិភោគ សម្លៀកបំពាក់ សម្ភារៈប្រើប្រាស់ក្នុងផ្ទះ និងថវិកា៥០ម៉ឺនរៀល យកទៅប្រគល់ជូនលោកយាយជរាមួយរូប ដែលមានវ័យ១០១ឆ្នាំ រស់នៅជាមួយចៅស្រី អាយុ២៧ឆ្នាំ ជាស្ត្រីមេម៉ាយ ប្រកបរបររកស៊ីដាក់អង្គប់កណ្តុរ ចិញ្ចឹមកូនប្រុសតូចៗ២នាក់ រស់នៅភូមិសាយសាម៉ន ឃុំចំណោម ស្រុកមង្គលបូរី ខេត្តបន្ទាយមានជ័យ ក្នុងនោះសម្តេចទាំងទ្វេរនឹងជួយសាងសង់ផ្ទះទេវតាជូននាពេលឆាប់ៗនេះ។
នៅក្នុងពិធីប្រគល់អំណោយខាងលើនេះដែរ ក៏មានការចូលរួមពីលោក លី សារី អភិបាលរងខេត្ត និងជាប្រធានក្រុមការងារចុះជួយស្រុកមង្គលបូរី, លោកស្រី ហេង សុភ័ក្ត្រ អភិបាលរងស្រុកមង្គលបូរី លោកឃាម ចាន់ធា សមាជិកក្រុមប្រឹក្សាស្រុក និងជាក្រុមការងារស្រុកចុះជួយឃុំចំណោម និងអាជ្ញាធរមូលដ្ឋានឃុំផងដែរ ។
លោកយាយគឺម ឡាត់ បានប្រាប់ថា លោកយាយមានអាយុ១០១ ឆ្នាំ កូនចៅរបស់លោកយាយបានចែកឋានអស់ បច្ចុប្បន្នរស់នៅជាមួយចៅ ស្រី ឈ្មោះតឿម សេរី អាយុ២៧ឆ្នាំ ជាស្ត្រីមេម៉ាយ មានកូនប្រុសតូចពីរនាក់ ដោយដាក់អង្គប់កណ្តុរយកទៅលក់។
បើតាមការរៀបរាប់ពីស្ត្រីឈ្មោះតឿម សេរី ដែលត្រូវជាចៅស្រីរបស់លោកជរាខាងលើបានឱ្យដឹងថា ប្តីរបស់នាងធ្វើការនៅឯប្រទេសថៃ ពីមុនប្តីរបស់នាងតែងតែផ្ញើលុយកាក់បន្តិចបន្តួចមកឲ្យនាងចិញ្ចឹមកូននិងជីដូចចាស់ជរា ។ ប៉ុន្តែក្រោយពីប្តីនាងគេមានប្រពន្ធចុងមក គេលែងគិតគូរពីនាង និងកូនប្រុស២នាក់ ព្រមទាំងជីដូនចាស់ជរានេះទៀតហើយ តែដើម្បីរស់ នាងបាននាំកូនប្រុសច្បងមានអាយុ៣ឆ្នាំ ពេលយប់ដើរដាក់អង្គប់កណ្តរ ក្នុង១យប់បាន១គីឡូក្រាម ឬ២គីឡូក្រាម លក់បានពី៥ពាន់រៀលទៅ១ម៉ឺនរៀល ដើម្បីទិញអង្ករហូប ។
លោក ជិន ប៊ុនធឿន លេខានាយករដ្ឋមន្ត្រី និងជានាយករងរដ្ឋបាលរាជធានីភ្នំពេញ មានប្រសាសន៍ថា៖ដោយបានការយកចិត្តទុកដាក់ និងគិតគូរពីទុក្ខលំបាករបស់ប្រជាពលរដ្ឋ ថ្ងៃនេះ លោក និងក្រុមការងារ បាននាំយកអំណោយដ៏ថ្លៃថ្លារបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី និងសម្តេចកិត្តិព្រឹទ្ធបណ្ឌិត្យ ប៊ុន រានី ហ៊ុន សែន ជាគឿងឧបភោគ បរិភោគ សម្លៀកបំពាក់ សម្ភារៈប្រើប្រាស់ក្នុងផ្ទះ និងថវិកាចំនួន៥០ម៉ឺនរៀល ហើយក្នុងនោះសម្តេចទាំងទ្វេរនឹងជួយសាងសង់ផ្ទះទេវតាជូននាពេលឆាប់ៗនេះផងដែរ។
បន្ទាប់ពីទទួលអំណោយដ៏ថ្លៃថ្លាខាងលើរួចមក លោកយាយគឹម ឡាត់ បានថ្លែងនូវអំណរគុណយ៉ាងជ្រាលជ្រៅជូនចំពោះសម្តេចតេជោហ៊ុន សែន និងសម្តេចកិត្តិព្រឹទ្ធបណ្ឌិតប៊ុន រ៉ានី ហ៊ុន សែន សូមឲ្យសម្តេចទាំង២ រួមទាំងបុត្រា បុត្រី និងចៅៗរបស់សម្តេចមានសុខភាពល្អបរិបូរ កម្លាំងពលំមាំមួន និងជាម្លប់ដ៏ត្រជាក់របស់ប្រជាពលរដ្ឋ។
គួររំលឹកដែរថា៖ លោកយាយមានអាយុ១០១ឆ្នាំ និងចៅស្រីអាយុ២៧ឆ្នាំ ជាស្ត្រីមេម៉ាយ ដែលរកស៊ីដាក់អង្គប់កណ្តុរ ចិញ្ចឹមកូនប្រុសតូច០២នាក់ ធ្លាប់បានទទួលអំណោយពីរាជរដ្ឋាភិបាល តាមរយៈអាជ្ញាធរមូលដ្ឋានជាប្រចាំផងដែរ ៕ (កែសម្រួលដោយ ៖ ធីតា)
ចែករំលែកព័តមាននេះ