ខេត្តបន្ទាយមានជ័យ ៖ បើតាមសេចក្តីរាយការណ៍បានឱ្យដឹងថា បងប្អូនសាច់ញាតិដែលមកពីថៃ ហើយមិនព្រមចូលខ្លួនធ្វើចត្តាឡីស័ក១៤ថ្ងៃទេ រួចក៏ត្រឡប់ទៅផ្ទះវិញនោះ ត្រូវបានក្រុមការងារយករថយន្តសាមុយទៅដឹកទាំង៣គ្រួសារមកធ្វើចត្តាឡីស័កតែម្តង នៅថ្ងៃទី១៧ ខែមករា ឆ្នាំ២០២១ នៅមណ្ឌលចត្តាឡីស័កវិទ្យាល័យសម្តេចឪ ក្រុងសិរីសោភ័ណតែម្តង។
បើតាមលោក ហ៊ឹល រ៉ាយ៉ា អភិបាលក្រុងសិរីសោភ័ណ បានឱ្យដឹងថា អាជ្ញាធរមូលដ្ឋានភូមិ-សង្កាត់បានរាយការណ៍មកលោកថា មានបងប្អូនប្រជាពលរដ្ឋចំនួន៣នាក់បានត្រឡប់មកពីប្រទេសថៃ ហើយមិនបានចូលខ្លួនធ្វើចត្តាឡីស័ករយៈពេល១៤ថ្ងៃនោះទេ ។ ក្រោយពីទទួលព័ត៌មាននេះ ហើយជាការណែនាំពីអភិបាលខេត្តបន្ទាយមានជ័យ លោក អ៊ុ រាត្រី បានឱ្យក្រុមការងារយករថយន្តសាមុយ១គ្រឿងទៅដឹកទាំង៣គ្រួសារនៅភូមិព្រៃឫស្សី សង្កាត់ព្រះពន្លា ក្រុងសិរីសោភ័ណ ដើម្បីយកមកធ្វើចត្តាឡីស័កនៅមណ្ឌលវិទ្យាល័យសម្តេចឪ ក្រុងសិរីសោភ័ណតែម្តង។
លោកបានបញ្ជាក់ថា ពិតជានាំទុក្ខដល់ក្រុមគ្រួសារមែន ដើម្បីបង្កា និងទប់ស្កាត់កូវីដ១៩ មិនឱ្យកើតមានក្នុងសហគមន៍ ហើយត្រូវអនុវត្តន៍ឱ្យបានតាមការណណែនាំរបស់ក្រសួងសុខាភិបាលកម្ពុជា ត្រូវពង្រឹងការត្រួតពិនិត្យ និងធ្វើចត្តាឡីស័កចំពោះបងប្អូនប្រជាពលរដ្ឋដែលត្រឡប់ពីប្រទេសថៃ ត្រូវអនុវត្តឱ្យបាន គឺត្រូវធ្វើចត្តាឡីស័ករយៈពេល១៤ក្នុងមណ្ឌល ដែលត្រូវបានត្រួតពិនិត្យសុខភាព និងធ្វើតេស្តសំណាក់។
លោក លី សុវណ្ណារិទ្ធ អភិបាលស្រុកអូរជ្រៅបានបញ្ជាក់ថា ចាប់ពីថ្ងៃទី២០ ខែធ្នូ ឆ្នាំ២០២០ដល់ថ្ងៃទី១៧ ខែមករា ឆ្នាំ២០២១នេះ មានប្រជាពលរដ្ឋត្រឡប់ពីប្រទេសថៃ និងភាគីថៃចាប់បញ្ជូនតាមច្រកអូរបីជាន់ ស្រុកអូរជ្រៅ មានចំនួន៥,៤៩៤នាក់ ក្នុងនោះស្រីចំនួន២,៤៣៥នាក់ ហើយនៅថ្ងៃទី១៧ ខែមករា ឆ្នាំ២០២១នេះ មានចំនួន១៤៦នាក់ ក្នុងនោះស្រី៥៨នាក់។
លោកវេជ្ជបណ្ឌិត រឿន សុធី អនុប្រធានសុខាភិបាលខេត្តបានប្រាប់ថា ប្រជាពលរដ្ឋដែលត្រឡប់ពីប្រទេសថៃ មានច្រកអូរជាន់ ស្រុកអូរជ្រៅ និងច្រកម៉ាឡៃ ស្រុកម៉ាឡៃ ច្រកបឹងត្រកួន ស្រុកថ្មពួក ដែលត្រូវបានទទួលធ្វើចត្តាឡីស័ករយៈពេល១៤ថ្ងៃ មានចំនួន៩.០៣០នាក់ ក្នុងនោះស្រី៣,៨៩៧នាក់ និងបានយកសំណាក់ចំនួន៩,៩៣៥នាក់ ក្នុងនោះស្រី៤,៣២៥នាក់ ហើយត្រូវបានបញ្ចប់ធ្វើចត្តាឡីស័កត្រឡប់ទៅផ្ទះវិញមានចំនួន៤,៩៤៤នាក់ ក្នុងនោះស្រី២,០៨៩នាក់ និងកំពុងបន្តធ្វើចត្តាឡីស័ករយៈពេល១៤ថ្ងៃមានចំនួន២,៥៨៣នាក់ ក្នុងនោះស្រី១,១០០នាក់ វិជ្ជមានកូវីដ១៩មានចំនួន៣៤នាក់ ក្នុងនោះស្រី២៥នាក់ និងប្រុស៩នាក់៕
ចែករំលែកព័តមាននេះ