ជប៉ុនផ្តល់ថវិកាជាង ១៨ម៉ឺនដុល្លារសម្រាប់គម្រោងសំខាន់ៗចំនួន២
- ភ្នំពេញ
រាជធានីភ្នំពេញ ៖ នាថ្ងៃទី១៥ ខែមករា ឆ្នាំ២០២១ រដ្ឋាភិបាលជប៉ុន បានឯកភាពផ្តល់ថវិកាសរុបចំនួន ១៨៧,៦៨២ ដុល្លារអាមេរិក ដល់អង្គភាពទទួលជំនួយចំនួនពីរ…
រាជធានីភ្នំពេញ ៖ នាថ្ងៃទី១៥ ខែមករា ឆ្នាំ២០២១ រដ្ឋាភិបាលជប៉ុន បានឯកភាពផ្តល់ថវិកាសរុបចំនួន ១៨៧,៦៨២ ដុល្លារអាមេរិក ដល់អង្គភាពទទួលជំនួយចំនួនពីរ…
រាជធានីភ្នំពេញ ៖ នាថ្ងៃទី១៥ ខែមករា ឆ្នាំ២០២១ រដ្ឋាភិបាលជប៉ុន បានឯកភាពផ្តល់ថវិកាសរុបចំនួន ១៨៧,៦៨២ ដុល្លារអាមេរិក ដល់អង្គភាពទទួលជំនួយចំនួនពីរ ក្រោមគ្រោងការណ៍ ជំនួយឧបត្ថម្ភឥតសំណងសម្រាប់គម្រោងទ្រង់ទ្រាយតូចសន្តិសុខមនុស្សជាតិ (ជំនួយគូសាណូណិ)។
ថ្លែងក្នុុងពិធីចុះហត្ថលេខាលើកិច្ចសន្យាផ្តល់ជំនួយឥតសំណង ក្នុងគម្រោងទ្រង់ទ្រាយតូចសន្តិសុខមនុស្សជាតិ KUSANONE នៅថ្ងៃដដែល ឯកឧត្តម មិកាមិ ម៉ាសាហ៊ីរ៉ូ ឯកអគ្គរាជទូតវិសាមញ្ញ និងពេញសមត្ថភាពរបស់ប្រទេសជប៉ុនប្រចាំព្រះរាជាណាចក្រកម្ពុជា បានឱ្យដឹងថា ៖ «ចាប់តាំងពីឆ្នាំ ១៩៩១ បន្ថែមលើគម្រោងឥណទាននិងជំនួយឥតសំណងខ្នាតធំ រដ្ឋាភិបាលជប៉ុនបាននិងកំពុងអនុវត្តកម្មវិធី KUSANONE នៅកម្ពុជា ដើម្បីជួយដល់អាជ្ញាធរមូលដ្ឋាន និងអង្គការក្រៅ រដ្ឋាភិបាលក្នុងការអនុវត្តគម្រោងរបស់ពួកគាត់។ KUSANONE មានន័យថា “មូលដ្ឋាន” ក្នុងភាសា ជប៉ុន។ នៅក្នុងរយៈពេល៣០ឆ្នាំចុងក្រោយនេះ ស្ថានទូតជប៉ុនប្រចាំប្រទេសកម្ពុជា បានចូលរួមចំណែកក្នុងគម្រោង ជាង៦០០ តាមរយៈជំនួយឥតសំណង KUSANONE ។ យើងមានសេចក្តីសោមនស្សរីករាយដែលគម្រោងទាំងនេះ បានចូលរួមចំណែកដោយផ្ទាល់ ក្នុងការលើកកម្ពស់គុណភាពនៃជីវភាពរបស់ ប្រជាជនកម្ពុជានៅកម្រិតមូលដ្ឋាន។ ចាប់ពីកន្លែងនេះទៅ ខ្ញុំនឹងថ្លែងសុន្ទរកថាដោយមានការបកប្រែ»។
លោកបានបន្តថា ៖ «ថ្ងៃនេះ ខ្ញុំនឹងណែនាំគម្រោងនីមួយៗដែលបានចុះហត្ថលេខា ដូចខាងក្រោម៖ ក្នុងគម្រោងទី១ សម្រាប់សមាគមទឹកកម្ពុជា(CAWA) រដ្ឋាភិបាលជប៉ុនផ្តល់ថវិកាចំនួន ៩៦,៧៧៥ ដុល្លារអាមេរិក ដើម្បីធានាការទទួលបានទឹកស្អាត និងសេវាកម្មអនាម័យគ្រប់គ្រងដោយសុវត្ថិភាព តាមរយៈការសាងសង់ប្រព័ន្ធផ្គត់ផ្គង់ទឹក និងការតំឡើងបណ្តាញចែកចាយទឹក នៅកោះពាមរាំង ខេត្តព្រៃវែង។
យើងរំពឹងថាប្រជាជនប្រមាណ ១,៣០០នាក់ នឹងអាចទទួលបានទឹកស្អាតប្រើប្រាស់ និងមានតម្លៃ សមរម្យ តាមរយៈគម្រោងនេះ។ ខ្ញុំសង្ឃឹមយ៉ាងមុតមាំថាគម្រោងនេះនឹងនាំទៅរកអនាម័យល្អប្រសើរ និងការកែលម្អជីវភាពរស់នៅរបស់ពួកគាត់។
ក្នុងគម្រោងទី២ សម្រាប់មន្ទីរអប់រំ យុវជន និងកីឡា ខេត្តព្រះវិហារ រដ្ឋាភិបាលជប៉ុនផ្តល់ថវិកា ៩០,៩០៧ ដុល្លារអាមេរិក សម្រាប់ការសាងសង់អគារសិក្សា១ខ្នង ៥បន្ទប់សិក្សា និង៤បន្ទប់ទឹក កន្លែងលាងដៃមួយ និងធុងស្តុកទឹកមួយ នៅអនុវិទ្យាល័យខ្យង ខេត្តព្រះវិហារ។ យើងរំពឹងថា ជំនួយនេះនឹងផ្តល់អត្ថប្រយោជន៍ដល់ សិស្ស ២១០នាក់ និងគ្រូ ៩នាក់ តាមរយៈការលើកកម្ពស់គុណភាពអប់រំ និង បរិយាកាសសិក្សារៀនសូត្រ ក៏ដូចជាចូលរួមចំណែក ដល់ការធំលូតលាស់ប្រកបដោយសុខភាពល្អរបស់សិស្សផងដែរ។ »។
លោកបានបន្ថែមថា «ខ្ញុំមានសេចក្តីសោមនស្សរីករាយដែលសង្កេតឃើញថានាពេលថ្មីៗនេះ ប្រទេសកម្ពុជា បាននិងកំពុងមានការអភិវឌ្ឍយ៉ាងឆាប់រហ័ស។ ទោះបីជាយ៉ាងណាក៏ដោយ ខ្ញុំក៏ទទួលស្គាល់ថានៅតែមានបញ្ហាប្រឈមមួយចំនួនដែលត្រូវដោះស្រាយ ដើម្បីលើកកម្ពស់គុណភាពនៃជីវភាពរស់នៅ របស់ ប្រជាជន។ បញ្ហាសុខភាពនិងអនាម័យក៏កាន់តែមានសារៈសំខាន់ផងដែរ ជាពិសេសនៅពេលដែលជំងឺកូវីត១៩ មានការគំរាមកំហែងនៅលើទូទាំងពិភពលោក។ ប្រទេសជប៉ុននឹងបន្តចូលរួមចំណែកក្នុងការដោះស្រាយបញ្ហាប្រឈមទាំងនោះ តាមរយៈគ្រោងការណ៍សហប្រតិបត្តិការសេដ្ឋកិច្ច និងអភិវឌ្ឍន៍ ផ្សេងៗ រួមទាំង “គូសាណូណិ” ផងដែរ។ សូមអរគុណសម្រាប់ការចូលរួមក្នុងកម្មវិធីចុះហត្ថលេខានាថ្ងៃនេះ។ ខ្ញុំសូមជូនពរ ឯកឧត្តម លោកជំទាវ លោក លោកស្រី សូមមានសុខភាពល្អ សុភមង្គល និង សូមឲ្យមិត្តភាពជប៉ុន-កម្ពុជាកាន់តែរីក ចម្រើន»។
សូមជម្រាបជូនថា ជំនួយទាំងនេះ គឺផ្អែកលើការប្តេជ្ញាចិត្តនៅក្នុងសេចក្តីថ្លែងការណ៍របស់សហប្រធាន នៃកិច្ចប្រជុំរដ្ឋមន្ត្រីការបរទេស មេគង្គ-ជប៉ុន លើកទី១៣ នៅថ្ងៃទី៩ ខែកក្កដា ឆ្នាំ២០២០ ដែលបានថ្លែងថា “ការអនុវត្តជំនួយឥតសំណង សម្រាប់គម្រោងទ្រង់ទ្រាយតូចសន្តិសុខមនុស្សជាតិឆ្នាំ២០២០ ក្រោមគំនិតផ្តួចផ្តើមគូសាណូណិមេគង្គសម្រាប់គោលដៅអភិវឌ្ឍន៍ប្រកបដោយចីរភាព ដែលមានទឹកប្រាក់សរុបប្រមាណ ៩១លានដុល្លារអាមេរិក មានគោលបំណងគាំទ្រដល់ការអភិវឌ្ឍសេដ្ឋកិច្ច និងសង្គមកិច្ច នៅតាមភូមិស្រុកថ្នាក់មូលដ្ឋានទូទាំងតំបន់មេគង្គ”៕
ចែករំលែកព័តមាននេះ