ខេត្តបន្ទាយមានជ័យ ៖ បុរសម្នាក់ត្រូវបានគេប្រទះសាកសពក្រៀមស្វិតអស់សល់តែគ្រោងឆ្អឹងនៅគុម្ពោតព្រៃ ហើយត្រូវប៉ូលិសអះអាងថា ជាមនុស្សអនាថា ហេតុការណ៍នេះ បង្កឱ្យមានការភ្ញាក់ផ្អើលកាលពីថ្ងៃទី១២ ខែមករា ឆ្នាំ២០២១ នៅចំណុចទល់មុខការ៉ាសាំង…
ខេត្តបន្ទាយមានជ័យ ៖ បុរសម្នាក់ត្រូវបានគេប្រទះសាកសពក្រៀមស្វិតអស់សល់តែគ្រោងឆ្អឹងនៅគុម្ពោតព្រៃ ហើយត្រូវប៉ូលិសអះអាងថា ជាមនុស្សអនាថា ហេតុការណ៍នេះ បង្កឱ្យមានការភ្ញាក់ផ្អើលកាលពីថ្ងៃទី១២ ខែមករា ឆ្នាំ២០២១ នៅចំណុចទល់មុខការ៉ាសាំង ក្បែរខាងកើតបុរី ស្ថិតនៅក្នុងភូមិ-សង្កាត់ផ្សារកណ្តាល ក្រុងប៉ោយប៉ែត។
បើតាមមន្ត្រីអធិការដ្ឋាននគរបាលក្រុងប៉ោយប៉ែត បានប្រាប់ឱ្យដឹងនៅថ្ងៃទី១៣ ខែមករា នេះថា ក្រោយពីទទួលព័ត៌មានហើយ កម្លាំងជំនាញក៏បានចុះទៅពិនិត្យឃើញសាកសពដែលត្រូវគេប្រទះឃើញនៅគុម្ពោតព្រៃក្បែរខាងកើតបូរី ប្រមាណជា១០ម៉ែត្រ និងខាងជើងផ្លូវជាតិលេខ៥ ប្រមាណជា២៥ម៉ែត្រ គឺសភាពស្វិតអស់សល់តែស្បែកជាប់គ្រោងឆ្អឹង និងរលេះរលួយស្ទើរតែអស់ទៅហើយ។
មន្ត្រីនគរបាលជំនាញបានបញ្ជាក់ថា សាកសពដែលត្រូវបានគេប្រទះឃើញខាងលើនេះ គឺជាបុរសដែលមានអាយុប្រហែលជា៣០ឆ្នាំ ហើយបើតាមការពិនិត្យ និងសន្និដ្ឋានដំបូងថា ជាមនុស្សវិកលចរិក ឬសតិមិនគ្រប់ ដែលអាចថាបានដេកបាត់បង់ជីវិតក្បែរគុម្ពោតព្រៃ ដោយអត់អាហារ ហើយជនរងគ្រោះរូបនេះនៅមិនទាន់ស្គាល់អត្តសញ្ញាណនៅឡើយ។
មន្ត្រីនគរបាលបញ្ជាក់ទៀតថា ក្រោយពេលពិនិត្យសពរួច ហើយត្រូវបានជំនាញបានប្រគល់ជូនលោក នួន នីគីដា ដែលមានចិត្តធម៌ បានរៀបចំវេចខ្ចប់សាកសពជនរងគ្រោះ រួចដាក់តាមរថយន្តយកទៅវត្ត ស្ថិតភូមិ-សង្កាត់ផ្សារកណ្តាល ក្រុងប៉ោយប៉ែត ដើម្បីបូជាផងដែរ។
ចែករំលែកព័តមាននេះ