រាជធានីភ្នំពេញ ៖ មានហេតុការណ៍ភ្ញាក់ផ្អើលមួយទាំងព្រឹក ខណៈពិធីភ្ជាប់ពាក្យនៅភូមិគ្រឹះមួយកន្លែង ត្រូវបានអាក់ខានវិញដោយសារបងប្រុសរបស់ខាងភាគីកូនក្រមុំចំនួន២ ទៅ៣នាក់ បានធ្វើការអុកឡុកផ្អើលដល់ភ្ញៀវ ដែលមកចូលរួមរត់ចេញពីកន្លែងពិធីភ្ជាប់ពាក្យនោះ ហើយបងប្រុសនោះបានយកសោមកចាក់របងទ្វារដោយអះអាងថា សាមីកូនកំលោះធ្លាប់មានប្រពន្ធ និងកូនដោយមិនទាន់លែងលះគ្នាដាច់ស្រេចនោះ ។
ហេតុការណ៍នេះ បង្កឱ្យភ្ញាក់ផ្អើលកាលពីវេលាព្រឹកថ្ងៃទី២១ កក្កដា ២០១៥ នេះ ស្ថិតនៅភូមិគ្រឹះខាងស្រីតាមបណ្តោយផ្លូវឧកញ៉ាម៉ុងប្ញទ្ធី ក្នុងសង្កាត់ភ្នំពេញថ្មី ខណ្ឌសែនសុខ ។
ប្រភពបានឱ្យដឹងថា បងប្រុសកូនក្រមុំដែលមកអុកឡុកនោះឈ្មោះប៉ែន រិទ្ធី អាយុជាង៤០ឆ្នាំ ដោយពេលនេះត្រូវបានអាជ្ញាធរមូលដ្ឋានហៅទៅដោះស្រាយនៅសង្កាត់ភ្នំពេញថ្មី ។ ចំណែកឯកូនលោះឈ្មោះឡេង ប៊ុនឡុង អាយុ៣៥ឆ្នាំ មានទីលំនៅក្នុងភូមិបាយ៉ាប សង្កាត់ភ្នំពេញថ្មី និងកូនក្រមុំឈ្មោះចាន់ រ័ត្ននា អាយុ២៥ឆ្នាំ មានទីលំនៅកន្លែងកើតហេតុខាងលើ ។
ដោយឡែកតាមប្រភពពីបងប្រុសរូបនោះបានឱ្យកោះសន្តិភាពដឹងថា តាមពិត ខ្លួនមិនហាមឃាត់មិនឱ្យពួកគេរៀបការនោះទេ តែដោយសារគាត់បារម្ភពីប្អូនស្រី ខណៈដែលគាត់ដឹងថា ប្រវត្តិកូនលោះមិនសូវល្អ ដោយចង់សុំពន្យារពេល៣ខែទៀត ដើម្បីរង់ចាំស៊ើបសួរពីប្រវត្តិកូនកំលោះឱ្យបានច្បាស់លាស់សិន ។
តែទោះបីជាយ៉ាង ខាងអាជ្ញាធរមូលដ្ឋានបានឱ្យដឹងថា ខាងគាត់មិនមានសិទ្ធិហាមពួកគេមិនឱ្យរៀបការនោះទេ ព្រោះសំខាន់គឺមានការព្រមព្រៀងពីភាគីទាំងសងខាង និងបានធ្វើលិខិតបញ្ជាក់តាមច្បាប់ត្រឹមត្រូវទៀតផង ។
ព័ត៌មានលម្អិតនឹងផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ