ខេត្តប៉ៃលិន ៖ បុរសម្នាក់រងរបួសភ្នែកទាំងសងខាងធ្ងន់ ត្រូវគេដឹកតាមរថយន្តយកទៅសង្គ្រោះនៅមន្ទីរពេទ្យខេត្តប៉ៃលិន តែដោយសាររបួសធ្ងន់ពេក ក៏បញ្ជូនបន្តទៅមន្ទីរពេទ្យខេត្តបាត់ដំបង
ខេត្តប៉ៃលិន ៖ បុរសម្នាក់រងរបួសភ្នែកទាំងសងខាងធ្ងន់ ត្រូវគេដឹកតាមរថយន្តយកទៅសង្គ្រោះនៅមន្ទីរពេទ្យខេត្តប៉ៃលិន តែដោយសាររបួសធ្ងន់ពេក ក៏បញ្ជូនបន្តទៅមន្ទីរពេទ្យខេត្តបាត់ដំបង ខណៈបុរសរងគ្រោះស៊ីឈ្នួលដាំកូនឈើនៅក្នុងចម្ការមន្ត្រីគយម្នាក់ ស្រាប់តែជីកប៉ះចំគ្រាប់មីនប្រភេទស្មាច់ បណ្តាលឱ្យផ្ទុះលាន់កក្រើករបួសធ្ងន់ កាលពីវេលាម៉ោង១និង៣០នាទីរសៀលថ្ងៃទី១៨ កក្ដដា ២០១៥ ស្ថិតនៅក្នុងចម្ការខាងក្រោយសាខាគយ ក្នុងភូមិដីក្រហម សង្កាត់អូរតាវ៉ៅ ក្រុងប៉ៃលិន ។
ប្រភពព័ត៌មានពីលោកស្រី ឈ្មោះ ដុល ហេង អាយុ៥៧ឆ្នាំ ជាមេភូមិដីក្រហម បានឱ្យដឹងថា បុរសរងគ្រោះឈ្មោះ យុំ ភៀន អាយុ២៧ឆ្នាំ ជាកម្មកររងរបួសខ្លួន និងភ្នែកទាំងសងខាង មានប្រពន្ធ ឈ្មោះ ហឿន លៀង អាយុ២២ឆ្នាំ រស់នៅភូមិអូរប្រើស សង្កាត់អូរតាវ៉ៅ ក្រុងប៉ៃលិន ។
ប្រភពបន្តថា មុនពេលកើតហេតុ គេឃើញបុរសរងគ្រោះខាងលើ យកចបជីករណ្តៅដាំកូនឈើនៅក្នុងចម្ការរបស់មន្ត្រីគយម្នាក់ ស្ថិតនៅក្រោយរបងសាខាគយ និងរដ្ឋាករខេត្ត ក្នុងភូមិដីក្រហម លុះជីករណ្តៅតាំងពីព្រឹកដល់ថ្ងៃត្រង់ក៏ឈប់សម្រាកហូបបាយ ដល់ពេលរសៀលក៏ចាប់ផ្តើមជីកបន្តទៀត ខណៈពេលកំពុងជីកក៏ប៉ះចំគ្រាប់មីនកប់ក្នុងដី ដែលបន្សល់ទុកកាលពីសម័យសង្គ្រាម បណ្ដាលឲ្យផ្ទុះត្រូវចបកាប់ដាច់ជាពីរកំណាត់ ហើយអំបែងខ្ទាតត្រូវចំមុខ និងភ្នែកទាំងសងខាងរងរបួសធ្ងន់ ។
សូមបញ្ជាក់ផងដែរថា ក្នុងចម្ការរបស់មន្ត្រីគយខាងលើ អង្គការស៊ីម៉ាក់ចូលទៅដោះរួចរាល់អស់ហើយកាលពីពេលថ្មីៗនេះ ប៉ុន្តែត្រង់ចំណុចនេះគេនៅចន្លោះប្រហោង ដោយសារតែឃើញពលរដ្ឋធ្វើចម្ការស្រឡះល្អហើយ ទើបមិនបានរ៉ាវរកនោះ ៕
ចែករំលែកព័តមាននេះ