រាជធានីភ្នំពេញ ៖ អ្នកនាំពាក្យកងរាជអាវុធហត្ថលើផ្ទៃប្រទេស លោកឧត្តមសេនីយ៍ត្រី អេង ហ៊ី បានច្រានចោលព័ត៌មានដែលថា បុរសម្នាក់ដែលបើករថយន្តម៉ាកព្រូសកៀរម៉ូតូស្គូពី រួចដកកាំភ្លើងភ្ជង់ជនរងគ្រោះនោះថា មិនមានឈ្មោះក្នុងក្របខ័ណ្ឌកងរាជអាវុធហត្ថនោះទេ…
រាជធានីភ្នំពេញ ៖ អ្នកនាំពាក្យកងរាជអាវុធហត្ថលើផ្ទៃប្រទេស លោកឧត្តមសេនីយ៍ត្រី អេង ហ៊ី បានច្រានចោលព័ត៌មានដែលថា បុរសម្នាក់ដែលបើករថយន្តម៉ាកព្រូសកៀរម៉ូតូស្គូពី រួចដកកាំភ្លើងភ្ជង់ជនរងគ្រោះនោះថា មិនមានឈ្មោះក្នុងក្របខ័ណ្ឌកងរាជអាវុធហត្ថនោះទេ ហើយថា កាំភ្លើងជនបង្កម៉ាកកា៥៩ ក៏មិនមាននៅក្នុងបញ្ជីគ្រប់គ្រងរបស់កងរាជអាវុធហត្ថផងដែរ ។
សូមបញ្ជាក់ថា មានគ្រោះថ្នាក់ចរាចរណ៍មួយបានកើតឡើងនៅក្នុងមូលដ្ឋានសង្កាត់ផ្សារថ្មីទី១ ខណ្ឌដូនពេញកាលពីម៉ោង៤និង៣០នាទីទៀបភ្លឺថ្ងៃទី១០ មករា ២០២១ ។ ប្រភពព័ត៌មាន ប្រាប់ថា មុនពេលកើតហេតុ គេឃើញរថយន្តតូយ៉ូតាព្រូស ព៌ណទឹកប្រាក់ ពាក់ស្លាកលេខភ្នំពេញ 2AU 9367 បើកបរដោយបុរសម្នាក់ បានបើករថយន្តស្របទិសគ្នា តាមបណ្តោយផ្លូវ៧៣ កែងផ្សារធំថ្មី រួចកៀរម៉ូតូម៉ាកស្គូពី ព៌ណស ពាក់ស្លាកលេខកណ្តាល 1AG 5620 បណ្តាលឲ្យអ្នកបើកម៉ូតូដួលរបួសបាក់ដងកាំបិត និងរងរបួសប្រអប់ជើង ។
ក្រោយកើតហេតុ គេឃើញអ្នកបើរករថយន្តបានដកកាំភ្លើងពីចង្កេះ ហើយស្រែកថា«អ្ហែងចង់យ៉ាងម៉េច ?» ភ្លាមៗនោះ គេក៍ឃើញអ្នកបើកបរម៉ូតូដែលរងរបួសធ្ងន់ផងនោះ បានលើកដៃសំពះសុំកុំបាញ់គាត់អី ។ ក្រោយឃើញសភាពបែបនេះ អ្នកចោមរោមមើលហេតុការណ៍ បានរត់មកជួយជនរងគ្រោះ និងជួយចាត់ចែងបញ្ជូនអ្នកបើកបរម៉ូតូ ទៅកាន់មន្ទីរពេទ្យភ្លាមៗផងដែរ ។ បន្ទាប់មក អ្នកបើកបររថយន្តព្រូស នៅតែបន្តសំញែងកាំភ្លើងនៅមុខសមត្ថកិច្ចដដែលៗ ទើបបសមត្ថកិច្ច សុំដកកាំភ្លើងទុកសិន តែគេឃើញជនបង្កប្រគល់អោយតែសំបកកាំភ្លើង មិនប្រគល់គ្រាប់អោយនោះទេ និងបានស្រែកគំហកដាក់សមត្ថកិច្ចនោះថែមទៀត ហើយអ្នកបើកបររថយន្តបានស្រែកថា ខ្លួនមានមុខងារជាមន្ត្រីកងរាជអាវុធហត្ថ និងមានតួនាទីជានាយករងមជ្ឈមណ្ឌលហ្វឹកហ្វឺនភ្នំជំរាយ ។
ឧត្តមសេនីយ៍ត្រី អេង ហ៊ី បានអោយដឹងថា កងរាជអាវុធហត្ថបានធ្វើការចុះត្រួតពិនិត្យ ស្រាវជ្រាវករណីរឿងហេតុខាងលើនេះ ដល់កន្លែងកើតហេតុតាមនីតិវិធី ។ មន្ត្រីជំនាញកងរាជអាវុធហត្ថ បានបញ្ជាក់ថា បុគ្គលដែលបង្កហេតុដកកាំភ្លើង នៅផ្តុំផ្សារថ្មី ស្ថិតនៅសង្កាត់ផ្សារថ្មីទី១ ខណ្ឌដូនពេញ រាជធានីភ្នំពេញ វេលាប្រមាណម៉ោង៤និង៣០នាទីទៀបភ្លឺថ្ងៃទី១០ ខែមករា ឆ្នាំ២០២១ មានឈ្មោះ សុខ ណាម៉ាលីដូ ភេទប្រុស ថ្ងៃខែឆ្នាំកំណើត៖ ១៧-០៨-១៩៩៣ មានទីលំនៅផ្ទះលេខ១២អឺសូន្យ ផ្លូវលេខ៨៨ សង្កាត់វត្តភ្នំ ខណ្ឌដូនពេញ រាជធានីភ្នំពេញ ។ បុគ្គលឈ្មោះ សុខ ណាម៉ាលីដូ មិនមានឈ្មោះនៅក្នុងក្របខ័ណ្ឌរបស់កងរាជអាវុធហត្ថ និងអាវុធខ្លីម៉ាក់កា៥៩ លេខ២៩៩៩ ក៏មិនមាននៅក្នុងបញ្ជីគ្រប់គ្រងរបស់កងរាជអាវុធហត្ថផងដែរ។ កម្លាំងមន្ត្រីនគរបាលយុត្តិធម៌នៃកងរាជអាវុធហត្ថ កំពុងធ្វើការស្រាវជ្រាវរកបុគ្គលខាងលើនេះ ដើម្បីបញ្ជាក់ការពិត និងអនុវត្តតាមច្បាប់។
អ្នកនាំពាក្យកងរាជអាវុធហត្ថលើផ្ទៃប្រទេស បន្ថែមថា ក្រោមការដឹកនាំរបស់នាយឧត្តមសេនីយ៍ សៅ សុខា មេបញ្ជាការកងរាជអាវុធហត្ថលើផ្ទៃប្រទេស ជាគោលជំហរ បុគ្គលិកនៃកងរាជអាវុធហត្ថរូបណា ដែលប្រព្រឹត្តនូវកំហុសឆ្គង ល្មើសវិន័យកងទ័ព ត្រូវតែអនុវត្តទណ្ឌកម្មវិន័យ ដូចមានចែងក្នុងបទប្បញ្ញត្តិ នៃបទវិន័យទូទៅ និងលក្ខន្តិកៈ ទូទៅសម្រាប់យោធិន នៃកងយោធពលខេមរភូមិន្ទ។ ក្នុងករណីបុគ្គលណាប្រព្រឹត្តល្មើសច្បាប់ ត្រូវតែបញ្ជូនបុគ្គលនោះទៅតុលាការផ្តន្ទាទោសតាមច្បាប់ ដូចទិសស្លោកដែលបានដាក់ចេញនាពេលកន្លងទៅ “ចំពោះប្រទេសជាតិត្រូវតែការពារ ចំពោះប្រជាត្រូវតែបម្រើ ច្បាប់ត្រូវតែគោរព បទល្មើសត្រូវតែបង្ក្រាប” ៕
ចែករំលែកព័តមាននេះ