ខេត្តបាត់ដំបង ៖ កេ្មងប្រុសជំទង់ម្នាក់កំពុងជិះម៉ូតូសុខៗក៏បានដួលត្រឡប់ត្រឡិន ដោយសារតែឈើមួយកំណាត់បានធ្លាក់ចេញពីលើរថយន្តមកប៉ះ តែជាអកុសលពេលនោះក៏មានរថយន្ត១គ្រឿងទៀតធ្វើដំណើស្របទិសគ្នាមកពីក្រោយ ហើយក៏កិនចំពាក់កណ្ដាលខ្លួនក្មេងប្រុសរូបនេះ បណ្ដាលឲ្យបាត់បង់ជីវិតយ៉ាងយ៉ាងអាណោចអាធ័មតែម្តង កាលពីវេលាម៉ោង៦និង១៥នាទីព្រឹក ថ្ងៃទី០៨ ខែមករា…
ខេត្តបាត់ដំបង ៖ កេ្មងប្រុសជំទង់ម្នាក់កំពុងជិះម៉ូតូសុខៗក៏បានដួលត្រឡប់ត្រឡិន ដោយសារតែឈើមួយកំណាត់បានធ្លាក់ចេញពីលើរថយន្តមកប៉ះ តែជាអកុសលពេលនោះក៏មានរថយន្ត១គ្រឿងទៀតធ្វើដំណើស្របទិសគ្នាមកពីក្រោយ ហើយក៏កិនចំពាក់កណ្ដាលខ្លួនក្មេងប្រុសរូបនេះ បណ្ដាលឲ្យបាត់បង់ជីវិតយ៉ាងយ៉ាងអាណោចអាធ័មតែម្តង កាលពីវេលាម៉ោង៦និង១៥នាទីព្រឹក ថ្ងៃទី០៨ ខែមករា ឆ្នាំ២០២១ នៅលើផ្លូវជាតិលេខ៥ ត្រង់ចំណុចភូមិតាសី ឃុំតាម៉ឺន ស្រុកថ្មគោល រីឯរថយន្តវិញបានបន្ថែមល្បឿនបើកគេចបាត់ទាំង២គ្រឿងតែម្តង។
អធិការស្រុកថ្មគោល លោក ផង់ សុភាព បានឲ្យដឹងថា ជនរងគ្រោះខាងលើឈ្មោះ ឆុន រីឆាត ភេទប្រុស អាយុ១៥ឆ្នាំ រស់នៅភូមិនគមក្រៅ ឃុំជ្រោយស្ដៅ ស្រុកថ្មគោល។
លោកបានប្រាប់ថា បើតាមព្រឹត្តិហេតុ ជនរងគ្រោះត្រូវរថយន្តមួយគ្រឿងដែលគេមិនស្គាល់ម៉ាក បើកកិនបន្ថែម បណ្ដាលឲ្យបាត់បង់ជីវិត ក្រោយពីជនរងគ្រោះជិះម៉ូតូដួល ដោយសារតែជិះទៅបុកនឹងគល់ឈើដែលធ្លាក់ចេញពីលើរថយន្តមួយគ្រឿងទៀត បើកនៅខាងមុខ។ ប៉ុន្តែរថយន្តទាំង២គ្រឿងដែលគេមិនទាន់ស្គាល់ភិនភាគនោះ បានបន្ថែមល្បឿនដូចគ្នាបើករត់បាត់តែម្តង។
បើតាមព្រឹត្តិហេតុរបស់មន្ត្រីជំនាញ បានឲ្យដឹងថា ឧប្បត្តិហេតុ ដែលបានកើតឡើងរវាងម៉ូតូមួយគ្រឿងជាមួយនឹងរថយន្ត២គ្រឿងនេះ គឺធ្វើដំណើរក្នុងគោលដៅស្របទិសគ្នាពីជើងទៅត្បូង តាមបណ្ដោយផ្លូវជាតិលខ៥។
ប្រភពដដែលបានឲ្យដឹងបន្តថា ជនរងគ្រោះបានជិះម៉ូតូពីក្រោយរថយន្តមួយគ្រឿងដែលមានដឹកគល់ឈើ លុះមកដល់ចំណុចកើតហេតុ ក៏ស្រាប់តែគល់ឈើនោះបានធ្លាក់ចុះដី ក៏ទៅប៉ះជាមួយនឹងម៉ូតូជនរងគ្រោះដែលជិះពីក្រោយនោះ បណ្ដាលឲ្យជនរងគ្រោះដួលត្រឡប់ត្រឡិននៅលើថ្នល់តែម្តង ។ តែចៃដន្យពេលនោះ ក៏មានរថយន្តមួយគ្រឿងទៀត បើកយ៉ាងលឿនមកពីក្រោយជនរងគ្រោះ ហើយជាន់ហ្វ្រាំងមិនទាន់ ក៏កិនចំពាក់កណ្ដាលខ្លួនជនរងគ្រោះ បណ្ដាលឲ្យបាត់បង់ជីវិតនៅកន្លែងកើតហេតុយ៉ាងអាណោចអាធ័មបំផុត។
បើតាមព្រឹត្តិហេតុដដែលបានបញ្ជាក់ថា ក្រោយបង្កឲ្យមានមនុស្សបាត់បង់ជីវិតរួច រថយន្តទាំង២គ្រៀងនោះមិនបានឈប់នោះទេ ផ្ទុយទៅវិញម្ចាស់រថយន្តទាំង២គ្រឿងក៏បានបន្ថែមល្បឿនបើករត់បាត់ខ្លួនភ្លាមៗតែម្តងទាំង២គ្រឿងតែម្តង ដោយគ្មានសាក្សីណាម្នាក់បានស្គាល់ភិនភាគឡើយ។
លោក ផង់ សុភាព បានបញ្ជាក់ដែរថា មន្ត្រីជំនាញបានចុះទៅពិនិត្យដល់ចំណុចកើតហេតុភ្លាមៗដែរ តែបានត្រឹមតែធ្វើការវាស់វែង និងពិនិត្យស្លាកស្នាម ព្រមទាំងធ្វើកំណត់ហេតុ រួចប្រគល់សាកសពឲ្យក្រុមគ្រួសារយកទៅធ្វើបុណ្យតាមប្រពៃណីតែប៉ុណ្ណោះ។ ប៉ុន្តែលោកបានបញ្ជាក់ដែរថា ពេលនេះ កម្លាំងជំនាញក៏កំពុងតែធ្វើការស្រាវជ្រាវ និងស្វែងរកសាក្សីនានា ក្រែងបានប្រទះឃើញហេតុការណ៍នេះផ្ទាល់ ដើម្បីបង្ហាញពីភិនភាគរថយន្តបង្កគ្រោះថ្នាក់ទាំង២គ្រឿងខាងលើនោះ៕
ចែករំលែកព័តមាននេះ