សហរដ្ឋអាមេរិក ៖ មនុស្សដល់៤នាក់ត្រូវបានបាត់បង់ជីវិតកាលពីយប់ថ្ងៃទី៦ ខែមករា ឆ្នាំ២០២១ នៅក្រុងវ៉ាស៊ិនតោន ក្រោយអំពើហិង្សានានារបស់ពួកអ្នកគាំទ្រលោកដូណាល់ត្រាំ។ ជនរងគ្រោះម្នាក់ជានារីមួយរូបដែលត្រូវគ្រាប់កាំភ្លើង របស់ប៉ូលិស ក្នុងវិមានកាពីតូល។ មនុស្ស៣នាក់ទៀតត្រូវបាត់បង់ជីវិតនៅកន្លែងសង្គ្រោះបន្ទាន់ផ្សេងៗគ្នា ក្នុងតំបន់ជុំវិញវិមានកាពីតូល។ ចំណែកមនុស្ស៥២នាក់បានត្រូវចាប់ខ្លួន។
ប្រមុខប៉ូលិសក្រុងវ៉ាស៊ិនតោន ប្រកាសថា តុល្យការនៃអំពើហិង្សា កាលពីថ្ងៃទី៦ ខែមករា ក្នុងបាតុកម្ម របស់ពួកអ្នកគាំទ្រលោកត្រាំ ចំនួនអ្នកបាត់បង់ជីវិតកើនដល់៤នាក់។ នារីម្នាក់ដែលបាត់បង់ជីវិតនាថ្ងៃនោះ ក្រោយចូលរួមក្នុងការវាយបំផ្លាញក្នុងផៃ្ទវិមានសភា បានត្រូវប៉ូលិសបាញ់ ។ នារីរូបនោះមានឈ្មោះថា ASHLI BABBITT រស់នៅតំបន់សាន់ឌីយេហ្គោ ភាគខាងត្បូងរដ្ឋកាលីហ្វ័រនីញ៉ា។ មនុស្ស៣នាក់ទៀត ក្នុងនោះមាននារីម្នាក់ និងបុរស២នាក់ ត្រូវបានបាត់បង់ជីវិតនៅជុំវិញវិមានកាពីតូល ក្នុងកន្លែងសង្គ្រោះបន្ទាន់ផ្សេងៗពីគ្នា។ មូលហេតុនៃការបាត់បង់ជីវិតរបស់ពួកគេ នឹងមិនអាចដឹងមុនពេលធ្វើកោសល្យវិច្ច័យឡើយ។
ភ្នាក់ងារ FBI អាមេរិកនិយាយថា បានរកឃើញនិងដោះគ្រឿងផ្ទុះ២គ្រាប់។ វិមានកាពីតូលចាត់ទុកថា មានសន្តិសុខវិញមុនម៉ោង១៧និង៣០នាទីម៉ោងក្នុងស្រុកបន្តិច ពោលគឺជាង៣ម៉ោងក្រោយពួកបាតុករ អាចទម្លុះរបាំងសន្តិសុខ ដើម្បីលុកចូលវិមានសភា។ បណ្ដាវីដេអូបង្ហាញពួកបាតុករវាយបំបែកកញ្ចក់ និងប៉ូលិសបាញ់ឧស្ម័នបង្ហូរទឹកភ្នែក ខាងក្នុងវិមានកាពីតូល។
ប្រមុខប៉ូលិសក្រុងវ៉ាស៊ិនតោន លោក ROBERT CONTEE ថ្លែងថា ពួកបះបោរបានវាយប្រហារលើប៉ូលិសជាមួយបណ្ដាផលិតផលគីមី ។ ប៉ូលិសច្រើននាក់រងរបួស។ កងកម្លាំងប៉ូលិសប្រដាប់អាវុធ អាចជម្លៀសចេញបណ្ដាសមាជិកសភាពីវិមានកាពីតូល បន្ទាប់មករុញច្រានពួកបះបោរដែលលុកចូលក្នុងវិមានសភា ដែលនោះជាឆាកដ៏ច្របូកច្របល់មួយ ផ្សាយតាមទូរទស្សន៍ក្នុងទូទាំងពិភពលោក៕ ដកស្រង់ចេញពីវេបសាយ ៖ yahoo
ចែករំលែកព័តមាននេះ