រាជធានីភ្នំពេញ ៖ គណបក្សហ្វ៊ុនស៊ិនប៉ិច ដែលជាគណបក្សរាជានិយមបានធ្វើការថ្កោល ទោសយ៉ាងដាច់អហង្ការចំពោះទណ្ឌិត សម រង្ស៉ី ដែលបានប្រមាថព្រះមហាក្សត្រកម្ពុជា និងគាំទ្រចំណាត់ការរបស់តុលាការទៅលើទណ្ឌិត សម…
រាជធានីភ្នំពេញ ៖ គណបក្សហ្វ៊ុនស៊ិនប៉ិច ដែលជាគណបក្សរាជានិយមបានធ្វើការថ្កោល ទោសយ៉ាងដាច់អហង្ការចំពោះទណ្ឌិត សម រង្ស៉ី ដែលបានប្រមាថព្រះមហាក្សត្រកម្ពុជា និងគាំទ្រចំណាត់ការរបស់តុលាការទៅលើទណ្ឌិត សម រង្ស៊ី។
លោក អ៊ា ឃីម៉េង ឧបការីសម្តេចព្រះប្រធានគណបក្សហ្វ៊ុនស៊ិនប៉ិច និងជាប្រធានក្រុម ការងារខេត្តពោធិ៍សាត់ បានបញ្ជាក់នៅថ្ងៃទី៦ ខែមករា ឆ្នាំ២០២០ យ៉ាងដូច្នេះថា ៖ «គណបក្សហ្វ៊ុនស៊ិនប៉ិច បានប្រកាសថ្កោលទោស និងប្រឆាំងចំពោះទណ្ឌិតសម រង្ស៊ី ដែលមាន ប្រមាថទៅលើអង្គព្រះមហាក្សត្រ ពីព្រោះផ្អែកតាមរដ្ឋធម្មនុញ្ញបានចែងថា អង្គព្រះមហាក្សត្រ មិនអាចត្រូវនរណាម្នាក់រំលោភបំពានបានទេ ។ ការប្រមាថនេះមិន ត្រឹមតែល្មើសនឹងមាត្រា៧នៃរដ្ឋធម្មនុញ្ញទេ ក៏ល្មើសនឹងមាត្រា៤៣៧ស្ទួននៃក្រមព្រហ្មទណ្ឌ នៃព្រះរាជាណាចក្រកម្ពុជាផងដែរ»។
លោកបានគូសបញ្ជាក់ថា ការលើកឡើងរបស់ទណ្ឌិតសម រង្ស៊ី តាមរយៈបណ្តាញសង្គមហ្វេសប៊ុក ក៏ដូចជាកិច្ចសម្ភាសន៍ជាមួយវិទ្យុអាស៊ីសេរីកន្លងមកនេះ គឺជាការរំលោភបំពាន និងប្រមាថព្រះមហាក្សត្រដែលមិនអាចទទួលយកបាន។ ព្រោះថា ជាការប្រមាថជាសាសន៍ខ្លួនថែមទៀត។
ទាន់ទិននឹងការថ្កោលទោសនេះ គណបក្សហ្វ៊ុនស៊ិនប៉ិច កាលពីថ្ងៃទី៤ ខែមករា ឆ្នាំ២០២១ បាន ចេញសេចក្តីថ្លែងការណ៍មួយដោយគណបក្ស ធ្វើការថ្កោលទោសយ៉ាងដាច់អហង្ការ ចំពោះទណ្ឌិត សម រង្ស៉ី ដែលបង្ហោះសារតាម Facebook កាលពីថ្ងៃទី២០-១២-២០ និងការសម្ភាសន៍ក្នុងវិទ្យុអាស៊ីសេរី កាលពីថ្ងៃទី ២៩-១២-២០»។
គណបក្សហ្វ៊ុនស៊ិនប៉ិច បានចាត់ទុកខ្លឹមសារដែលទណ្ឌិត សម រង្ស៉ី បានផ្សព្វផ្សាយជាសាធារណៈតាមរយៈបណ្តាញ ផ្សព្វផ្សាយសង្គមនេះ គឺជាការប្រមាថយ៉ាងធ្ងន់ធ្ងរ និងបានធ្វើឲ្យប៉ះពាល់យ៉ាងខ្លាំងចំពោះព្រះរាជកិត្តិនាមរបស់អង្គព្រះមហាក្សត្រ នៃព្រះរាជាណាចក្រកម្ពុជា ជាទីគោរពសក្ការៈដ៏ខ្ពង់ខ្ពស់បំផុតនៃប្រជានុរាស្ត្រខ្មែរ។ គណបក្សហ្វ៊ុនស៊ិនប៉ិច យល់ឃើញថា «ការកាត់ទោសទណ្ឌិត ស មរង្ស៉ី មេចលនាឧទ្ទាមក្រៅច្បាប់ ឲ្យជាប់ពន្ធនាគារ៤ឆ្នាំទៀត ពីបទប្រមាថព្រះមហាក្សត្រ ពិតជាត្រឹមត្រូវ»។
ជាងនេះទៅទៀត គណបក្សហ្វ៊ុនស៊ិនប៉ិច បានធ្វើការបញ្ជាក់ជូនជនរួមជាតិ នូវការប្តេជ្ញាចិត្តយ៉ាងប្តូរផ្តាច់ការពាររបបរាជានិយម និងព្រះរាជបល្ល័ង្ក ស្របតាមរដ្ឋធម្មនុញ្ញ នៃព្រះ រាជាណាចក្រកម្ពុជា។
សូមជម្រាបថា ព្រះរាជអាជ្ញារង នៃអយ្យការអមសាលាដំបូងរាជធានីភ្នំពេញ លោក សេង ហៀង នាពេលថ្មីៗនេះ បានសម្រេចចោទប្រកាន់ឈ្មោះ សម រង្ស៉ី ពីបទប្រមាថចំពោះអង្គព្រះមហាក្សត្រ ដោយអនុលោមតាមមាត្រា ៤៣៧ (ស្ទួន) នៃក្រមព្រហ្មទណ្ឌ ដែលត្រូវប្រឈមនឹងការផ្តន្ទាទោសដាក់ពន្ធនាគារពី ១ឆ្នាំ ទៅ៥ឆ្នាំ។ ការចោទប្រកាន់ ធ្វើឡើងបន្ទាប់ពីលោក កើត រិទ្ធ រដ្ឋមន្ត្រីក្រសួងយុត្តិធម៌ បានផ្ញើលិខិតទៅ លោក ច្រឹង ខ្មៅ ព្រះរាជអាជ្ញាអមសាលាដំបូងរាជធានីភ្នំពេញ ឲ្យចាត់វិធានការតាមច្បាប់ជាបន្ទាន់ និងតឹងរឹងបំផុតចំពោះទណ្ឌិត សម រង្ស៉ី ដែលប្រមាថយ៉ាងធ្ងន់ធ្ងរចំពោះអង្គព្រះមហាក្សត្រ៕
ចែករំលែកព័តមាននេះ