រាជធានីភ្នំពេញ ៖ ព្រឹត្តិការណ៍រត់ប្រណាំងពាក់កណ្តាលម៉ារ៉ាតុនអន្តរជាតិចក្រភពខ្មែរដែលត្រូវបានលើកពេលជាបន្តបន្ទាប់ ដោយសារការរាតត្បាតនៃជំងឺកូវីដ-១៩នោះ ក្រោយសម្តេចតេជោនាយករដ្ឋមន្ត្រី ហ៊ុន សែន ប្រកាសបិទបញ្ចប់ព្រឹត្តិការណ៍សហគមន៍ ២៨ វិច្ឆិកា គណៈកម្មការរៀបចំព្រឹត្តិការណ៍នេះ បានកំណត់ពេលវេលានៃការប្រារព្ធព្រឹត្តិការណ៍នេះសាជាថ្មី ដោយគ្រោងធ្វើនៅដើមឆ្នាំ២០២១។
លោក វ៉ាត់ ចំរើន អគ្គលេខាធិការនៃគណៈកម្មាធិការជាតិអូឡាំពិកកម្ពុជាបានបញ្ជាក់ថា មកទល់ពេលនេះគណៈកម្មការរៀបចំព្រឹត្តិការណ៍រត់ប្រណាំងពាក់កណ្តាលម៉ារ៉ាតុនអន្តរជាតិចក្រភពខ្មែរ បានកំណត់ពេលវេលាថ្មីក្នុងការរៀបចំព្រឹត្តិការណ៍នេះរួចរាល់ហើយ។
បើពុំមានការប្រែប្រួលទេ ព្រឹត្តិការណ៍មួយនេះនឹងប្រព្រឹត្តទៅនៅអំឡុងខែមករា ឆ្នាំ២០២១ដោយគ្រោងដាក់ថ្ងៃទី២៤ ខែមករា ឆ្នាំ២០២១។ លោក វ៉ាត់ ចំរើន បញ្ជាក់បែបនេះក្នុងបទសម្ភាសមួយជាមួយសារព័ត៌មានក្នុងស្រុក នៅថ្ងៃទី៣១ ខែធ្នូ ឆ្នាំ២០២០ ។ ទោះបីយ៉ាងណាលោកអះអាងថា កាលបរិច្ឆេទនេះ ពុំទាន់ចូលជាផ្លូវការ១០០ភាគរយនោះទេ ។ លោកនឹងពិគ្រោះយោបល់ជាមួយអាជ្ញាធរខេត្តសៀមរាប និងអាជ្ញាធរជាតិអប្សរា ដើម្បីរៀបចំឯកសារលម្អិតដាក់ឆ្លងជូនថ្នាក់ដឹកនាំក្រសួងទេសចរណ៍ និងភាគីពាក់ព័ន្ធដទៃទៀតសិន។
លោក វ៉ាត់ ចំរើន ចាត់ទុកព្រឹត្តិការណ៍រត់ប្រណាំងពាក់កណ្តាលម៉ារ៉ាតុនអន្តរជាតិចក្រភពខ្មែរ ជាព្រឹត្តិការណ៍ទេសចរណ៍ដែលត្រូវរៀបចំដោយមិនអាចខានបាន ។ ព្រោះវាជាសមិទ្ធផលទេសចរណ៍ដ៏ធំមួយ ក្នុងការជួយទាក់ទាញភ្ញៀវទេសចរជាតិ និងអន្តរជាតិឲ្យមកកម្សាន្តនៅតំបន់ទេសចរណ៍ប្រវត្តិសាស្ត្រអង្គរក្នុងខេត្តសៀមរាប ។ ជាពិសេស វាអាចជួយស្រោចស្រង់វិស័យទេសចរណ៍ក្នុងខេត្តសៀមរាប ដែលរងផលប៉ះពាល់ពីការរាតត្បាតនៃជំងឺកូវីដ-១៩។
ទោះបីយ៉ាងនេះក្តី ការរៀបចំឆ្នាំនេះអាចខុសប្លែកពីឆ្នាំមុនៗ ដ្បិតឆ្នាំនេះតម្រូវឲ្យគណៈកម្មការរៀបចំត្រូវកំណត់ចំនួនមនុស្សក្នុងការចូលរួម ។ ហើយការរៀបចំទៀតសោត គឺធ្វើឡើងក្នុងទម្រង់បរិបទថ្មី ក្រោមយន្តការរឹតបន្តឹងផ្នែកសុវត្ថិភាព ដើម្បីការពារការឆ្លងរីករាលដាលនៃជំងឺកូវីដ-១៩ ។ ជាមួយគ្នានេះ លោក វ៉ាត់ ចំរើន បានក្រើនរំលឹកដល់អ្នកដែលបានចុះឈ្មោះរត់ក្នុងព្រឹត្តិការណ៍នេះ ឲ្យត្រៀមខ្លួនចូលរួមរត់ទាំងអស់គ្នានៅថ្ងៃទី២៤ ខែមករា ឆ្នាំ២០២១។
គួររំលឹកថា ព្រឹត្តិការណ៍រត់ប្រណាំងពាក់កណ្តាលម៉ារ៉ាតុនចក្រភពខ្មែរ ដំបូងគ្រោងរៀបចំនៅថ្ងៃទី៦ ខែធ្នូ ឆ្នាំ២០២០ តែត្រូវបានលើកពេលដោយសារការរាតត្បាតនៃជំងឺកូវីដ-១៩។ ជំងឺរាតត្បាតជាសាកលនេះដែរ បានធ្វើឲ្យព្រឹត្តិការណ៍កីឡាទេសចរណ៍មួយចំនួននៅឆ្នាំ២០២០ ត្រូវបានលុបចោល និងលើកពេលរៀបចំនៅឆ្នាំ២០២១ ៕
ចែករំលែកព័តមាននេះ