រាជធានីភ្នំពេញ ៖ រថយន្តដឹកដីមួយគ្រឿងបានបើកទៅប៉ះកន្ទុយទ្រុងរថយន្តដឹកកម្មករមួយគ្រឿង បណ្តាលឱ្យកម្មការិនីម្នាក់ស្លាប់ ម្នាក់ដាច់ដៃម្ខាង និងម្នាក់ទៀតបាក់ដៃម្ខាង ព្រមទាំងរងរបួសធ្ងន់ស្រាលជាច្រើននាក់ ។ ហេតុការណ៍ដ៏រន្ធត់នេះកើតឡើងកាលពីប្រហែល១ម៉ោងមុននេះ នៅតាមបណ្តោយផ្លូវជាតិលេខ៤ ខាងលិចសាលាក្តីខ្មែរក្រហម ស្ថិតក្នុងភូមិព្រៃបឹង សង្កាត់កន្ទោក ខណ្ឌពោធិ៍សែនជ័យ ។
ប្រភពនៅកន្លែងកើតហេតុបានឱ្យដឹងថា មុនពេលកើតហេតុគេឃើញរថយន្តកូរ៉េ ពណ៌ស ពាក់ស្លាកលេខ ភ្នំពេញ 2R-5250 ដឹកកម្មករជាង៣០នាក់ បើកបរពីលិចទៅកើត ។ ចំណែករថយន្តដឹកដីម៉ាក FUSO ពណ៌ក្រហម ពាក់ស្លាកលេខ ភ្នំពេញ 3A-7001 បើកពីកើតទៅលិច ក្នុងទិសដៅបញ្ច្រាសទិសគ្នាជាមួយរថយន្តដឹកកម្មករ ។
លុះដល់កន្លែងកើតហេតុ ស្រាប់តែរថយន្តដឹកដីរេចង្កូតទៅប៉ះទ្រុងខាងក្រោយរថយន្តដឹកកម្មករបណ្តាលឱ្យកម្មការិនីម្នាក់ដែលឈរតោងជញ្ជាំងទ្រុងរថយន្តស្លាប់ភ្លាមៗ និងកម្មការិនី២នាក់ទៀតរបួសធ្ងន់ ដោយម្នាក់បានដាច់ដៃម្ខាង ឯម្នាក់ទៀតបាក់ដៃម្ខាង ។ ចំណែកកម្មករ-កម្មការិនីដទៃទៀតរងរបួសស្រាល ។
ព័ត៌មានលម្អិតនឹងផ្សាយជូននៅពេលក្រោយ និងនៅលើកាសែតកោះសន្តិភាព
ចែករំលែកព័តមាននេះ