ខេត្តតាកែវ ៖ បន្ទាប់ពីឃើញព័ត៌មានពីបណ្តាញសង្គមហ្វេសប៊ុក ពីការរស់នៅយ៉ាងវេទនារបស់លោកយាយចាស់ជរាឯកោម្នាក់ឯងនោះ កាលពីរសៀលថ្ងៃទី១៣ កក្កដា ២០១៥ លោកកែវ វ៉ាន្នី ប្រធានសាខាចលនាយុវជនកម្ពុជាក្រុម១៥៧ ប្រចាំខេត្តតាកែវ-កំពត បានដឹកនាំក្រុមការងារនាំយកអំណោយឧបត្ថម្ភរបស់លោកបណ្ឌិត ហ៊ុន ម៉ាណែត និងលោកជំទាវ យកទៅជូនដល់លំនៅឋានលោកយាយ ស្ថិតនៅភូមិត្រាចខាងកើត ឃុំស្រែននោង ស្រុកត្រាំក់ ខេត្តតាកែវ ។
លោកមេភូមិត្រាចខាងកើតបានឱ្យដឹងថា លោកយាយមាស អាយុ៩០ឆ្នាំ រស់នៅតែម្នាក់ឯង គ្មានបងប្អូនសាច់ញាតិអ្វីឡើយ បើនិយាយចំ គឺគាត់រស់នៅសព្វថ្ងៃ គឺបានបងប្អូនរស់នៅជិតខាង ជួយផ្តល់ជាបាយសម្លជូនដល់គាត់ ។
ជំនួសមុខឱ្យលោកយាយទុរគត លោកសូមថ្លែងអំណរគុណដល់លោកបណ្ឌិត ហ៊ុន ម៉ាណែត និងលោកជំទាវ ដែលបានឱ្យក្រុមការងារចុះមកជួយឧបត្ថម្ភដល់ចាស់ជរាទុរគត រស់នៅគ្មានទីពឹងនៅពេលនេះ ។
លោកកែវ វ៉ាន្នី តំណាងរបស់លោកបណ្ឌិត ហ៊ុន ម៉ាណែត បានមានប្រសាសន៍ថា អំណោយឧបត្ថម្ភដល់លោកយាយនៅពេលនេះ មានថវិកា២០ម៉ឺនរៀល, អង្ករ១០០គីឡូក្រាម, ទឹកត្រី១យួរ, ទឹកស៊ីអ៊ីវ១យួរ, អំបិល១គីឡូក្រាម, ស្ករ.ស១គីឡូក្រាម, ប៊ីចេងកន្លះគីឡូក្រាម, មីយើង១កេស, ត្រីខ១០កំប៉ុង, ប្រេងឆា១លីត្រ, មុង១, កន្ទេល១ និងឧបត្ថម្ភដល់លោកមេឃុំស្រែននោងចំនួន១០ម៉ឺនរៀល, មេភូមិ អនុភូមិម្នាក់ៗ៥ម៉ឺនរៀល ។
ព័ត៌មានលម្អិតនឹងផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ