រាជធានីភ្នំពេញ ៖ កីឡាប៊ូល ឬប៉េតង់កម្ពុជា បានចាប់ផ្តើមបើកការប្រកួតជ្រើសរើសជើងឯកទូទាំងប្រទេសជាផ្លូវការកាលពីថ្ងៃទី៨ មីនា កន្លងមកនេះ នៅទីលានក្នុងពហុកីឡាដ្ឋានជាតិ។ លោកឯម ហៀង មន្ត្រីបច្ចេកទេសរបស់សហព័ន្ធកីឡាករប៊ូល ឬប៉េតង់កម្ពុជាបានឱ្យដឹងថា ដំណើរការនៃការប្រកួតនេះមានរយៈពេល៦ថ្ងៃ គិតពីថ្ងៃទី៨ មីនា និងបញ្ចប់នៅថ្ងៃទី១៣ មីនា។ រីឯក្លឹប និងសមាគមចូលរួមមានចំនួន២៦ ដោយមានកីឡាករ កីឡាការិនីចំនួន២៤៤នាក់។ ចំណែកវិញ្ញាសាដែលដាក់ឱ្យប្រកួតមានក្របខណ្ឌក១ និងក២ ផ្នែកបុរស៣នាក់ទល់៣នាក់ ២នាក់ទល់២នាក់ បុរស-នារី ប្រកួតម្នាក់ទល់ម្នាក់ បុរស-នារី ប្រកួតដណ្តើមពានសមាគម និងប្រកួតវាយយកពិន្ទុ។ លោកបានបញ្ជាក់ថា ឆ្នាំនេះចំនួនក្លឹបចូលរួមកើនឡើងជាងឆ្នាំមុន ដែលមានតែ២៤ក្លឹបប៉ុណ្ណោះ។
លោកឯម ហៀង បានឱ្យដឹងទៀតថា ថ្វីដ្បិតតែក្រសួងអប់រំ យុវជន និងកីឡា បានជំរុញឱ្យមានការប្រកួតជ្រើសរើសជើងឯកប្រចាំឆ្នាំជារៀងរាល់ឆ្នាំក្តី តែលោកហាក់បីដូចជាមានការព្រួយបារម្ភយ៉ាងខ្លាំង ព្រោះថាបច្ចុប្បន្នយើងមានតែកីឡាករចាស់ៗដដែលៗដែលលេងតាំងពីឆ្នាំ១៩៩៧ មកម៉្លេះ។ លោកបានបញ្ជាក់បន្ថែមទៀតថា នៅឆ្នាំ១៩៩៨ វិស័យកីឡាប៊ូលកម្ពុជាមានការរីកចម្រើនយ៉ាងខ្លាំង គឺយើងធ្លាប់ដណ្តើមបានមេដាយមាស ប្រាក់ និងសំរឹទិ្ធយ៉ាងច្រើនសន្ធឹកសន្ធាប់នៅរាល់ព្រឹត្តិការណ៍នៃការប្រកួតនៅលើឆាកអន្តរជាតិ។ មិនតែប៉ុណ្ណោះកម្ពុជាថែមទាំងធ្លាប់បានបញ្ជូនអ្នកបច្ចេកទេសទៅជួយបង្ហាត់ដល់កីឡាករវៀតណាមទៀតផង។ ប៉ុន្តែបច្ចុប្បន្ន ខណៈដែលគេកំពុងតែមានការរីកចម្រើនយ៉ាងខ្លាំងនោះបែរជាវិស័យកីឡាប៊ូលខ្មែរដែលធ្លាប់តែមានសក្តានុពលបំផុតនៅក្នុងតំបន់បាននិងកំពុងតែមានការធ្លាក់ចុះគួរឱ្យបារម្ភទៅវិញ។
លោកឯម ហៀង បានបញ្ជាក់ទៀតថា ការធ្លាក់ចុះរបស់យើងមិនមានមូលហេតុអ្វីដែលគួរឱ្យពិបាកយល់ទេ កត្តាសំខាន់គឺកីឡាករចាស់ៗ កម្លាំងកាយ និងស្មារតី បូករួមទាំងអារម្មណ៍ទៀតផងនោះ ក៏អន់ខ្សោយទៅតាមហ្នឹងដែរ។ ម្យ៉ាងវិញទៀត យើងអត់បានគិតគូរពីការបណ្តុះបណ្តាលក្មេងៗស្រករក្រោយសម្រាប់ស្នងនោះទេ។ លោកមានប្រសាសន៍ថា មជ្ឍមណ្ឌលជាតិហ្វឹកហ្វឺន ឬក្រសួងអប់រំ យុវជន និងកីឡា គួរតែផ្តល់ថវិកាសម្រាប់ធ្វើការបណ្តុះបណ្តាលកីឡាករ កីឡាការិនីក្មេងៗមួយចំនួនឱ្យបានមកចូលរួមហ្វឹកហាត់ជាមួយកីឡាករ កីឡាការិនីជម្រើសជាតិចាស់ៗសម្រាប់ស្នងតំណែង។ ប៉ុន្តែបច្ចុប្បន្នគឺមិនមានទាល់តែសោះ ម្យ៉ាងវិញទៀតនៅតាមសាលាគួរតែមានពេលវេលា ឬកម្មវិធីលេងកីឡាប៊ូល១ម៉ោង ឬ២ម៉ោង ជាមួយនឹងកម្មវិធីអប់រំផងដែរ។
លោកឯម ហៀង បានលើកយកប្រទេសវៀតណាមមកធ្វើការប្រៀបធៀបថា គេកើតក្រោយយើង តែគេមានកម្មវិធីសម្រាប់ក្មេងលេងប៊ូលនៅក្នុងសាលា ដែលរហូតមកទល់ពេលនេះគេមានការរីកចម្រើនយ៉ាងខ្លាំង។ ដូច្នេះលោកគិតថា ការបណ្តុះបណ្តាលក្មេងៗគឺជាកត្តាសំខាន់បំផុត បើពុំនោះទេ គឺយើងមិនអាចរកបានអ្នកស្នងតំណែងឡើយ៕
ចែករំលែកព័តមាននេះ