ប្រទេសចិន ៖ ពលរដ្ឋក្រុងប៉េកាំងច្រើនពាន់នាក់កាលពីថ្ងៃទី៤ មករា បានឈរបន្តកន្ទុយគ្នាទាំងធាតុអាកាសត្រជាក់ខ្លាំង ដើម្បីចាក់វ៉ាក់សាំងប្រឆាំងវីរុស COVID-19 មុនមានការធ្វើដំណើរប្រសេកប្រសាចរបស់មនុស្សម្នាមកជួបជុំសាច់ញាតិគ្រួសារនាឱកាសបុណ្យចូលឆ្នាំថ្មីចិន ដោយអាជ្ញាធរស្វះស្វែងគ្រប់បែបយ៉ាងដើម្បីចៀសវាងរលកនៃការឆ្លងថ្មី ។
ក្នុងរដ្ឋធានីចិនតែមួយគត់មនុស្សជាង៧៣.០០០នាក់ បានទទួលការចាក់វ៉ាក់សាំងដូសដំបូងរួចហើយ រវាងថ្ងៃទី១ និងថ្ងៃទី៣ មករា ។ នេះជាការអះអាងរបស់សារព័ត៌មានចិន ដែលបញ្ជាក់ថា
បណ្ដានិយោជិតសាលាក្រុងនិងបណ្ដាអ្នកបើករថយន្តបឺសជាអ្នកទទួលបានការចាក់វ៉ាក់សាំងមុន
គេ ។ អាជ្ញាធរសុខាភិបាលចិនប្រកាសកាលពីថ្ងៃទី៣១ ធ្នូថា បានផ្ដល់ភ្លើងខៀវ តែមានលក្ខខណ្ឌចំពោះការចាក់វ៉ាក់សាំងដំបូងមួយផលិតដោយចិនដែលអ្នកផលិតគឹក្រុមហ៊ុន SINOPHARM ដែលអះអាងថាវ៉ាក់នោះរបស់ខ្លួនមានប្រសិទ្ធភាព៧៩% ។
ដោយមិនរង់ចាំការផ្ដល់ភ្លើងខៀវជាផ្លូវការរបស់អាជ្ញាធរវេជ្ចសាស្ត្រ ចិនបានចាប់ផ្ដើមរួច ហើយការចាក់វ៉ាក់សាំងឲ្យមនុស្សច្រើនលាននាក់ ចាប់តាំងពីរដូវក្ដៅមកពិសេសបណ្ដាបុគ្គលិកពេទ្យ និស្សិតដែលចេញទៅរៀននៅក្រៅប្រទេសនិងបណ្ដាអ្នកការទូត ។ វ៉ាក់សាំងមិនតិចជាង៤,៥លានដូសឡើយត្រូវបានចាក់រួច ។
ប្រទេសចិនដែលវីរុស COVID-19 លេចមុនគេកាលពីមួយឆ្នាំមុន គ្រោងជម្រុញដល់ការចាក់វ៉ាក់សាំង ខណៈបុណ្យចូលឆ្នាំចិនជិតមកដល់ដែលនាឆ្នាំនេះចាប់ពីថ្ងៃទី១២ កុម្ផៈទៅ ។ បណ្ដា
ទស្សនីយភាពនានានាឱកាសបុណ្យនោះ ពិតជាមានច្រើន ហើយតាមធម្មតាអំឡុងពេលនោះ មានមនុស្សចេញធ្វើដំណើរយ៉ាងប្រសាចបំផុតនៃពិភពលោក ខណៈពលករច្រើនលាននាក់ចាកចេញពីបណ្ដាទីក្រុងធំៗដើម្បីទៅជួបជុំសាច់ញាតិគ្រួសារពួកគេ ។ គេវាយតមៃ្លថាអំឡុងពេលឈប់សម្រាកបុណ្យនេះអ្នកធ្វើដំណើរតាមរថភ្លើងនៅចិនអាចមានដល់ជាង៤០៧លាននាក់ ។
ក៏ទោះបីប្រទេសនេះជម្នះបានលើការឆ្លងរាលដាលនៃវីរុសនោះក្ដី តែកាលពីថ្ងៃទី៤ មករា អាជ្ញាធរសុខាភិបាលរាយការណ៍ពីអ្នកឆ្លងថ្មី៣៣នាក់រយៈពេល២៤ម៉ោងចុងក្រោយនេះ ៕ ដកស្រង់ចេញពីវេបសាយ ៖ yahoo
ចែករំលែកព័តមាននេះ