ប្រទេសជប៉ុន ៖ បណ្ដាសារព័ត៌មានជប៉ុនរាយការណ៍នាថ្ងៃទី៣មករាថា បុរសម្នាក់អាយុ២៩ឆ្នាំបានត្រូវចាប់ខ្លួន ក្រោយពីរូបគេលួចចូលដោយខុសច្បាប់ ទៅក្នុងព្រះរាជដំណាក់ព្រះចៅអធិរាជជប៉ុន ព្រះចៅណារូហ៊ីតូនៅក្រុងតូក្យូដោយជននេះ សំងំក្នុងនោះដល់២ម៉ោងមុនពេលរកឃើញ។
បុរសនោះដែលអត្តសញ្ញាណរបស់គេមិនត្រូវបានលាតត្រដាង បានចូលកាលពីយប់ថ្ងៃទី២មករា ក្នុងព្រះដំណាក់ស្ថិតក្នុងប្លុកព្រះបរមរាជវាំង ស្ថិតក្នុងសង្កាត់អាកាសាកាកណ្ដាលក្រុងតូក្យូ ដោយឆ្លងពីផ្ទះភៀវដែលនៅជាប់គ្នា។ នោះជាសេចក្ដីរាយការណ៍របស់FUJI NEWS NETWORK។
ជននេះត្រូវចាប់ខ្លួនក្រោយរយៈពេល២ម៉ោងដោយកងរក្សាព្រះអង្គ នៅជិតព្រះដំណាក់ម្ចាស់ក្សត្រីយូរីកូម្ចាស់មីងរបស់ព្រះចៅណារូហ៊ីតូព្រះជន្ម៩៧ព្រះវស្សា។ ទូរទស្សន៍FUJI NEWS NETWORKដែលដកស្រង់ប្រភពព័ត៌មានប៉ូលិសបន្តថា បុរសនោះលួចចូលព្រះបរមរាជវាំង ឆ្លងកាត់តាមខ្លោងទ្វារសំខាន់នៃផ្ទះភ្ញៀវ ដែលពុំមានការយាមកាម។
ការលុកចូលនេះ ក៏ត្រូវបានរាយការណ៍ដោយទូរទស្សន៍ TBS NEWS ដែលអះអាងថា ជនសង្ស័យរៀបរាប់ប្រាប់ប៉ូលិសថា រូបគេមានបំណងចូលគាល់បណ្ដាសមាជិកគ្រួសាររាជវង្ស។ គេមិនដឹងថាតើបុរសនេះពិតជាមានការប្រាស្រ័យទាក់ទងជាមួយសាច់ញាតិគ្រួសាររាជវង្សដែរឬយ៉ាងណាឡើយ តែបណ្ដាសារព័ត៌មានអះអាងថា មនុស្សនោះមិនរងរបួសឡើយក្នុងឧប្បត្តិហេតុនេះ។
ដោយឡែកចំពោះការឆ្លងរាលដាលនៃវីរុសCOVID-19 ដែលកំពុងមានសភាពខ្លាំងក្លានៅជប៉ុនពិសេសនៅក្រុងតូក្យូ នាយករដ្ឋមន្ត្រីជប៉ុនលោកយូស៊ីហ៊ីដស៊ូហ្គា ថ្លែងនាថ្ងៃទី៤មករាថា រដ្ឋាភិបាលរបស់លោកគ្រោងចេញការប្រកាសអាសន្នសម្រាប់រាជធានីតូក្យូ និងតំបន់ជុំវិញខណៈការឆ្លងថ្មីៗបន្តកើនឡើងយ៉ាងលឿន ក្នុងប្រទេសពិសេសនៅក្រុងតូក្យូ។
នៅជប៉ុនកាលពីថ្ងៃទី៣១ធ្នូ មានអ្នកឆ្លងវីរុសដល់៤.៥២០នាក់ ក្នុងនោះជាង១.៣០០នាក់នៅក្រុងតូក្យូ។ អាជ្ញាធរក្រុងនោះបានស្នើដល់រដ្ឋាភិបាល ឲ្យចេញការប្រកាសអាសន្ននៅរាជធានីនិងតំបន់ជុំវិញ៕ ដកស្រង់ចេញពីវេបសាយ ៖ yahoo
ចែករំលែកព័តមាននេះ