រាជធានីភ្នំពេញ ៖ កញ្ញា រ៉ា សូនីតា ហៅព្រះកាយច័ន្ទ មានអាយុទើបតែ១៦ឆ្នាំ តែមានជំនាញសិល្បៈច្រើន គឺនាងមានជំនាញជាអ្នករបាំបុរាណ និងជាអ្នកចម្រៀងកិត្តិយសក្នុងកម្មវិធីទូរទស្សន៍ ព្រមទាំងជាអ្នកសម្តែងកាយវិការខារ៉ាអូខេ និងភាពយន្តផងដែរ ។ លើសពីនេះ នាងកំពុងធ្វើជាពិធីការិនីប្រចាំកម្មវិធីប្រគំតន្ត្រីយុវវ័យរីករាយនៃស្ថានីយទូរទស្សន៍អប្សរាប៉ុស្តិ៍លេខ១១ ផ្សាយផ្ទាល់រាល់ថ្ងៃអាទិត្យ ។
កញ្ញា រ៉ា សូនីតា ចាប់កំណើតក្នុងវង្សត្រកូលជាអ្នកសិល្បៈល្ខោនបាសាក់ ។ នាងសិក្សាចំណេះទូទៅថ្នាក់ទី១១នៅសាកលវិទ្យាល័យភូមិន្ទវិចិត្រសិល្បៈ និងសិក្សាឆ្នាំទី៥ផ្នែករបាំបុរាណ ។ នាងមានស្រុកកំណើតនៅស្រុកកៀនស្វាយ ខេត្តកណ្តាល ឪពុកឈ្មោះពៅ ច័ន្ទតារា ជាសិល្បករល្ខោនបាសាក់ និងម្តាយឈ្មោះមុំ សុខខេង ជាមេផ្ទះ ។ នាងជាកូនពៅក្នុងចំណោមបងប្អូន២នាក់ ក្នុងនោះបងប្រុសរបស់នាងជាអ្នករបាំប្រពៃណី ។
កន្លងមកសូនីតាធ្លាប់ចូលរួមរាំរបាំបុរាណក្នុងកម្មវិធីជាតិរៀងរាល់ឆ្នាំជាមួយក្រុមសិល្បៈនៃសាកលវិទ្យាល័យភូមិន្ទ និងវិចិត្រសិល្បៈ ។ ក្រៅពីនេះនាងធ្លាប់ចេញទៅរាំរបាំបុរាណនៅក្នុងកម្មវិធីមួយចំនួនទៀតនៅប្រទេសចិន និងប្រទេសជប៉ុន ។ នាងក៏ធ្លាប់ចូលរួមច្រៀងជាកិត្តិយសនៅលើឆាកប្រគំតន្ត្រីចុងសប្តាហ៍តាមស្ថានីយទូរទស្សន៍នានាផងដែរ ។ ចំពោះវិស័យសំដែងនាងធ្លាប់សម្តែងកាយវិការខារ៉ាអូខេ ឱ្យផលិតកម្មក្រៅប្រទេសមួយចំនួននិងធ្លាប់ចូលរួមសម្តែងភាពយន្តភាគបាន២រឿង គឺរឿង «ល្មមហើយលោកប្តី» ដែលបានចាក់ផ្សាយតាមកញ្ចក់ទូរទស្សន៍ប៉ុស្តិ៍លេខ៥ និងរឿង«គូព្រេងចម្លែក » របស់ស្ថានីយទូរទស្សន៍ CTN តែនាងមិនទាន់ក្លាយជាតួឯកទេ បានត្រឹមតែជាតារាកិត្តិយសប៉ុណ្ណោះ ។
កញ្ញារ៉ា សូនីតា ចិត្តសប្បាយរីករាយដោយបានកើតក្នុងត្រកូលសិល្បៈ ហើយថែមទាំងបានសិក្សារៀនសូត្រសិល្បៈតាំងពីតូចមក ហើយជោគជ័យក្នុងអាជីពជាបន្តបន្ទាប់ ។ ទៅថ្ងៃអនាគត នាងចង់ក្លាយជាអ្នកសម្តែងកាយវិការខារ៉ាអូខេ និងភាពយន្តមានកេរ្តិ៍ឈ្មោះល្បី ។ ទោះបីមានការមមាញឹកក្នុងការសិក្សាក្តីនាងឆ្លៀតពេលទៅសម្តែងផង ធ្វើជាពិធីការិនីផង ហើយពេលនេះប្រិយមិត្តទស្សនិកជនកំពុងតែមានការចាប់អារម្មណ៍ទៅលើរូបនាង ៕
ចែករំលែកព័តមាននេះ