បន្ទាយមានជ័យ ៖ ពាក្យ ឬឈ្មោះថ្មឆ័ត្រ តាមពិតស្មានថា គ្រាន់តែជាឈ្មោះភូមិដែលគេហៅតគ្នាៗដឹងអីជា ថ្មអច្ឆរិយៈដុះទូលលើថ្មមើលទៅដូចឆ័ត្រមែនទែន ហើយអ្នកស្រុកតែងតែទៅមកគោរពបូជាពេលធ្វើពិធីអ្វីមួយមិនដាច់ ។
ថ្មឆ័ត្រ មានទីតាំងក្នុងដីអ្នកធំម្នាក់(លោកអ៊ឹង ហួតអតីតនាយករដ្ឋមន្ត្រីទី១)ស្ថិតក្នុងភូមិថ្មឆ័ត្រឃុំគោករមៀតស្រុកថ្មពួកខាងកើត ផ្លូវជាតិលេខ២៥៦៣ ប្រហែល១០០ម៉ែត្រ និងមានតាំងពីដើមរៀងមកមិនមែនជាថ្មគេស្ទូចដាក់នោះទេ ។
គ្រួសារមួយដែលស្នាក់នៅចំណុចកើតហេតុនិយាយថា គាត់ទើបតែទៅរស់នៅទីនោះជួយមើលថែដីឲ្យគេ៤ឆ្នាំ ប៉ុន្តែឃើញអ្នកស្រុកចេញចូលទៅអុចធូបខ្លះក៏មានដង្វាយខ្លះចាក់ម្សៅអង្អែលលើជញ្ជាំងថ្មឆ័ត្រនោះ ដើម្បីសុំលេខឆ្នោត ។ ព្រោះតែឃើញគេចេញចូលអង្អែលថ្ម ខ្លះចាក់ត្រូវ គ្រួសារខាងលើថា កន្លងមកគាត់ក៏ធ្លាប់យកម្សៅចាក់អង្អែលជញ្ជាំងថ្មឆ័ត្រផ្សងរកសំណាងម្តងដែរ ដែលកាលនោះគាត់ឃើញលេខ០៦ ផុសចេញពីថ្ម តែដោយគាត់មិនមែនជាអ្នកប្រព្រឹត្តល្បែងក៏ចាក់ផ្សងលេងត្រឹមប្រាក់១០០០រៀល ត្រូវឆ្នោតដូចអ្វីដែលប៉ងប្រាថ្នាមែន ។
ជួបសម្ភាសន៍លោក កែវវុទ្ធី មេភូមិថ្មឆ័ត្រ លោកប្រាប់ថា ថ្មឆ័ត្រនេះ គឺគ្មានអ្នកដឹងរឿងពិតទេ ប៉ុន្តែឮតគ្នាៗតាំងពីជំនាន់ដើមមកថា ពីមុនល្បីស័ក្តិសិទ្ធណាស់ ហើយក្នុងអំឡុងសង្គ្រាមត្រីភាគីទីតាំងខាងលើជាបន្ទាយទ័ពព្រៃ (ទ័ពប៉ារ៉ា)ហើយថា នៅឆ្នាំ១៩៩៣ ទីនោះក៏បានប្រែក្លាយពីសមរភូមិប្រយុទ្ធទៅជាភូមិស្របច្បាប់ និងដាក់ឈ្មោះថា ភូមិថ្មឆ័ត្រតែម្តង ។ មេភូមិរូបនេះបន្តថា ពេលអ្នកស្រុករៀបចំពិធីអ្វីមួយតែងតែនាំគ្នាទៅកាន់ទីនោះដើម្បីបួងសួងសុំសេចក្តីសុខ និងរកស៊ីមានបាន ។ មិនតែប៉ុណ្ណោះលោកថា ព្រោះតែមានជំនឿលើបារមីថ្មឆ័ត្រអ្នកស្រុកខ្លះក៏ទៅបួងសួងរកលាភសក្ការៈផ្សេងៗ និងចាក់ម្សៅអង្អែលលើជញ្ជាំងថ្មសុំលេខឆ្នោតជាដើម ។
លោកមេភូមិបញ្ជាក់ថា កន្លងមកលោកជំទាវម៉ៅ ម៉ាឡៃ ភរិយាឧត្តមរបស់លោកឧបនាយករដ្ឋមន្ត្រី កែគឹមយ៉ាន ប្រធានអាជ្ញាធរជាតិប្រយុទ្ធប្រឆាំងគ្រឿងញៀន និងជាប្រធានក្រុមការងារថ្នាក់ជាតិចុះជួយខេត្តបន្ទាយមានជ័យបានធ្វើដំណើរទៅទីតាំងថ្មឆ័ត្រ ហើយមានប្រសាសន៍ប្រាប់អ្នកស្រុកថា និងកសាងផ្លូវតភ្ជាប់ពីផ្លូវជាតិ២៥៦៣ឆ្ពោះទៅទីតាំងនោះ និងរៀបចំកែលម្អរបរិវេណនោះឲ្យទៅជាកន្លែងទីគោរពសក្ការៈបូជារបស់អ្នកស្រុក ពិសេសដើម្បីទាក់ទាញភ្ញៀវទេសចរណ៍ឲ្យទៅកម្សាន្តផងដែរ ៕
ចែករំលែកព័តមាននេះ