ព្រំដែនព្រះវិហារ ៖ ព្រឹកថ្ងៃព្រហស្បតិ៍ ទី៣ មីនា ២០១១ នេះ ស្ថានភាពយោធានៅព្រំដែនប្រាសាទព្រះវិហារមានសភាពស្ងប់ស្ងាត់ធម្មតា ប៉ុន្តែទាហានកម្ពុជានៅតែមានការប្រុងជើងការខ្ពស់ និងឈរជើងយ៉ាងរឹងមាំក្នុងការការពារបូរណភាពទឹកដី ដែលសត្រូវសៀមឈ្លានពាន តែងតែចង់រំលោភយកដោយឥតអៀនខ្មាស នោះ ។ នេះបើយោងតាមលោកនាយឧត្តមសេនីយ៍ជា តារា អគ្គមេបញ្ជាការរងនៃកងយោធាពលខេរមភូមិន្ទកម្ពុជា ដែលបានប្រាប់កោះសន្តិភាពតាមទូរស័ព្ទនៅប៉ុន្មាននាទីមុននេះ ។
គួរបញ្ជាក់ថា ការថ្លែងរបស់លោកនាយឧត្តមសេនីយ៍ជា តារា នាពេលនេះធ្វើឡើងនៅគ្រាដែលអនុព័ន្ធយោធានៃស្ថានទូតនានាប្រចាំព្រះរាជាណាចក្រកម្ពុជា គ្រោងនឹងចុះទៅទស្សនកិច្ចនៅប្រាសាទព្រះវិហារនាវេលាព្រឹកថ្ងៃព្រហស្បតិ៍ ទី៣ មីនា នេះ តាមការអញ្ជើញរបស់ក្រសួងការពារជាតិកម្ពុជា ។ ដំណើរទស្សនកិច្ចរបស់សេនានុព័ន្ធយោធានៃស្ថានទូតចំនួន១៩ប្រទេសប្រចាំកម្ពុជាទៅកាន់ប្រាសាទព្រះវិហារនៅថ្ងៃនេះ បានធ្វើឱ្យមន្ត្រីយោធាសៀមប្រចាំតំបន់ទល់មុខប្រាសាទព្រះវិហារ និងមន្ត្រីជាន់ខ្ពស់សៀមនៅក្រុងបាងកក មួយចំនួនមិនសប្បាយចិត្តដោយនិយាយថា ដំណើរទស្សនកិច្ចនឹងធ្វើឱ្យស្ថានភាពយោធារវាងប្រទេសទាំង២មានសភាពតានតឹងឡើងវិញ ។
មន្ត្រីកម្ពុជាបានបញ្ជាក់អះអាងថា ដំណើរទស្សនកិច្ចអនុព័ន្ធយោធារបស់ស្ថានទូតនានាប្រចាំប្រទេសកម្ពុជាទៅកាន់ប្រាសាទព្រះវិហារនេះគឺធ្វើឡើងនៅក្នុងទឹកដីកម្ពុជាសុទ្ធសាធ មិនពាក់ព័ន្ធនឹងសៀមទេ ហើយសៀមខ្លួនឯងក៏ធ្លាប់ធ្វើបែបនេះ គឺនាំអនុព័ន្ធយោធារបស់ស្ថានទូតនានាប្រចាំក្រុងបាងកកទៅទស្សនកិច្ចនៅតាមខ្សែបន្ទាត់ព្រំដែនជាពិសេសផ្ទះក្រហមរបស់សៀមនោះរួចមកហើយ ៕
ចែករំលែកព័តមាននេះ