ឧហ្សាហកម្មអវកាសកូរ៉េហៅកាត់ថា KAI ឱ្យដឹងកាលពីថ្ងៃទី៨ កក្កដា ២០១៥ថា កូរ៉េខាងត្បូងនឹងចាយប្រាក់៨៨៨លានដុល្លារបង្កើតផ្កាយរណបធុនកណ្តាលនៅឆ្នាំ២០២៥ ដើម្បីបន្ថែមការរុករកលើលំហអាកាសក្នុងរយៈពេលវែង ។
លោក Ha Sung Yong អគ្គនាយក KAI ឱ្យដឹងថា «យើងបាន និងកំពុងរៀបចំយុទ្ធសាស្ត្រដើម្បីលក់ផលិតផលផ្កាយរណប និងយន្តហោះក្នុងទីផ្សារអវកាសពិភពលោក ខណៈពេលដែលក្រុមហ៊ុនកូរ៉េមិនទាន់បង្ហាញវត្តមាននៅឡើយទេ ។ យើងទទួលបានគម្រោងនោះបន្ទាប់ពីត្រូវបានជ្រើសរើសដោយគម្រោងអភិវឌ្ឍផ្កាយរណបរបស់រដ្ឋាភិបាលកូរ៉េ » ។
គោលបំណងធំនៃការបង្កើតផ្កាយរណបនេះគឺប្រើប្រាស់ប្រព័ន្ធវិទ្យាសាស្ត្រស្រាវជ្រាវ និងចាប់រកទីតាំងណាមួយពីលំហអាកាសដោយតភ្ជាប់ប្រព័ន្ធទាក់ទងពីផែនដី ។ នេះគឺជាគម្រោងផ្កាយរណបទី១៣ របស់ប្រទេសកូរ៉េ ដែលផ្កាយរណបខ្លះមានទម្ងន់ដល់ទៅ១៥០០ គីឡូក្រាមឯណោះ ។ ផ្កាយរណប៦ក្នុងចំណោម១៣នោះស្ថិតក្នុងប្រតិបត្តិការយ៉ាងល្អប្រសើរ ចំណែកផ្កាយរណបដទៃទៀតលែងប្រើប្រាស់បន្ទាប់ពីរយៈពេលប្រតិបត្តិការប៉ុន្មានឆ្នាំក្រោយ ។
កូរ៉េគឺជាប្រទេសសេដ្ឋកិច្ចធំទី៤ ស្ថិតក្នុងទ្វីបអាស៊ី ដែលបានចំណាយលុយ១៣២លានដុល្លារលើគម្រោងស្រាវជ្រាវតាំងពីឆ្នាំ១៩៩៣ ដល់ឆ្នាំ២០១២ ។ កាលពីប៉ុន្មានទសត្សរ៍មុនប្រទេសរុស្ស៊ីបានជួយផលិត Naro ដែលជារ៉ុក្កែតអវកាសដំបូងគេរបស់កូរ៉េ ៕
ចែករំលែកព័តមាននេះ