រាជធានីភ្នំពេញ ៖ ខ្លះដើរនៅលើដី ខ្លះហោះហើរ ទាបៗ សត្វព្រាបរាប់រយក្បាលនៅមុខព្រះបរមរាជវាំង បង្កើតសោភ័ណភាពគាប់ភ្នែកអ្នកទេសចរ ។ អ្នកទេសចរនិយមទៅបោះចំណី និងប្រលែងលេងនឹងសត្វព្រាបទាំងនោះនាវេលាល្ងាចត្រជាក់ ។ អ្នកទេសចរកាន់តែច្រើនឡើងនិយមទៅកម្សាន្តនឹងទីធ្លាដែលហាក់ដូចជា «អាណាចក្រនៃសត្វព្រាប» ។
ក្នុងទឹកមុខសប្បាយរីករាយនៅពេលលោកអៀ ថេង នាំកូនប្រុសឈ្មោះអៀ លីងខេង ទៅទស្សនាព្រាបនៅមុខវាំង កាលពីពេល ថ្មីៗនេះ និយាយថា ពីមុននៅមុខព្រះបរមរាជវាំងមិនសូវមានសត្វព្រាបច្រើនទេ ប៉ុន្តែឥឡូវសត្វព្រាបច្រើនមីរដេរដាសពេញទីលានសួនច្បារ និងដងផ្លូវមើលទៅដូចជាអាណាចក្រព្រាប ។ ហ្វូងព្រាបច្រើនអនេកមើលទៅប្លែកភ្នែក ប្លែកអារម្មណ៍ និងជាទីតាំងកម្សាន្តល្អមួយសម្រាប់ភ្នំពេញ ។
ហ្វូងព្រាបទាញការចាប់អារម្មណ៍ទស្សនាទាំងខ្មែរ ទាំងបរទេស ។ «ខ្ញុំឱ្យតែទំនេរមួយខែ ពីពីរទៅបីដងជូនកូនមកទីនេះមើលទេសភាព ទិញចំណីឱ្យព្រាប ហើយមើលទៅកូនសប្បាយរីករាយ ។ នៅពេលឃើញព្រាបច្រើនគេរត់ប្រដេញលេងហាក់គ្មានគិតអ្វីទេ ដែលនេះជាការចង់ឱ្យកូនសប្បាយ ណាមួយមិនចង់ចំណាយពេលទៅឆ្ងាយ ព្រោះរវល់ការងារ ឆ្លៀតបានតែពេលទំនេរតិចតួចឌុបកូនមកលេងតាមដងទន្លេមុខវាំង កោះពេជ្រ និងវត្តភ្នំជាដើម ។
ខ្ញុំចង់ឱ្យប្រជាជនទាំងអ្នកខេត្ត និងអ្នកក្រុងពេលទៅតំបន់កម្សាន្តនានាគួរតែចេះរក្សាបរិស្ថាន និងមានសុជីវធម៌ល្អ ក្នុងពេលបរទេសមកថាយើងជាពូជសាសន៍ស្លូតបូត រួសរាយ រាក់ទាក់»។ លោកអៀ ថេង និយាយបែបនេះ ។
ចំណែកស្ត្រីឈ្មោះរិន សុភាព បាននាំកូនស្រីតូចម្នាក់ទៅទស្សនាព្រាបនៅមុខវាំងដែរ ។ កូនស្រីគាត់តែងតែទៅមើលព្រាប និងបោះចំណីឱ្យពួកវាស៊ីជា រឿយៗ ។ ក្រៅពីបោះចំណីឱ្យស៊ីកូនតូចរបស់គាត់រត់ដេញចាប់ពួកវាលេងយ៉ាងសប្បាយរីករាយ ។
អ្នកស្រីរិន សុភាព អំពាវនាវដល់អ្នកទេសចរដែលទៅកម្សាន្តនៅតំបន់តាមដងទន្លេមុខព្រះបរមរាជវាំងចូលរួមថែរក្សាបរិស្ថានដោយវេចខ្ចប់កាកសំណល់ហូបចុកឱ្យបានស្អាតនិងយកដាក់នៅធុងសំរាម ។ តំបន់នោះមានអ្នកទេសចរច្រើនណាស់ទៅទស្សនា ដូច្នេះគួរតែចូលរួមថែរក្សាឱ្យមានសោភ័ណភាព និងអនាម័យល្អ ។
ស្ត្រីឈ្មោះកាន់ យ៉ា ជាអ្នកលក់ចំណីសត្វព្រាបបានឱ្យដឹងថា តាំងពីនៅមុខព្រះបរមរាជវាំងមានសត្វព្រាបច្រើនមក អ្នកទេសចរកាន់តែច្រើនឡើងពេញនិយមទៅទស្សនា និងបោះចំណីឱ្យព្រាបស៊ីជាការកម្សាន្ត ។ អ្នកទេសចរមានទាំងខ្មែរ ទាំងបរទេស ហើយគេចូលចិត្តទៅកម្សាន្តនៅពេលល្ងាចត្រជាក់ និងព្រឹកព្រលឹម ។ ទន្ទឹមអ្នកទេសចរកើនឡើងជាលំដាប់ អ្នកលក់ចំណីព្រាបកាន់តែកើនឡើងដែរ ។ របរនេះជួយឱ្យអ្នកក្រីក្ររកបានប្រាក់ចំណូលសម្រាប់ក្រុមគ្រួសារ ។ ទោះជាយ៉ាងណាក្តី អ្នកស្រីកាន់ យ៉ា និយាយថា «ខ្ញុំបារម្ភដែរព្រោះមានអ្នកលក់ច្រើនពេកខ្លាចតែប៉ូលិសសណ្តាប់ធ្នាប់ដេញទេ ដោយសារតែពួកយើងមិនរៀបរយ» ។
លោកមាស សុធា ជាជាងថតរូបនៅតំបន់មុខវាំងបានឱ្យដឹងថា ការថតរូបដ្បិតតែធ្លាក់ចុះជាងមុនតែនៅតែមានមនុស្សថតរូបជាប្រចាំដែរ ព្រោះឥឡូវថតភ្លាមយកភ្លាម មិនបាច់ចាំយូរដូចមុនឡើយ ។ លោកមាស សុធា គ្មានគម្រោងប្តូរអាជីពថតរូបទេ ព្រោះថ្វីដ្បិតតែអ្នកភ្នំពេញមិនសូវថតដោយសារតែគេមានទូរស័ព្ទ ទំនើបៗ ថតខ្លួនឯង តែនៅមានអ្នកមកពីជនបទថតភ្លាមយកភ្លាម ។ ទោះបីប្រាក់កម្រៃពីរបរថតរូបនៅមុខវាំងធ្លាក់ចុះជាងមុន តែគ្រាន់បើជាងទៅរកការងារផ្សេង ព្រោះធ្លាប់រកស៊ីនៅទីនោះយូរឆ្នាំមកហើយ ។ លោកមាស សុធា កត់សម្គាល់ឃើញថា វត្តមានព្រាបនៅមុខវាំងទាក់ទាញបានអ្នកទេសចរច្រើនឡើងជាលំដាប់ទៅកម្សាន្តទីនោះ ។
ចំពោះកងកម្លាំងសណ្តាប់ធ្នាប់មើលការខុសត្រូវនៅតំបន់មុខព្រះបរមរាជវាំងបានឱ្យដឹងថា ពួកលោកតែងតែចាត់កម្លាំងសម្រួលចរាចរណ៍កុំឱ្យកកស្ទះ និងណែនាំឱ្យអ្នកលក់ដូរ ផ្សេងៗក្នុងនោះមានទាំងអ្នកលក់ចំណីព្រាបផងត្រូវមានអនាម័យ និងសណ្តាប់ធ្នាប់កុំឱ្យរំខានអារម្មណ៍អ្នកទេសចរ ៕
ចែករំលែកព័តមាននេះ