ខេត្តព្រះសីហនុ ៖ សត្វស្វាដែលបានវាយប្រហារខាំម្ចាស់ ដែលជាអតីតមេឃុំវាលរេញ បណ្តាលឱ្យរងរបួសធ្ងន់នោះ កាលពីវេលាម៉ោង០១រសៀលថ្ងៃទី០៩ កក្កដា នេះ ត្រូវបានសម្លាប់ហើយ ដោយប្រើកាំភ្លើងខ្យល់ ។
ប្រភពបានឱ្យដឹងថា មុនពេលដែលគេកំពុងរៀបចំសម្លាប់សត្វស្វានេះ ត្រូវបានវារើដាច់ច្រវ៉ាក់ចូលទៅផ្ទះអ្នកស្រុក ទំរាំតែចាប់សម្លាប់បាន គឺប្រើរយៈពេលច្រើនម៉ោង ។
ប្រភពបន្តថា សព្វថ្ងៃ នៅផ្ទះរបស់ជនរងគ្រោះ គឺមានចិញ្ចឹមសត្វច្រើនដូចជាត្រី, ស្វា១ក្បាល, ក្រពើ២ក្បាល នៅក្នុងដីឡូត៍របស់គាត់។
គួររំលឹកថា អតីតមេឃុំវាលរេញម្នាក់ ត្រូវសត្វស្វាដែលខ្លួនចិញ្ចឹមវាយប្រហារបណ្តាលឱ្យរងរបួសធ្ងន់ធ្ងរ ខណៈគាត់ចូលទៅដាក់ចំណីចេកឱ្យស៊ី បង្កឱ្យភ្ញាក់ផ្អើលកាលពីវេលាម៉ោង០៦ព្រឹកថ្ងៃទី០៩ កក្កដា ២០១៥ នេះ ស្ថិតនៅចំណុចភូមិបឹងវែង ឃុំវាលរេញ ស្រុកព្រៃនប់ ។
ប្រភពបានឱ្យដឹងថា ជនរងគ្រោះឈ្មោះតាលុង ឈី អាយុ៧១ឆ្នាំ មានទីលំនៅក្នុងភូមិកើតខាងលើ ។ ចំណែកសត្វស្វាប្រភេទឈ្មោល មានទម្ងន់១០គីឡូក្រាម ។
ប្រភពបន្តថា មុនពេលកើតហេតុ ជនរងគ្រោះបានទិញចេកទុំមួយស្និតយកទៅឱ្យស្វាគាត់ស៊ី ដែលសកម្មភាពនេះគាត់ធ្វើជារៀងរាល់ព្រឹក ។ ស្រាប់តែនៅថ្ងៃកើតហេតុ ពេលគាត់ហុចចេកឱ្យស៊ីអស់២ មិនដឹងយ៉ាងម៉េច ស្វានោះហក់មកទាំងជាប់ច្រវាក់ចាប់គាត់ខាំយកតែម្តង តែសំណាងល្អ វាចាប់បានត្រឹមតែភ្លៅមកក្រោមខាំជង្គង់ទាំង២ បណ្តាលឱ្យរងរបួសធ្ងន់ធ្ងរតែម្តង ហើយត្រូវក្រុមគ្រួសារបញ្ជូនទៅសង្គ្រោះនៅមន្ទីរពេទ្យ ដោយដេរអស់ជាច្រើនថ្នេរ ។
ប្រភពបន្តទៀតថា បន្ទាប់ពីស្វានោះវាយប្រហារម្ចាស់រួច បានអង្គុយលិតឈាមធ្វើព្រងើយ ។
ចែករំលែកព័តមាននេះ