ខេត្តមណ្ឌលគិរី ៖ សីតុណ្ហភាពត្រឹម១៥ទៅ១៨អង្សារ នាថ្ងៃចុងក្រោយនៃឆ្នាំ២០២០ ក្នុងខេត្ត មណ្ឌលគិរី កំពុងអន្ទងអ្នកទេសចរណ៍ចូលទៅលេងកម្សាន្តយ៉ាងណែនណាន់តាន់តាប់ពេញដង ផ្លូវជាតិលេខ៧៦ ស្ថិតក្នុងក្រុងសែនមនោរម្យ ហើយអ្នកដែលសប្បាយចិត្តជាងគេ…
ខេត្តមណ្ឌលគិរី ៖ សីតុណ្ហភាពត្រឹម១៥ទៅ១៨អង្សារ នាថ្ងៃចុងក្រោយនៃឆ្នាំ២០២០ ក្នុងខេត្ត មណ្ឌលគិរី កំពុងអន្ទងអ្នកទេសចរណ៍ចូលទៅលេងកម្សាន្តយ៉ាងណែនណាន់តាន់តាប់ពេញដង ផ្លូវជាតិលេខ៧៦ ស្ថិតក្នុងក្រុងសែនមនោរម្យ ហើយអ្នកដែលសប្បាយចិត្តជាងគេ គឺអាជីវករលក់ខោអាវរងាជជុះឯណោះវិញ។
គិតត្រឹមព្រឹកថ្ងៃទី៣១ ខែធ្នូ ឆ្នាំ២០២០នេះ ដែលជាថ្ងៃចុងក្រោយសម្រាប់ឆ្នាំ២០២០ ហើយត្រូវជំនួសដោយឆ្នាំ២០២១ នាពេលប៉ុន្មានម៉ោងខាងមុខនេះ អ្នកទេសចរណ៍កំពុងតែសម្រុកធ្វើដំណើរពីគ្រប់ទិសទីចូលទៅកម្សាន្តលំហែអារម្មណ៍លើទឹកដីសម្បូរព្រៃភ្នំនាភាគឦសាន ដែលមានវាលស្មៅដ៏ធំល្វឹងល្វើយ ព្រៃឈើរាប់លានហិចតា ទឹកជ្រោះទឹកអូរមានគ្រប់ទីកន្លែង ក្រោយពួកគេបាននឿយហត់ក្នុងការបំពេញការងារ និងសង្ងំនៅមួយកន្លែង ដោយសារជំងឺកូវីដ១៩ អស់រយៈពេលពេញមួយឆ្នាំ។
បើតាមអ្នកមើលការខុសត្រូវនៅតំបន់ឧទ្យានប៊ូស្រា បានឲ្យដឹងថា បន្ទាប់ពីព្រឹត្តិការណ៍២៨ វិច្ឆិកា បានធូរស្រាល ភ្ញៀវទេសចរណ៍ជាតិបានទៅលេងកម្សាន្តនៅទឹកជ្រោះប៊ូស្រាយ៉ាងកុះករតែម្តង ប៉ុន្តែនៅមិនច្រើនដូចកាលឆ្នាំ២០១៩នោះទេ ដោយសារតែវិបត្តិកូវីដ១៩ បានអូសបន្លាយ១ឆ្នាំពេញ។
លោក ងិន សុវិមាន ប្រធានមន្ទីរទេសចរណ៍ខេត្តបានឲ្យដឹងថា បន្ទប់ផ្ទះសំណាក់ សណ្ឋាគារ រីស៊ត ត្រូវបានភ្ញៀវកក់ពេញអស់នាថ្ងៃឆ្លងឆ្នាំសាកលនេះប្រមាណ៧០%ហើយ។
លោកថា ឆ្នាំនេះភ្ញៀវទេសចរបានធ្លាក់ចុះដោយសារតែវិបត្តិកូវីដ១៩ បានបង្កការភ័យខ្លាច ដូច្នេះបងប្អូនខ្លះមិនហ៊ានចេញដំណើរកម្សាន្តទេ គឺពួកគាត់រើសយកការជួបជុំលក្ខណៈគ្រួសារនៅផ្ទះ ជៀសវាងការជួបជុំមនុស្សច្រើនដែលមានហានិភ័យខ្ពស់។
លោក ស្វាយ សំអ៊ាង អភិបាលខេត្តមណ្ឌលគិរី បានផ្តាំផ្ញើដល់ប្រជាពលរដ្ឋ និងអ្នកទេសចរទាំង អស់ដែលទៅលេងកម្សាន្តនៅខេត្តមណ្ឌលគិរី មិនត្រូវភ្លេចការពារខ្លួនពីជំងឺកូវីដ១៩ ត្រូវពាក់ម៉ាស់ និងលាងដៃជាមួយសាប៊ូ ឬអាល់កុលឲ្យបានខ្ជាប់ខ្ជួន។
ជាងនេះទៀតលោកអភិបាលខេត្តបានសង្កត់ធ្ងន់អំពីការប្រុងប្រយ័ត្នរាល់ការធ្វើដំណើរតាមដង ផ្លូវនានា ជាពិសេសខេត្តមណ្ឌលគិរី ដែលផ្លូវភាគច្រើនសុទ្ធសឹងចុះទួលឡើងចំណោតខ្ពស់ៗ ដូច្នេះអ្នកបើកបរត្រូវបង្កើនការប្រុងប្រយ័តុ្នឲ្យបានខ្ពស់ ដ្បិតថ្ងៃចុងឆ្នាំបែបនេះមានយានយន្តច្រើនធ្វើចរាចរណ៍។
ចែករំលែកព័តមាននេះ