ខេត្តកំពត ៖ មន្ត្រីជំនាញជលផលបាននិយាយថា កំណើនវត្តមានប្រភទសត្វសមុទ្រកម្រនៅដែនសមុទ្រកម្ពុជានាពេលថ្មីៗនេះ បានបង្ហាញនូវការត្រឡប់មកវិញនូវនិរន្តរភាពបរិស្ថានល្អប្រសើរក្នុងដែនសមុទ្រកម្ពុជានិងដែនសមុទ្រតំបន់កំពតនេះ។
លោក ស សូរិន នាយខណ្ឌរដ្ឋបាលជលផលកំពតបានមានប្រសាសន៍ក្នុងកិច្ចប្រជុំពិគ្រោះយោបល់លើការកសាងផែនការជាតិសកម្មភាពសម្រាប់អភិរក្សសត្វសមុទ្រកម្ពុជា ដែលរៀបចំឡើងដោយរដ្ឋបាលជលផល និង អង្គការសត្វព្រៃ និងរុក្ខជាតិ កម្ពុជា នៅក្នុងសាលប្រជុំសណ្ឋាគារកំពតឌីយ៉ាម៉ង់ ស្ថិតក្នុងភូមិកំពង់បាយខាងត្បូង សង្កាត់កំពង់បាយ ក្រុងកំពត កាលពីព្រឹក ថ្ងៃទី៨ កក្កដា ២០១៥ នេះថា ក្នុងរយៈពេលថ្មីៗនេះប្រជាពលរដ្ឋនៅក្នុងសហគមន៍ និងមន្ត្រីជំនាញ រួមជាមួយអង្គការជាតិ និងអន្តរជាតិនានាបានធ្វើការអភិរក្សតំបន់កោះមួយចំនួន ដូចជា កោះអាចម៍សេះ និងតំបន់មួយចំនួនទៀត និងអភិរក្សស្មៅសមុទ្របានទាក់ទាញប្រភេទសត្វសមុទ្រកម្រមួយចំនួនដូចជា ជ្រូកទឹក សេះសមុទ្រ អណ្តើកសមុទ្រ និងសត្វផ្សោតសមុទ្របានវិលត្រឡប់មកក្នុងដែនសមុទ្រកម្ពុជាវិញជាច្រើនក្បាលគួរឲ្យកត់សំគាល់ផងដែរ។
វត្តមានប្រភេទសត្វសមុទ្រកម្រទាំងនេះបានបង្ហាញថា ជាការត្រឡប់មកវិញនូវនិរន្តរភាពបរិស្ថាននៅក្នុងដែនសមុទ្រកម្ពុជាកាន់តែល្អប្រសើរ។
លោកនាយខណ្ឌជលផលបានលើកឡើងទៀតថា ការកើនឡើងប្រភេទសត្វសមុទ្រកម្រនៅក្នុងដែនសមុទ្រកម្ពុជានេះ ដោយសារតែមានការសហការគ្នាក្នុងការអភិរក្ស និងផ្សព្វផ្សាយអប់រំដល់ប្រជានេសាទ រួមទាំងការសហការថ្នាក់តំបន់ក្នុងចំណោមប្រទេសក្នុងអាស៊ានដែលមានដែនសមុទ្រជាប់គ្នាដូចជាប្រទេសម៉ាឡេស៊ី វៀតណាម ថៃ ក្នុងការផ្តល់ព័ត៌មានពីគ្នាទៅវិញទៅមកអំពីការបំលាស់ទីតាមរដូវរបស់ប្រភេទសត្វកម្រសមុទ្រទាំងនោះ។
បើតាមលោក ស សូរិន បានឲ្យដឹងទៀតថា កំណើនប្រភេទសត្វសមុទ្រកម្រទាំងនេះ កំពុងទាក់ទាញឲ្យមានភ្ញៀវទេសចរយ៉ាងច្រើនចូលមកទស្សនាតំបន់ឆ្នេរសមុទ្រនៅកម្ពុជា។ ជាក់ស្តែងនៅខេត្តកំពតចំនួនភ្ញៀវទេសចរ ដែលមកកម្សាន្តក្នុងរយៈពេល៦ខែដើមឆ្នាំ២០១៥នេះ មានចំនួនរហូតដល់៩០ម៉ឺននាក់ បើប្រៀបធៀបទៅនឹង៦ខែដើមឆ្នាំ២០១៤ មានចំនួនត្រឹមតែ៦០ម៉ឺននាក់តែប៉ុណ្ណោះ។
លោកសង្ឃឹមថា ការធ្វើសិក្ខាសាលាពិគ្រោះយោបល់ពេញមួយថ្ងៃនេះ សមាជិកនៃអង្គសិក្ខាសាលាទាំងអស់មានការយល់ដឹង ដោយការប្តូរយោបល់ពីគ្នាទៅវិញទៅមកនាពេលនេះ៕
ចែករំលែកព័តមាននេះ