AFP ផ្សាយថា លោកតា Giorgos Chatzifotiadis អាយុ៧៧ឆ្នាំ មនុស្សម្នាក់ក្នុងចំណោមអ្នកទទួលផលប៉ះពាល់ពីការគ្រប់គ្រងចំណាយរបស់រដ្ឋាភិបាលក្រិកបានទន់ជង្គង់អង្គុយយំនៅមុខធនាគារ
AFP ផ្សាយថា លោកតា Giorgos Chatzifotiadis អាយុ៧៧ឆ្នាំ មនុស្សម្នាក់ក្នុងចំណោមអ្នកទទួលផលប៉ះពាល់ពីការគ្រប់គ្រងចំណាយរបស់រដ្ឋាភិបាលក្រិកបានទន់ជង្គង់អង្គុយយំនៅមុខធនាគារ បន្ទាប់ពីទៅធនាគារចំនួន៤ ប៉ុន្តែមិនអាចបើកប្រាក់ចូលនិវត្តន៍របស់ខ្លួន និងប្រពន្ធបានពេញលេញ ដោយគាត់បើកប្រាក់បានត្រឹមតែ១២០អឺរ៉ូប៉ុណ្ណោះ ។
លោកតា Giorgos រៀបរាប់ថា «ខ្ញុំនិងប្រពន្ធជាជនជាតិក្រិកនៅភាគខាងជើងប្រទេសដែលបានយកអស់ពីកម្លាំងកាយចិត្តដើម្បីធ្វើការនៅក្នុងល្អាងធ្យូងថ្ម ដើម្បីរកប្រាក់សម្រាប់ចាយវាយនៅពេលចាស់ ។ ខ្ញុំជាប្រជាជនម្នាក់ជួបនឹងជីវភាពក្រីក្រ ខ្ញុំបានឃើញការធ្វើអត្តឃាតកាន់តែច្រើន ។ ខ្ញុំជាមនុស្សទន់ជ្រាយចំពោះការមើលឃើញស្ថានភាពបែបនេះ និងមិនអាចទ្រាំឃើញប្រទេសរបស់ខ្លួនជួបវិបត្តិ គឺជាមូលហេតុឱ្យខ្ញុំអស់សង្ឃឹមទើបអង្គុយយំ » ។
រដ្ឋាភិបាលក្រិកបានចេញបញ្ជាឱ្យគ្រប់គ្រងការបើកប្រាក់ពីទូ ATM ដោយកំណត់ឱ្យពលរដ្ឋម្នាក់បើកបានតែ៦០អឺរ៉ូប៉ុណ្ណោះ ក្នុងមួយថ្ងៃ ព្រោះកើតវិបត្តិផ្នែកហិរញ្ញវត្ថុខ្លាំងនៅក្នុងប្រទេស។ លើសពីនេះកាលពីថ្ងៃទី១ កក្កដា ២០១៥ រដ្ឋាភិបាលបានបើកសាខាធនាគារមួយចំនួន ដើម្បីឱ្យជនចាស់ជរាអាចបើកប្រាក់បំណាច់របស់ពួកគេបាន ប៉ុន្តែកំណត់ខ្ពស់បំផុតត្រឹម១២០អឺរ៉ូ។ រដ្ឋាភិបាលក្រិកបានរៀបចំឱ្យមានការបោះប្រជាមតិដោះស្រាយបញ្ហាហិរញ្ញវត្ថុនៅក្នុងប្រទេស កាលពីថ្ងៃទី៥ កក្កដា ២០១៥ ដោយលទ្ធផលដែលបង្ហាញជាលើកដំបូងមានលក្ខណៈមិនស្របគ្នា ប៉ុន្តែមានសំឡេងប្រហាក់ប្រហែលគ្នា ៕
ចែករំលែកព័តមាននេះ