រាជធានីភ្នំពេញ ៖ ដើម្បីចូលរួមលើកស្ទួយ និងថែរក្សាវិស័យកីឡាប្រដាល់ ដែលជាកេរដំណែលមរតកវប្បធម៌ជាតិខ្មែរ ស្ថានីយទូរទស្សន៍អប្សរាប៉ុសិ៍្តលេខ១១ ត្រៀមបង្កើតឱ្យមានព្រឹត្តិការណ៍នៃការប្រកួតប្រដាល់ក្បាច់ខ្មែរបុរាណជាលក្ខណៈអន្តរជាតិលើកដំបូងរបស់ខ្លួននៅថ្ងៃទី៧ មេសា មុនថ្ងៃចូលឆ្នាំថ្មីប្រពៃណីជាតិដែលនឹងឈានចូលមកដល់ក្នុងពេលដ៏ខ្លីខាងមុខ ។ ការប្រកួតនេះគ្រោងធ្វើនៅពហុកីឡដ្ឋាន ជាតិដោយមានកីឡាករចូលរួមចំនួន៨គូហើយចំពោះកីឡាករបរទេសត្រូវបានប្រកាសប្រាប់ឱ្យដឹងថា មានមកពីប្រទេសឡាវ ថៃ ចិន អ៊ីរ៉ង់ និងអ៊ូសបេគីស្ថានជាដើម។
នៅក្នុងសន្និសីទសារព័ត៌មានមួយដែលបានធ្វើឡើងកាលពីព្រឹកថ្ងៃព្រហស្បតិ៍ទី១៧ មីនា នៅស្តាតចាស់ ដោយមានការអញ្ជើញចូលរួមពីលោកយុទ្ធភូថង រដ្ឋលេខាធិការក្រសួងកសិកម្មផងនោះ បញ្ជាក់ថា គូប្រកួតទាំងខ្មែរ និងបរទេសគឺសុទ្ធសឹងតែជាកីឡាករល្អៗ មានល្បិចប្រយុទ្ធនៅលើសង្វៀនខ្ពស់ ដែលអាចធ្វើឱ្យអ្នកទស្សនាមានការចាប់អារម្មណ៍យ៉ាងខ្លាំង ។ ជាពិសេស មានដូចជាកីឡាករសែន រ៉ាឌី មកពីក្លឹបក្រសួងកសិកម្មដែលធ្លាប់ផ្តួលកីឡាករឡាវនៅលើសង្វៀន ស្ថានីយទូរទស្សន៍ CTN កាលពីលើកមុនឱ្យសន្លប់ត្រឹមតែ៣ទឹក ពេលនេះគេមកប៉ះកីឡាករថៃឈ្មោះថាង ឆាងភឿក ក្នុងប្រភេទទំងន់៥៤គីឡូក្រាម។ វ៉ន វីវ៉ា ក្លឹបព្រះខ័នរាជ្យ អ្នកប្រដាល់ ប្រចាំប្រទេសលំដាប់ថ្នាក់ទី២ មិនធ្លាប់ស្គាល់ពាក្យថា ចាញ់ ឱ្យប៉ះជាមួយកីឡាករអ៊ីរ៉ង់ឈ្មោះម៉ូស្តាហ្វា អាប់ឌុលឡាស់ ដែលគេក៏ជាអ្នកប្រដាល់ដែលពិបាករកគូប្រៀបណាស់ដែរ ។ ឯ កីឡាកររាជ សីហ៍ ចាន់រ៉ា ក្លឹបសំរែករាជសីហ៍ បង្ក្រាបគ្រឿងញៀន ជួបកីឡាករនូ ឃិត មកពីឡាវ។
ក្រៅពីនេះ ក៏នៅមានកីឡាករខ្លាំងៗជាច្រើនគូទៀតដែលនឹងមកអង្រួនសង្វៀនពហុកីឡដ្ឋាន ជាតិអូឡាំពិកឱ្យកក្រើកនៅមុនថ្ងៃចូលឆ្នាំថ្មីខាងមុខ ។ ការប្រកួតនេះដែរ គឺរៀបចំឡើងដោយការសហការគ្នារវាងទូរទស្សន៍អប្សរាប៉ុសិ៍្តលេខ១១ និងសហព័ន្ធកីឡាប្រដាល់កម្ពុជាស្ម័គ្រចិត្ត៕
ចែករំលែកព័តមាននេះ