រាជធានីភ្នំពេញ ៖ ការប្រកួតបាល់ទាត់ Metfone Cambodian League ឆ្នាំ២០១៥ ជើងទី១ កាលពីថ្ងៃសៅរ៍ ទី៥ និងអាទិត្យ ទី៦ កក្កដា កន្លងមកនេះ បានឈានចូលដល់សប្តាហ៍ទី២ហើយ ខណៈក្រុមទាំងអស់កំពុងប្រជែងគ្នាយកពិន្ទុមករក្សាទុកនៅក្នុងដៃរៀងៗខ្លួន ។
ក្រុមស្វាយរៀងដែលលេងចាញ់ក្រុមណាហ្គាវើលនៅលើទីលានកីឡដ្ឋានស្តាតចាស់ នៅថ្ងៃបើកឆាកដំបូងនោះបានយកឈ្នះលើក្រុមអាស៊ីអឺរ៉ុបយូណាយធីតនៅលើទឹកដីខេត្តស្វាយរៀង ក្នុងលទ្ធផល៣-២ កាលពីថ្ងៃសៅរ៍ ។ ចំណែកក្រុមបៀលប្រាយយូណាយធីតកើនបាន៤ពិន្ទុ បើទោះជាការប្រកួតនៅថ្ងៃបើកឆាកបានយកឈ្នះលើក្រុមអាស៊ីអឺរ៉ុបយូណាយធីត៧-២ ប៉ុន្តែបានត្រឹមតែយកស្មើ១-១ ជាមួយក្រុមមជ្ឈមណ្ឌលកម្ចាត់មីនកម្ពុជាកាលពីថ្ងៃសៅរ៍ នៅទីលានមជ្ឈមណ្ឌលបាទី១ ។ ក្រុមក្រសួងការពារជាតិពេលនេះរកបាន៤ពិន្ទុដូចគ្នា ព្រោះថានៅថ្ងៃបើកឆាកដំបូងបានយកឈ្នះលើក្រុមវេស្ទើនភ្នំពេញ២-១ បុ៉ន្តែបែរជាមកស្មើ១-១ ជាមួយក្រុមអគ្គស្នងការដ្ឋាននគរបាលជាតិ១-១ នៅលើទីលានកីឡដ្ឋានស្តាតចាស់កាលពីថ្ងៃសៅរ៍ ។
ដោយឡែកសម្រាប់ការប្រកួតកាលពីថ្ងៃអាទិត្យវិញ ក្រុមភ្នំពេញក្រោនក្រោយពីបានយកស្មើ០-០ ជាមួយក្រុមបឹងកេតអង្គរអេហ្វស៊ី កាលពីថ្ងៃបើកឆាកដំបូង ពេលនេះគេរកបាន៣ពិន្ទុហើយបន្ទាប់ពីមានយកឈ្នះលើក្រុមណាហ្គាវើល៤-២ នៅលើទីលានភ្នំពេញក្រោនឫស្សីកែវ កាលពីថ្ងៃអាទិត្យ ។ ឯក្រុមវេស្ទើនភ្នំពេញ ថ្វីដ្បិតតែប្រកួតចាញ់ក្រុមក្រសួងការពារជាតិ២-១ កាលពីថ្ងៃប្រកួតបើកឆាកមែន ប៉ុន្តែពេលនេះគេមាន៣ពិន្ទុនឹងគេហើយក្រោយពីបានឈ្នះក្រុមគីរីវង់សុខសែនជ័យ៦-៤ កាលពីថ្ងៃអាទិត្យ នៅលើទីលានទឹកដីខ្លួនឯងក្នុងខណ្ឌទួលគោក ។ ចំណែកក្រុមបឹងកេតអង្គរ និងក្រុមខេមបូឌានថាយហ្គឺរវិញនោះ ពេលនេះមាន៣ពិន្ទុនៅក្នុងដៃស្មើគ្នា ព្រោះថាក្រុមខេមបូឌានថាយហ្គឺរឈ្នះមួយប្រកួតកាលពីថ្ងៃប្រកួតបើកឆាក ក៏ប៉ុន្តែបានមកចាញ់ក្រុមបឹងកេតអង្គរ៣-២ នៅលើទីលានកីឡដ្ឋានស្តាតចាស់កាលពីថ្ងៃអាទិត្យកន្លងមកនេះ ៕
ចែករំលែកព័តមាននេះ