ទូរទស្សន៍អារ៉ាប់ AL-MAYADEEN TV រាយការណ៍កាលពីថ្ងៃទី៥ កក្កដាថា កងទ័ពស៊ីរីគាំទ្រដោយពួកហេសប៊ុលឡាហ៍ស៊ីអុីតលីបង់បានធ្វើការវាយលុកមួយលើផ្នែកខាងលិចនៃទីក្រុង ZABADANI កាន់កាប់ដោយពួកឧទ្ទាមនៅភាគពាយ័ព្យក្រុងដាម៉ាស់ និងក្បែរព្រំដែនជាមួយលីបង់ ។
កងទ័ពស៊ីរី និងពួកហេសប៊ុលឡាហ៍ ក៏វាយដណ្តើមកាន់កាប់ទាំងស្រុងដែរនូវស្រុក JAMYIAT ស្ថិតនៅផ្នែកខាងលិចនៃទីក្រុងគន្លឹះនេះ ។
មុននេះកងទ័ពស៊ីរី និងពួកហេសប៊ុលឡាហ៍បានធ្វើការវាយលុកចម្បងមួយដើម្បីកម្ចាត់យុទ្ធជនរណសិរ្សអាល់នូស្ត្រាមានទំនាក់ទំនងជាមួយអាល់កៃដា និងក្រុមអ៊ិស្លាមនិយមឯទៀតៗចេញពីទីក្រុង ZABADANI ។ ការវាយលុកដោយទ្រង់ទ្រាយធំលើទីក្រុងសំខាន់នោះស្ថិតនៅភាគខាងលិចតំបន់ QALAMOUN ភាគខាងជើងរដ្ឋធានីដាម៉ាស់ ត្រូវបានធ្វើឡើងបន្ទាប់ពីកងទ័ពស៊ីរី និងសម្ព័ន្ធមិត្តបានពង្រឹងការឡោមព័ទ្ធពួកឧទ្ទាម ។ ការវាយលុកនេះសំដៅរំដោះទីក្រុង និងតំបន់ទាំងមូលពីកណ្តាប់ដៃរណសិរ្សអាល់នូស្ត្រា និងបណ្តាក្រុមសម្ព័ន្ធមិត្តដែលប្រើប្រាស់ទីក្រុងនោះដើម្បីបញ្ជូនយុទ្ធជន និងអាវុធមកពីលីបង់ក្នុងយុទ្ធនាការភាគខាងលិចក្រុងដាម៉ាស់។ បើទទួលបានជោគជ័យក្នុងការប្រយុទ្ធនេះ នោះកងទ័ពស៊ីរី និងពួកហេសប៊ុលឡាហ៍អាចការពារព្រំដែនលីបង់ពីការគំរាមកំហែងរបស់រណសិរ្សអាល់នូស្ត្រា ៕
ចែករំលែកព័តមាននេះ