រាជធានីភ្នំពេញ ៖ ម្ចាស់ផ្ទះសំណាក់យីហោអង្គរទិព្ធ ស្ថិតក្នុងក្រុម១០ ភូមិត្រពាំងឈូក សង្កាត់ទឹកថ្លា ខណ្ឌសែនសុខបានចាប់ខ្លួនជនសង្ស័យម្នាក់ប្រគល់ទៅឲ្យសមត្ថកិច្ចប៉ូលិសចាត់ការទៅតាមផ្លូវច្បាប់
រាជធានីភ្នំពេញ ៖ ម្ចាស់ផ្ទះសំណាក់យីហោអង្គរទិព្ធ ស្ថិតក្នុងក្រុម១០ ភូមិត្រពាំងឈូក សង្កាត់ទឹកថ្លា ខណ្ឌសែនសុខបានចាប់ខ្លួនជនសង្ស័យម្នាក់ប្រគល់ទៅឲ្យសមត្ថកិច្ចប៉ូលិសចាត់ការទៅតាមផ្លូវច្បាប់ កាលពីថ្ងៃទី៤ កក្កដា ២០១៥ ក្រោយពីជនសង្ស័យចូលដេកផ្ទះសំណាក់បន្លំធ្វើសកម្មភាពលួចយកទូរទស្សន៍ LED គេចខ្លួនអស់រយៈពេលជាង១០ថ្ងៃ។
ប៉ូលិសប៉ុស្តិ៍រដ្ឋបាលសង្កាត់ទឹកថ្លាបានឲ្យដឹងថា ជនសង្ស័យមានឈ្មោះ កុក ចារ ភេទប្រុស អាយុ២៧ឆ្នាំ មុខរបរមិនពិតប្រាកដ ស្នាក់នៅជាមួយបងស្រីនៅភូមិក្រាំងអង្ក្រង សង្កាត់ក្រាំងធ្នង់ ខណ្ឌសែនសុខ និងមានស្រុកកំណើតភូមិ៤ សង្កាត់មិត្តភាព ក្រុងព្រះសីហនុ។
យោងតាមបណ្តឹងជនរងគ្រោះបានបញ្ជាក់ថា កាលពីព្រឹកថ្ងៃទី២៥ មិថុនា ជនសង្ស័យខាងលើបានចូលមកដេកក្នុងផ្ទះសំណាក់របស់គាត់ ដោយបានជួលបន្ទប់លេខ២០៥ ជាន់ទី១ស្នាក់នៅរហូតដល់វេលាល្ងាចថ្ងៃទី២៦ មិថុនា វេលាម៉ោង៤រសៀល ជនសង្ស័យខាងលើបានចាកចេញពីបន្ទប់ដេក ទើបអ្នកថែរក្សាបន្ទប់រត់មកប្រាប់ថា ភ្ញៀវខាងលើបានលួចយកទូរទស្សន៍ LED ដែលនៅក្នុងបន្ទប់២០៥បាត់ទៅហើយ។
បណ្តឹងបន្តថា ជាមួយនោះជនរងគ្រោះក៏បានបើកមើលកាមេរ៉ាសុវត្ថិភាពទើបបានស្គាល់ និងឃើញជនសង្ស័យខាងលើ។ រហូតដល់ថ្ងៃទី៤ កក្កដា ២០១៥ ជាចៃដន្យបានប្រទះឃើញជននេះ ជនរងគ្រោះក៏ចាប់ឃាត់ខ្លួនយកមកប្រគល់ឲ្យសមត្ថកិច្ចតែម្តង៕
ចែករំលែកព័តមាននេះ